«Ոստիկանության ոչ արժանահավատ աշխատանքը կարող է ստվերել այս ընտրությունների բոլոր փուլերի դրական ձեռքբերումները». Կարեն Անդրեասյան

«Ոստիկանության ոչ արժանահավատ աշխատանքը կարող է ստվերել այս ընտրությունների բոլոր փուլերի դրական ձեռքբերումները». Կարեն Անդրեասյան

20-02-2013

Հարգելի հայրենակիցներ,

Յուրաքանչյուր ընտրություներից հետո էլ լինում են որոշակի արդյունքներ և բազմատեսակ գնահատականներ: Ընտրությունների արդյունքներից առավել կարևոր է հանրության վստահությունը այդ արդյունքների նկատմամբ: Հանրության վստահությունը կարող է ձևավորվել միայն չեզոք և օբյեկտիվ գնահատականներով: Այսօրվանից շատ տեղական և միջազգային կազմակերպություններ կներկայացնեն իրենց գնահատականները այս ընտրությունների վերաբերյալ:

«Նուվել դ՛Արմենի», Սեդա Մավյանի չհրապարկված հետաքննությունը. Մարդու իրավունքների կամ անարդարության եվրոպական դատարա՞ն

«Նուվել դ՛Արմենի», Սեդա Մավյանի չհրապարկված հետաքննությունը. Մարդու իրավունքների կամ անարդարության եվրոպական դատարա՞ն

07-02-2013

Ծանոթագրություն. Այս հոդվածը նախատեսված է հրապարակել ֆրանսերենով՝ «Նուվել դ՛Արմենի մագազին » ամսագրի մարտի համարում, բայց որոշ հանգամանքների բերումով և խմբագրության` «Մեդիալաբին» բացառիկ թույլտվությամբ հայերեն տարբերակը հրապարակվում է փետրվարին, այսինքն` Փարիզում լույս տեսնելուց առաջ:

ՄԱՐԴՈՒ ԻՐԱՎՈՒՆՔՆԵՐԻ ԵՎՐՈՊԱԿԱՆ ԴԱՏԱՐԱՆԻ (ՄԻԵԴ) ՎՃԻՌԸ ԵՐԵՎԱՆԻ ԿԵՆՏՐՈՆԻ ՕՏԱՐՈՒՄՆԵՐԻ ԴԱՏԱԿԱՆ ԳՈՐԾՈՎ:

Բոլորը հիշում են Երևանի այդ փողոցի անունը՝ Փավստոս Բուզանդի, որը կապված էր մարդկանց իրենց տներից վտարելու ծանր ու զանգվածային դեպքերի հետ, որոնք տեղի ունեցան Ռոբերտ Քոչարյանի օրոք՝ 2004-2005 թթ., Հյուսիսային և Գլխավոր պողոտաների կառուցման շրջանակներում: Ութ տարի անց՝ 2012-ի հոկտեմբերի 9-ին, Մարդու իրավունքների եվրոպական դատարանը (ՄԻԵԴ) իր առաջին վճիռներն արձակեց և Հայաստանի կառավարությանը պարտավորեցրեց փոխհատուցելու վտարված սեփականատերերին իրենց նախկին տների արժեքը, գումարած՝ հասցված վնասը: Այս լուրը, ինչը պետք է որ ուրախացներ նրանց, հակառակը՝ հիասթափեցրել է: Ինչո՞ւ: Արդյոք պատճառը նրանց չափազանցված հավակնություննե՞րն են, թե՞ մի նոր անարդարություն է պատվաստվում հնի վրա: Նկատի առնելով այս առաջին դատավարությունների բարոյական, իրավական, քաղաքական և տնտեսական կարևորությունը (դրանցից է կախված ՄԻԵԴ-ի կշիռը հասարակության, իշխանությունների և շինարարական մեծ ձեռնարկությունների աչքում)` չէինք կարող չանդրադառնալ այս հարցին:

Պատմական անդրադարձ

Ամեն ինչ սկսվեց 2002 թ. հոկտեմբերի 1-ին ընդունված թիվ 1151-N որոշումից, որով Անդրանիկ Մարգարյանի կառավարությունը որոշում էր հանրային շահի համար օտարել Երևանի կենտրոնում գտնվող ընդարձակ մի տարածք, ինչի հետևանքով Հայաստանի մայրաքաղաքը շուտով վերածվելու էր իսկական բացօթյա շինհրապարակի (և այժմ էլ մասամբ այդպիսին է): Այդ պահից սկսած ակնհայտ դարձավ, որ տասնյակ հազարավոր մարդկանց օթևան ունենալու հարցն օդում կախված էր մնալու, մասնավորապես նրանց, ովքեր ապրում էին կառուցվելիք Հյուսիսային և Գլխավոր պողոտաների շրջակայքում, որոնք պետք է դառնային Երևանի կենտրոնական պողոտաները: Նախագահ Ռոբերտ Քոչարյանի վարչակազմը այդ նախաձեռնությունն արդարացնում էր Ալեքսանդր Թամանյանի (1878-1936)՝ մայրաքաղաքի կառուցապատման պատմական նախագիծն ավարտին հասցնելու իր ցանկությամբ: Բայց այն եղանակը, որով իրականացվեց դա՝ տնտեսական և սոցիալական արդարության բոլոր սկզբունքների հանդեպ կատարյալ արհամարհանքով և մասնավոր ձեռնարկությունների միջոցով (այդ թվում՝ շինարարական մութ մի ընկերության՝ «Գլենդել Հիլզի», որը 2004-ին հանկարծ հայտնվեց հենց այդ նախագծին մասնակցելու նպատակով), ցույց տվեց, որ Քոչարյանի վարչակազմն ավելի շուտ առաջնորդվում է իր ակնկալած ցնցող գերշահույթներով, քան քաղաքաշինական զարգացման հոգսերով: Եվ իսկապես, այն, ինչ 2004-ից ի վեր տեղի է ունեցել մայրաքաղաքի բարեկարգման և կառուցապատման ոլորտում, հատկապես՝ ներկայիս Հյուսիսային և Գլխավոր պողոտաների հատվածում, այլ բան չէ, քան սեփականության անօրինական լայնածավալ փոխանցում, լայնամասշտաբ թալան, որը նախաձեռնել են պետության ղեկավարները` հանրային գերակա շահի անվան տակ և իրականացվել մարդկային աներևակայելի դժբախտությունների գնով:

Ամեն ինչ սկսվում է 2004-ին

2004-ին էր, որ գիլիոտինի դանակն իջավ բնակիչների գլխին, որոնք արդեն քիչ թե շատ տեղեկացվել էին ասեկոսեների միջոցով, բայց չգիտեին, թե իրենց ինչ է սպասում իրականում: Բուզանդի փողոցում ապրողները, հատկապես, չգիտեին, որ 2004-ի հունիսի 17-ի որոշմամբ կառավարությունը «Գլենդել Հիլզ» ընկերությանն է վստահել իրենց փողոցում որոշ շենքերի կառուցումը, և որ մեկ ամիս անց (հուլիսի 28-ին) Երևանի քաղաքապետարանն այդ ընկերությանը թույլատրել է ունեցվածքի գնահատում կատարել, սակարկել անմիջապես սեփականատերերի հետ, և սակարկության ձախողման դեպքում պետության անունից նրանց դեմ հայց ներկայացնել դատարան: 2004 թ. օգոստոս ամսին էր, որ «Գլենդել Հիլզի» գործակալները սկսեցին ներկայանալ Բուզանդի փողոցի բնակիչներին՝ ամեն տեղ գործելով նույն եղանակով (կոպտորեն, առանց նույնիսկ փոքր-ինչ սակարկելու, մարդկանց պատին դեմ տալով), նրանց չնչին փոխհատուցում առաջարկեցին, որը պատրաստ էին գրեթե կրկնապատկել, եթե մարդիկ հինգ օրվա ընթացքում հեռանային իրենց տներից: Այդ ամենը, որ ուղեկցվում էր սպառնալիքներով, ոչ ավելի, ոչ պակաս, պետության կողմից հովանավորվող շանտաժ էր, որը շուտով խուճապ առաջացրեց դիմակայելու միջոց չունեցող բնակչության շրջանում: Եվ ահա, ուզած-չուզած՝ ճնշող մեծամասնությունն ընդունեց շինարարական խոշոր ձեռնարկությունների առաջարկը: Անդրդվելի մարդկանց մի փոքր խումբ միայն մերժեց այն (5 ընտանիք):

Բուզանդի փողոց, թիվ 9. Թունյան-Սաֆյան ընտանիքի գործը

Այդ ընտանիքներից էր Թունյան-Սաֆյան ընտանիքը՝ այդ ժամանակ կազմված վեց հոգուց (ծնողները, նրանց երկու որդին, կրտսեր որդու կինն ու մանկահասակ դուստրը), որը բնակվում էր Բուզանդի փողոց, թիվ 9 հասցեում (եթե Հանրապետության հրապարակից մոտենանք, դա Աբովյան փողոցից դեպի ձախ ընկած առաջին փողոցն է՝ արտգործնախարարության և էներգետիկայի նախարարության հենց հետևում): Նրանց տունը, որը գրանցված էր մոր՝ Էմմա Թունյանի անունով, ընտանեկան սեփականություն էր՝ 89 քմ մակերեսով, որը գոյություն ուներ 1930-ից ի վեր և նորոգվել էր 1998-ին: Տունը տեղակայված էր 240 քմ մակերեսով հողատարածքի վրա, որտեղ գտնվում էր նաև Էմմա Թունյանի ամուսնու (Սաշիկ Սաֆյան՝ նկարիչ, դիզայներ և տպագրիչ) 38 քմ մակերեսով արհեստանոցը, իսկ մնացած մասում բակն էր և պտղատու ծառերը:

2004 թ. օգոստոսի 25-ին «Գլենդել Հիլզը» Էմմա Թունյանին տեղեկացնում է, որ իր տունը և հողամասը գնահատվել է 34.200 դոլար՝ մի գումար, որին կավելացվի 28.600 դոլար, եթե առաջիկա հինգ օրերի ընթացքում ազատեն տունը, իսկ ընտանիքի մյուս երեք անդամներից յուրաքանչյուրը կստանա 2000-ական դոլար հատուցում և 1500 դոլար որպես դրամական խրախուսում (հարսը և թոռնուհին հաշվի չեն առնվում առհասարակ): Ընդհանուր գումարը կազմում է 76.800 դոլար: Ավագ որդին՝ Գևորգ Սաֆյանը (այսօր՝ 37 տարեկան), հիշում է. «Մեզ հետ խոսում էին խիստ, նույնիսկ՝ կոպիտ տոնով: Մեզ հինգ օր տվեցին հեռանալու համար, եթե ոչ` գումարը կկիսեին: Երբ հրաժարվեցինք, նույնիսկ չփորձեցին համոզել, որ վերցնեինք գումարը»: Իսկապես, ինչո՞ւ պիտի փորձեին համոզել, եթե նույնիսկ կրկնապատկված գումարը շատ քիչ էր տվյալ անշարժ գույքի շուկայական գնի համեմատ (76.800 դոլար՝ նվազագույնը 89.000 դոլարի փոխարեն, եթե նկատի առնենք, որ այդ ժամանակաշրջանում տվյալ տարածքում 1 քառակուսի մետրն արժեր նվազագույնը 1000 դոլար, չհաշված նույնիսկ հողամասի արժեքը, որը մի քանի անգամ ավելի արժեր): Կիսվելով՝ այդ գումարը շինարարական ընկերությանը հնարավորություն էր տալիս հսկայական գերշահույթ ունենալու, մանավանդ որ ընկերությունը չէր վճարելու հողատարածքի համար, ոչ էլ փոխհատուցում էր տալու ընտանիքի վերոհիշյալ երկու անդամին: Թունյան-Սաֆյան ընտանիքը մերժում է «Գլենդել Հիլզի» առաջարկը:

Դատական գործընթացներ և բռնի վտարում

Ընկերության պատասխանն ուղղակի կայծակնահար է անում: Հենց հաջորդ ամիս «Գլենդել Հիլզը», կառավարության 2004 թ. հուլիսի 28-ի որոշման համաձայն, դատական հայց է ներկայացնում Թունյան-Սաֆյան ընտանիքի դեմ (սեպտեմբերի 23-ին): Վերջիններս անմիջապես պատասխանում են իրավական եղանակով (հոկտեմբերի 18-ին). 1995-ի Սահմանադրության 28-րդ հոդվածը վկայակոչելով՝ նրանք ուշադրություն են հրավիրում այն բանի վրա, որ օտարման գործընթացը հակասահմանադրական է, քանի որ, վերոհիշյալ հոդվածի համաձայն, «սեփականության օտարում կարող է իրականացվել միայն բացառիկ դեպքերում, օրենքի հիման վրա, նախապես համարժեք փոխհատուցում վճարելուց հետո»: Այնինչ, օտարումը տեղի էր ունեցել ոչ թե օրենքի, այլ՝ կառավարության որոշման հիման վրա, և առանց «նախապես համարժեք փոխհատուցում վճարելու»: Չնայած այդ ամենին՝ 2004-ի հոկտեմբերի 26-ին Կենտրոն և Նորք-Մարաշ վարչական շրջանների առաջին ատյանի դատարանը բավարարում է «Գլենդել Հիլզի» հայցը և Թունյան-Սաֆյան ընտանիքին հարկադրում է կնքել իրենց գույքի օտարման պայմանագիր: Դատարանը միաժամանակ հայտարարում է, որ ինքն իրավասու չէ որոշում կայացնել կառավարության 2002-ի օգոստոսի 1-ի թիվ 1151-N որոշման սահմանադրական կամ հակասահմանադրական լինելու վերաբերյալ (հետագայում՝ 2006-ին, ՄԻՊ Արմեն Հարությունյանի դիմումին ի պատասխան, Սահմանադրական դատարանը ընդունում է այդ որոշման հակասահմանադրական լինելը, բայց՝ անհետևանք…): Հաջորդ ամիս Թունյան-Սաֆյան ընտանիքը բողոքարկում է առաջին ատյանի վճիռը (2005 թ. նոյեմբերի 9-ին): Բայց վերաքննիչ դատարանը մերժում է նրանց բողոքը (2005 թ. մարտի 1-ին): Ընտանիքը դիմում է Վճռաբեկ դատարան: Բողոքը դարձյալ մերժվում է (ապրիլի 14-ին): 2005 թ. ապրիլի 29-ին Դատական ակտերի կատարման հարկադիր ծառայությունը ընտանիքին հրամայում է ազատել տունը: Մայիսի 12-ին, տեսնելով, որ դատական վճիռը չի կատարվում, այն է` ընտանիքը չի ազատում տունը, հարկադիրը գործի է անցնում: /իրենց հարևանների փորձն ունենալով, երբ ոստիկանության հատուկ ջոկատի կարմիրբերետավորների միջոցով՝ ստիպողաբար և բռնությամբ մարդկանց վտարում էին իրենց բնակարաններից, այս ընտանիքը նույնպես դուրս է հանվում իր տնից, ինչպես որ ուրիշ անհնազանդներ արդեն հանվել էին իրենց տներից կամ հանվելու էին (տես՝ ՆԱՄ-ի 2005-ի հոկտեմբերի թիվ 112, էջ 34): Սակայն Թունյան-Սաֆյան ընտանիքին այդպես էլ ոչ մի դրամ գումար չի վճարվում իրենց տան և հողամասի դիմաց, իսկ դատական մարմինները և հարկադիրը իրենց գործը կատարված են համարում միայն` այս ընտանիքին տանից զրկելով (մինչև այսօր՝ արդեն մոտ 7,5 տարի, այս ընտանիքին ոչ մի դրամ չի վճարվել): Թունյան-Սաֆյան ընտանիքին, նաև մի քանի այլ դիմադրողների, որոնք սպառել էին Հայաստանում արդարության հասնելու բոլոր միջոցները, մնում էր միայն Մարդու իրավունքների եվրոպական դատարան (ՄԻԵԴ) դիմելը, ինչն էլ նրանք անում են 2005 թ.:

Դիմումը ՄԻԵԴ (2005)

Երեք փաստաբան (Արթուր Գրիգորյան, Լիզա Գրիգորյան և Վահե Գրիգորյան) իրար մեջ բաժանում են երեսուն ընտանիքների գործերը պաշտպանելու առաքելությունը: Վահե Գրիգորյանը ստանձնում է մոտ քսան, այդ թվում նաև՝ Թունյան-Սաֆյան ընտանիքի գործի պաշտպանությունը: Գործն իր բնական ընթացքի մեջ է, երբ հանկարծ 2008-ի դեկտեմբերի 9-ին, այսինքն` ՄԻԵԴ-ին դիմելուց երեք ու կես տարի անց և արդեն Սերժ Սարգսյանի նախագահության օրոք, Տիգրան Սարգսյանի կառավարությունը «միակողմանի հայտարարությամբ» տեղեկացնում է, որ ինքը պատրաստ է Թունյան-Սաֆյան ընտանիքին Երևանի կենտրոնում 116 քմ մակերեսով բնակարան հատկացնել նորակառույց շենքում, որի շինարարությունն ավարտվելու է 2010-ին: Առաջին հայացքից առաջարկը հրապուրիչ է թվում: Սակայն ոչ մի հասցե, ոչ մի հատակագիծ, ոչ մի մանրամասն և ոչ մի երաշխիք կցված չէր կառավարության առաջարկին, որը դեռ ավելին, չի անդրադառնում հողատարածքի փախհատուցման խնդրին: Այդ իսկ պատճառով Թունյան-Սաֆյան ընտանիքը մերժում է առաջարկը: (Բուզանդի 15 հասցեում ապրող Վահանյանների ընտանիքի, ինչպես նաև Բուզանդի փողոցի ևս 3 այլ ընտանիքների՝ Ղասաբյանների, Ղարիբյանների և Բաղդասարյանների գործերի ուսումնասիրությունը, որն այստեղ չենք ներկայացնում, ապացուցում է, որ Թունյան-Սաֆյանների զգուշավորությունն լիովին արդարացված էր):

ՄԻԵԴ-ի խայտառակ վճիռը (2012)

Ի վերջո, 2012-ի հոկտեմբերի 9-ին ՄԻԵԴ-ը հրապարակում է սույն գործով իր վճիռը. ընդունելով, որ Հայաստանի Հանրապետությունը խախտել է սեփականության պաշտպանության վերաբերյալ Մարդու իրավունքների եվրոպական կոնվենցիայի թիվ 1 Արձանագրության 1-ին հոդվածը, այնուամենայնիվ, ՄԻԵԴ-ը Հայաստանի Հանրապետությանը պարտավորեցնում է վճարել ընդամենը 30.000 եվրո փոխհատուցում` որպես պատճառված գույքային վնաս, ինչպես նաև ընտանիքի չորս անդամներից յուրաքանչյուրին վճարելու 1500-ական եվրո (հարսին և թոռնուհուն ոչ մի կերպ հաշվի չեն առնում…) և 30 եվրո՝ դատական ծախսերի համար (պետական տուրքի գումար): Այսպիսով, փոխհատուցման գումարը կազմում է 36.030 եվրո, որը համարժեք է 45.700 դոլարի, իսկ 240 քմ մակերեսով հողատարածքի հարցին ընդհանրապես անդրադարձ չկա:

Արդյունքում` վճարվելիք փոխհատուցումը հեռու է նույնիսկ այն 76.800 դոլարից, որն առաջարկել էր «Գլենդել Հիլզը» վերջնագրի տեսքով՝ ութ տարի առաջ, հեռու է նաև նվազագույն 89.000 դոլարից, որքան արժեր միմիայն տունը այդ տարիներին, և հատկապես… շա՜տ ու շա՜տ հեռու է Թունյան-Սաֆյան ընտանիքի նախկին սեփականության տեղում «Գլենդել Հիլզի» կառուցած շենքում համանման մակերեսով բնակարանի գնից: Մենք անձամբ փորձել ենք պարզել նման բնակարանի գինը՝ որպես գնորդ ներկայանալով: Եվ ի՞նչ. 2012-ի դեկտեմբերի կեսին 85 քմ մակերեսով կահավորված բնակարանն արժեր 200.000 դոլար: Երբ փորձեցինք պարզել, թե արդյոք հնարավոր չէ՞ գինն իջեցնել, սեփականատերը բացականչեց. «Բայց գիտե՞ք, թե այս թաղամասում մեկ քառակուսի մետրի գինն ինչքան է՝ 3000 դոլար: Այսինքն` ես ձեզ 55.000 դոլար «նվեր» եմ տալիս»: Շենքի ընդունարանում մենք պարզեցինք, որ սեփականատիրոջ «նվեր արած» գինն ուռճացված չէր և համապատասխանում էր այդ թաղամասում անշարժ գույքի գների սանդղակին: Իրականում, այն 36.030 եվրոյով կամ 47.500 դոլարով, որ ՄԻԵԴ-ն արքայավայել առատաձեռնությամբ շնորհել է Թունյան-Սաֆյան ընտանիքին, նրանք կկարողանան միայն մի մեծ ավտոտնակ գնել նույն շենքի կայանատեղում (30.000 դոլար):

Եզրակացություն

Ցանկանում ենք հասկանալ ՄԻԵԴ-ի յոթ դատավորների տրամաբանությունը, որոնք, Յոզեպ Կասադեվալի գլխավորությամբ, արձակել են 2012-ի հոկտեմբերի 9-ի դատավճիռը: Քանի որ նրանք ընդունել են Հայաստանի պետության մեղքը, ինչո՞ւ չեն հաշվարկել դրան համապատասխանող այնպիսի փոխհատուցում, որը ոչ միայն արդարացիորեն վարձատրեր խաբված քաղաքացիներին, այլև նրանց հատուցեր իրենց քաջության և հետևողականության համար՝ միաժամանակ պատժելով իրավախախտ պետությանը: Տուժածներին ողորմելի փոխհատուցում առաջարկելով՝ եվրոպացի դատավորները ոչ միայն սարսափելի անարդարություն են գործել, այլև կանաչ լույս են վառել ինչպես Հայաստանի իշխանությունների, այնպես էլ խոշոր շինարարական ընկերությունների գործելիք գալիք անարդարությունների համար: Ավելին՝ այդ խրախուսումը տարածվում է ամբողջ տարածաշրջանի, այսինքն` Վրաստանի և Ադրբեջանի վրա, որտեղ այս հարցին հետևում են մեծագույն ուշադրությամբ: Վճռական՝ պայքարելու մինչև վերջ, Թունյան-Սաֆյան ընտանիքը բողոք հայց ներկայացրեց ՄԻԵԴ-ի Մեծ պալատ (հունվարի սկզբին): Նրանց համար դա արդարության հասնելու վերջին հույսն է: Իսկ ՄԻԵԴ-ի համար սա վերջին հնարավորությունն է ուղղելու իր սխալը և արժանի լինելու իր կոչմանը:

Սեդա Մավյան

Թարգմանիչ՝ Ն.Ա.

Լուսանկարները տրամադրել է Հայկ Բիանջյանը: Բոլոր հեղինակային իրավունքները պատկանում են հեղինակին: Լուսանկարների օգտագործումն առանց հեղինակի համաձայնության արգելվում է:

© Medialab.am

«Վտանգված է «Ժողովուրդ» օրաթերթի հետագա գործունեությունը». Թերթի գույքի վրա արգելանք է դրվել

«Վտանգված է «Ժողովուրդ» օրաթերթի հետագա գործունեությունը». Թերթի գույքի վրա արգելանք է դրվել

25-01-2013

«Ժողովուրդ» օրաթերթում ստեղծված իրավիճակի մասին ահազանգում է խմբագրությունը, որն ամբողջությամբ ներկայացնում ենք ստորեւ:

«Այսօր «Ժողովուրդ» օրաթերթը ստացել է Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Ռուբեն Ափինյանի կայացրած որոշումը այն մասին, որ օրաթերթին պատկանող գույքի վրա 3 մլն դրամի չափով արգելանք է դրված: Պատճառն այն է, որ «Երեւանի թռչնաբուծական ֆաբրիկան» եւ դրա սեփականատեր Խաչիկ Խաչատրյանը հունվարի 10-ին հայց են ներկայացրել «Ժողովուրդ»-ի եւ լրագրող Սոնա Գրիգորյանի դեմ: «X գրուպ»-ի նախագահ Խաչիկ Խաչատրյանը կարծում է, որ իր պատին ու արժանապատվությունը, ինչպես նաեւ գործարար համբավը արատավորվել է օրաթերթի հրապարակումներից մեկով, ինչի համար պահանջում է հերքում եւ 3 մլն դրամի փոխհատուցում:

«Մարդու իրավունքների պաշտպանության ազգային ռազմավարություն». քննարկումներ բացթողումների եւ բարեփոխումների անհրաժեշտության շուրջ

«Մարդու իրավունքների պաշտպանության ազգային ռազմավարություն». քննարկումներ բացթողումների եւ բարեփոխումների անհրաժեշտության շուրջ

23-01-2013

Անչափահասների արդարադատության, միավորումների ստեղծման, խտրականության արգելման, կոռուպցիայի ազդեցության, ԶԼՄ-ների ազատականացման, արդար դատաքննության, սեփականության օտարման և այլ ոլորտներում մարդու իրավունքների պաշտպանության անհրաժեշտության մասին հունվարի 23-ին բարձրաձայնեցին քաղաքացիական հասարակության մի շարք կազմակերպությունների ներկայացուցիչներ` Երեւանում:

Նրանք մատնանշում են, որ վերը նշված և բազմաթիվ այլ իրավունքներ արձանագրված չեն «ՀՀ մարդու իրավունքների պաշտպանության ազգային ռազմավարություն»-ում, որի շուրջ այսօր հանրային քննարկում էր ծավալվել:

Քննարկումը կազմակերպել էր «Գործընկերություն հանուն բաց հասարակության» նախաձեռնությունը (ներկայացնում է քաղաքացիական հասարակության 60-ից ավելի կազմակերպություն)` համագործակցելով «Արևելյան գործընկերության» քաղաքացիական հասարակության ֆորումի Հայաստանի ազգային պլատֆորմի աշխատանքային առաջին խմբի հետ:

Քննարկմանը ներկա էին պետական պաշտոնյաներ, Հայաստանում հավատարմագրված դեսպաններ, միջազգային կազմակերպությունների և «Արևելյան գործընկերության» Հայաստանի ազգային պլատֆորմի ներկայացուցիչներ:

Ըստ ՀԿ-ների ներկայացուցիչների՝ «ՀՀ մարդու իրավունքների պաշտպանության ազգային ռազմավարությունը» բարեփոխումների կարիք ունի` կապված կոնկրետ ոլորտներում մարդկանց իրավունքների հետ:

«Օրինապահ մարմինների թողտվությամբ է տեղի ունեցել իմ ընկերության թալանը: Չեմ զարմանա,եթե վաղը Մանգասարյանին ազատ արձակեն». Էդոմոնդ Խուդյան

«Օրինապահ մարմինների թողտվությամբ է տեղի ունեցել իմ ընկերության թալանը: Չեմ զարմանա,եթե վաղը Մանգասարյանին ազատ արձակեն». Էդոմոնդ Խուդյան

22-01-2013

Սփյուռքահայ ներդրող Էդոմոնդ Խուդյանի աղմկահարույց գործին կրկին անդրադարձել է «Սփյուռքահայ ներդրողների շահերի պաշտպանության նախաձեռնող խումբը»` հայտարարությամբ:

Հայտարարությունն ամբողջությամբ ներկայացնում ենք ստորեւ:

«Հայաստանի իրավապահ համակարգն է օգնել Վլադ Մանգասարյանին թալանել սփյուռքահայ գործարարին Իսկ այսօր, երբ թալանելու բան չի մնացել, ձերբակալել են

«Ես չեմ զարմանա եթե Վլադ Մանգասարյանին վաղն էլ ազատ արձակեն».Էդմոնդ Խուդյան

«Մարդիկ, երբ տոնում էիք Սուրբ ծնունդը, հիվանդանոցում մահացավ Մանուկ Սեմերջյանը». Մհեր Ենոքյան

«Մարդիկ, երբ տոնում էիք Սուրբ ծնունդը, հիվանդանոցում մահացավ Մանուկ Սեմերջյանը». Մհեր Ենոքյան

11-01-2013

Ֆիզիկական ազատության մեջ ապրող մարդիկ, երբ տոնում էիք Նոր տարին և Սուրբ ծնունդը, հիվանդանոցում մահացավ Մանուկ Սեմերջյանը, ով 22 տարեկանում հայտնվել էր բանտում և մոտ 22 տարի անմարդկային տառապանքներ կրել անազատության մեջ: Նա մահապատժի դատապարտվածներից առաջինն էր, ով ողջ էր մնացել և հավատում էր, որ շուտով կվերադառնա կյանք, կապրի բոլորի նման, վերջապես կստեղծի իր ընտանիքը, կունենա սիրած զբաղմունք: Նրան այդ հնարավորությունը չտրվեց, թեպետ օրենքը թույլ է տալիս ցմահ դատապարտվածին 20 տարի պատիժը կրելուց հետո դիմել վաղաժամկետ ազատվելու համար: Ասեմ, որ 3 նախկին մահապարտ ևս արդեն հատել է պատժի կրման 20 տարվա շեմը, սակայն նրանց էլ ազատ չեն արձակում այս կամ այն պատճառաբանություններով:

Մահապատժի դատապարտվածները սովորաբար չեն խոսում բանտային պայմաններից, մեզ առաջին հերթին հուզում է արդարադատության իրականացումն այս երկրում: Սակայն Մանուկի մահը ստիպեց վերհիշել անկախ Հայաստանի առաջին տարիների բանտային տխուր ու դաժան համակարգը: Բայց միանգամից ասեմ՝ ոչ մի օրենք չի նախատեսում այնպիսի պատիժ, որի միջով անցանք մենք՝ զրկված մաքուր օդից, արևի լույսից, մարդավայել կերակրից: Մանուկը դարձավ 17-րդը, ում մահվան վճիռն այս կերպ իրականացվեց: Երբ մահապատիժը պետք է փոխարինվեր այլ պատժատեսակով, Մանուկը պատկերավոր ասում էր, որ դագաղի կափարիչը մի փոքր բացվել է, հույս է արթնացել, լույս երևացել: Սակայն մահապատիժը՝ գնդակահարության միջոցով փոխարինվեց ցմահ բանտարկությամբ, նույնն է թե՝ դանդաղ մահով: Ու Նոր տարվա գիշերը Մանուկի համար քարե դագաղի կափարիչը փակվեց ընդմիշտ:

«Անհապաղ դադարեցնել անմարդկային վերաբերմունքը». ՀՔԱՎ-ն ահազանգում է առողջական խնդիրներով զորակոչվող զորակոչիկների մասին

«Անհապաղ դադարեցնել անմարդկային վերաբերմունքը». ՀՔԱՎ-ն ահազանգում է առողջական խնդիրներով զորակոչվող զորակոչիկների մասին

28-12-2012

Շարունակվում է առողջական խնդիրներով ՀՀ տարբեր բնակավայրերից զորակոչիկների՝ զորակոչի հետ կապված ահազանգերը ծնողների կողմից: Զորակոչվում են քաղաքացիներ, որոնց առողջական խնդիրների վերաբերյալ մտահոգությունները չեն փարատվում բժշկական հանձնաժողովների, զորակոչային հանձնաժողովների կողմից: Ավելին, տպավորություն է ստեղծվում, որ գործում է միայն մեկ մոտեցում՝ ամեն գնով անուշադրության մատնել առողջական վիճակի վերաբերյալ ահազանգերը եւ բոլոր ձեւական հիմնավորումներով երիտասարդներին ճանաչել պիտանի զինծառայությանը եւ ենթարկել զորակոչի: Ակնհայտ է զինկոմիսարիատների կողմից քաղաքացիների նկատմամբ զուտ չոր եւ բյուրոկրատական, անմարդկային վերաբերմունքը, որն ուղեկցվում է սպառնալիքով եւ ճնշումներով:

Գ. Վերանյանը (ծնված 1991 թ-ին) ունի հետեւյալ հիվանդությունները. սրտի ռիթմի խանգարում՝ վերփորոքային ռիթմավարի միգրացիա, սինուսային տախիկարդիա, արտահայտված բրադիկարդիա, եզակի վերփորոքային էքստրասիստոլաներ /2 էքս/օր/ «Տախի-բրադիկարդիայի» համախտանիշ, հիսի խրձի աջ ոտիկի ոչ լրիվ պաշարում, հակում սինուսային տախիկարդիայի նկատմամբ, երկկողմանի երկայնակի հարթաթաթություն I-II աստիճանի, աջ ոտնաթաթի դիստալ հատվածի վարուսային դեֆորմացիա՝քայլքի աննշան աստիճանի խանգարումով: Եւ չնայած ծնողի մտահոգություններին՝ Գ. Վերանյանին զորակոչում են ծառայության եւ ստիպում, որպեսզի ստորագրի զորակոչման մասին ծանուցումը, հակառակ դեպքում կենթարկեն քրեական պատասխանատվության զինծառայությունից խուսափելու համար: Գ. Վերանյանը նախկինում ստացել է տարկետում, սակայն որեւէ բուժում չի ստացել այդ ընթացքում:

Ըստ էության դատավորը. Մհեր Ենոքյան

Ըստ էության դատավորը. Մհեր Ենոքյան

22-12-2012

Երբ պարապում էի Սլավոնական համալսարանի իրավագիտության ֆակուլտետ ընդունվելու համար, ուսումնասիրում էի Հայոց պատմություն: Իմացա, որ դեռ IV-րդ դարից Հայ առաքելական եկեղեցու առաջնորդը` Հայոց կաթողիկոսը, եղել է ՄԵԾ ԴԱՏԱՎՈՐ և հետևել օրենքների արդարացի կատարմանը: Ու եթե ինձ հարցնեն՝ ինչն է այսօր մեր դատարանին պակասում, կասեմ՝ քրիստոնեական մարդասիրությունը: Քրիստոնյաներիս համար հավատի խորհրդանիշ է խաչված Հիսուսը` Աստծո Որդին, ով Աստվածաշնչում նաև Մարդու Որդի անունն ունի: Տեսնես ե՞րբ պետական օրենքները համահունչ կդառնան Աստծո օրենքներին, իսկ դատավորները Մարդուն սիրով կընդունեն ու կճանապարհեն…տեսնես ե՞րբ մեղավորները կներվեն, իսկ անմեղները Աստծո ողորմությանը կարժանանան… Համակարգիչները ծրագրերի միջոցով են խնդիրներ լուծում, դատավորները մարդկային ճակատագրեր են լուծում գրված օրենքներով: Համակարգչի աշխատանքի համար հոսանք է անհրաժեշտ, իսկ դատավորներին` մարդու նկատմամբ Սեր:

Վերնագրի ընտրության հարցում ինձ օգնեց Վերաքննիչ դատարանի դատավոր Արշակ Խաչատրյանը, երբ դեկտեմբերի 3-ին արտագնա /ինչ էլ բառ է/ նիստի էր եկել «Նուբարաշենի» բանտ: Ներկայացնում էի, որ իմ գործում 17 տարի անց նոր երևան եկած հանգամանքներն այդպես էլ չեն դարձել քննության նյութ դատախազության համար, 1996 թ-ին դատախազության քննիչը փաստաթղթերը կազմել է բազմաթիվ խախտումներով՝ հորինվել են իրականում գոյություն չունեցող վկաներ, անգամ դատակենսաբանական փորձաքննությունն է խախտումներով կազմվել: Մինչդեռ դատավոր Խաչատրյանը ընդհատում էր ինձ.

-Ըստ էության խոսեք...

«Հարուցեք քրեական գործ».Լևոն Զուրաբյանն ու Վարդան Օսկանյանը դիմել են դատախազություն

«Հարուցեք քրեական գործ».Լևոն Զուրաբյանն ու Վարդան Օսկանյանը դիմել են դատախազություն

19-12-2012

Օրերս աղմուկի կիզակետում հայտնված ԱԺ պատգամավորներ Լևոն Զուրաբյանն ու Վարդան Օսկանյանը, որոնց խոսակցությունն գաղտնալսվել, ձայնագրվել եւ անհայտ անձի կողմից տեղադրվել էր համացանցում, դիմել են դատախազություն:

Ինչպես տեղեկացնում է ilur.am լրատվական կայքը, Օսկանյանն ու Զուրաբյանը պաշտոնական գրություն են ներկայացրել դատախազություն, ուր մասնավորապես նշված է.

«Առաջարկում ենք մեր զրույցի ապօրինի գաղտնալսման և սոցցանցերում տեղադրման կապակցությամբ հարուցել քրեական գործ՝ հայտնաբերել և պատժել հանցագործության պատասխանատուներին: Կից ներկայացնում ենք այդ կապակցությամբ մեր կողմից արված հայտարարությունները:

ԱԺ պատգամավորներ Լևոն Զուրաբյան, Վարդան Օսկանյան»:

«Մատաղիսի գործով» մեղադրյալներն անմեղ ճանաչվեցին. «Հուզված են բոլորը. տղաները, աջակցողները եւ նույնիսկ դատական կատարածուները»

«Մատաղիսի գործով» մեղադրյալներն անմեղ ճանաչվեցին. «Հուզված են բոլորը. տղաները, աջակցողները եւ նույնիսկ դատական կատարածուները»

19-12-2012

Հաշված րոպեներ առաջ, Շիրակի մարզի ընդհանուր իրավասության դատարանը անմեղ է ճանաչել աղմկահարույց Մատաղիսի գործով մեղադրյալ երեք երիտասարդներին`Ռազմիկ Սարգսյանին, Արայիկ Զալյանին եւ Մուսա Սերոբյանին, ովքեր դատապարտվել էին ցմահ ազատազրկման:

Տեղեկացնենք, որ շուրջ 9 տարի առաջ` 2003 թվականին, ԼՂՀ Մատաղիսի զորամասում Ռոման Եղիազարյանին եւ Հովսեփ Մկրտումյանին սպանելու մեղադրանքով եռնային Ղարաբաղի Մատաղիսի զորամասում իրենց ծառայակիցներ Հովսեփ Մկրտումյանին եւ Ռոման Եղիազարյանին սպանելու մեղադրանքով նույն զորամասի զինծառայողներ Արայիկ Զալյանն Ռազմիկ Սարգսյանը, ու Մուսա Սերոբյանը դատապարտվել էին ցմահ ազատազրկման։

Թեեւ գործից երեք տարի անց զինվորական գործերով վերաքննիչ դատարանը գործը բեկանել եւ ուղարկել էր լրացուցիչ քննության, ազատ էին արձակվել նաեւ ազատազրկման դատապարտված զինծառայողները, այնուամենայնիվ 2008-ի ամռանը նրանք կրկին նույն մեղադրանքով հայտնվել էին ամբաստանյալի աթոռին:

«Առանց հապաղելու արդյունավետ քննություն իրականացնեք». Հյուման Րայթս Ուոչի նամակը Մատաղիսի գործի վերաբերյալ

«Առանց հապաղելու արդյունավետ քննություն իրականացնեք». Հյուման Րայթս Ուոչի նամակը Մատաղիսի գործի վերաբերյալ

19-12-2012

Հյուման Րայթս Ուոչի Եվրոպայի և Կենտրոնական Ասիայի բաժնի փոխտնօրեն Րեյչլ Դենբեր նամակ աղմկահարույց Մատաղիսի գործի առնչությամբ նամակ է հղել ՀՀ գլխավոր դատախազ Աղվան Հովսեփյանին:

Այդ մասին տեղեկացնում է Հելսինկյան Քաղաքացիական Ասամբլեայի Վանաձորի գրասենյակը`հրապարակելով նամակի ոչ պաշտոնական թարգմանությունը:

Նամակն ամբոջությամբ ներկայացնում ենք ստորեւ:

«Հարգելի պրն. Հովսեփյան,

Գրում ենք Ձեզ՝ արտահայտելու մեր խորին մտահոգությունը 2003 թ. իրենց համածառայակիցների սպանության մեջ մեղադրվող Ռազմիկ Սարգսյանի, Մուսա Սերոբյանի և Արայիկ Զալյանի նկատմամբ խոշտանգումների, դաժան և անմարդկային վերաբերմունքի վերաբերյալ պնդումների առնչությամբ արդյունավետ քննության չիրականացնելու վերաբերյալ: Հորդորում ենք Ձեզ, որ առանց հապաղելու արդյունավետ քննություն իրականացնեք խոշտանգումների և վատ վերաբերմունքի վերաբերյալ արժանահավատ պնդումների առնչությամբ: Հաշվի առնելով, որ բռնությունների ներքո արված խոստովանությունը դեռևս մեղադրյալների նկատմամբ առաջադրված մեղադրանքի հիմնական ապացույցն է, մենք նաև կոչ ենք անում դատախազությանը կասեցնել մեղադրանքը, քանի դեռ այդ քննությունը չի իրականացվել:

«Հայտնում եմ իմ խորին հիասթափությունն ու մտահոգությունը». չնայած ամեն ինչին, ՄԻՊ-ը կշարունակի «ակտիվ, մարդակենտրոն և հանրօգուտ ծառայությունը»

«Հայտնում եմ իմ խորին հիասթափությունն ու մտահոգությունը». չնայած ամեն ինչին, ՄԻՊ-ը կշարունակի «ակտիվ, մարդակենտրոն և հանրօգուտ ծառայությունը»

07-12-2012

ՀՀ Մարդու իրավունքների պաշտպան Կարեն Անդրեասյանը հիասթափություն է հայտնել, որ Կառավարությունն ընդունած բյուջեում չի ներառել ՄԻՊ աշխատակազմի համար առաջարկված 11 մլն դրամի համելումը: Այս կապակցությամբ, Անդրեասյանը գրառում է կատարել` նշելով, որ չնայած կառավարության նման վերաբերմունքին շարունակելու են աշխատել:

Գրառումն ամբողջությամբ ներկայացնում ենք ստորեւ:

«Երեկ ընդունվեց 2013 թվականի բյուջեն, որում Կառավարությունն այդպես էլ չներառեց Մարդու իրավունքների պաշտպանի աշխատակազմի համար առաջարկված 11 մլն դրամի հավելումը, որն անհրաժեշտ էր փակ հաստատություններում խոշտանգումների և բռնությունների կանխարգելման համար։ Այդ սիմվոլիկ հավելումը ծայրահեղ անհրաժեշտ էր թե´ միջազգային պարտավորությունների, և թե´ մեր մարդկանց առջև պարտավորությունների կատարման համար։

Ամուսինը կնոջը սպանել է բակում, որ տան ներսը «չմխտռվի». Յուրիկ Բաբայանին ազատազրկեցին 10 տարով

Ամուսինը կնոջը սպանել է բակում, որ տան ներսը «չմխտռվի». Յուրիկ Բաբայանին ազատազրկեցին 10 տարով

28-11-2012

«Հասարակություն առանց բռնության» հասարակական կազմակերպության կողմից ստեղծված Արագ Արձագանքման Խմբի շրջանակներում ձեզ ենք ներկայացնում Աղավնաձոր գյուղում տեղի ունեցած ընտանեկան բռնության դեպքի մասին նոր մանրամասներ: Արագ Արձագանքման Խմբի առաքելությունն է վեր հանել հասարակությունում ընտանեկան բռնության դեպքերը, հրապարակային հնչեղություն տալ դրանց և հետամուտ լինել դեպքերի թափանցիկ և արդար քննությանը:

Կնոջը սպանած Աղավնաձոր գյուղի բնակիչ Յուրիկ Բաբայանին, Արարատի եւ Վայոց ձորի մարզերի ընդհանուր իրավասության առաջին ատյանի դատարանը նախագահությամբ դատավոր Ռ. Պապոյանի, մեղավոր ճանաչեց ՀՀ քրեական օրենսգրքի 104-րդ հոդվածի 1-ին մասով նախատեսված հանցագործության կատարման մեջ և նրա նկատմամբ նշանակեց պատիժ ազատազրկման ձևով 10 տարի ժամկետով: Արագ Արձագանքման Խումբը հիշեցնում է, որ դեպքը տեղի էր ունեցել հուլիսի 3-ին, առավոտյան ժամը 9-ին, Բաբայանների սեփական տան բակում: Ամուսինը սկզբում ծեծել էր կնոջը, այնուհետեւ` սպանել: Յուրիկ Բաբայանն արարքը կատարելիս եղել էր ոգելից խմիչքի ազդեցության տակ, սակայն դատաբժշկական փորձաքննությունն աֆեկտի վիճակ չէր արձանագրել եւ Բաբայանին անմեղսունակ չէր ճանաչել: Բաբայանների հարեւանները դատաքննության ընթացքում վկայել էին ամուսինների տարիներով ձգվող անհաշտության, գրեթե ամեն օր տեղի ունեցող վիճաբանությունների մասին: Չնայած այս ամենին, ամուսինները բաժանվելու, միմյանցից անջատ ապրելու քայլին երբեւէ չէին գնացել:

Չվերջացող նախաքննություն . ԱՄՆ դեսպանը կապ է հաստատել սփյուռքահայ գործարարի հետ և տեղեկացել թալանի մանրամասներին

Չվերջացող նախաքննություն . ԱՄՆ դեսպանը կապ է հաստատել սփյուռքահայ գործարարի հետ և տեղեկացել թալանի մանրամասներին

15-11-2012

ՀՀ-ում ԱՄՆ դեսպան Ջոն Հեֆֆերնը շարունակում է հետևողականություն ցուցաբերել Հայաստանում միլիոնավոր դալարների կորուստներ կրած ամերիկահայ գործարար Էդմոնդ Խուդյանի գործի ընթացքին: Դեսպան Հեֆֆերնը նախորդ շաբաթ հեռախոսազրույց է ունեցել սփյուռքահայ գործարարի հետ, որի ընթացքում դեսպանատան իրավաբանները և անձամբ դեսպանը Էդմոնդ Խուդյանից տեղեկացել են գործի վերաբերյալ բոլոր մանրամասներին և խոստացել շարունակել հետողականություն ցուցաբերել կոռուպցիոն դրսևերումներով լի այս գործին: Այն, որ դեսպան Հեֆերնը խոսել է սփյուռքահայ գործարարի հետ, հաստատում է նաև ՀՀ-ում ԱՄՆ դեսպանատունը` ընդգծելով, որ դեսպան Հեֆերնի համար մտահոգիչ է ցանկացած մեղադրանք կապված անօրինական ֆինանսական գործառնությունների հետ, որից տուժում են ամերիկյան քաղաքացիները:

Սփյուռքահայ գործարարին արդեն երկրորդ անգամ տուժող չճանաչեցին. Փորձաքննություն` նախաքննությունից երկու տարի անց

Սփյուռքահայ գործարարին արդեն երկրորդ անգամ տուժող չճանաչեցին. Փորձաքննություն` նախաքննությունից երկու տարի անց

09-11-2012

Հայրենիքում միլիոնավոր դոլարներ կորցնելուց հետո մինչ օրս այդպես էլ տուժող չճանաչված ամերիկահայ գործարար Էդմոնդ Խուդյանը երեկ ՀՀ վերաքննիչ քրեական դատարանում էլ մերժում ստացավ, սակայն այս անգամ գոնե մի տարբերությամբ: Դատական նիստին վերջապես ներկա գտնված գործը վերահսկող դատախազ Լեռնիկ Հովհաննիսյանը գոնե որոշ պարզաբանումներ տվեց դեռ 2 տարի առաջ սկսված և մինչ օրս չավարտվող նախաքննության ընթացքի հետ կապված: Դրանք իհարկե պարզաբանում անվանելն այնքան էլ ճիշտ չէ, քանի որ դատախազի խոսքերը ոչնչով չտարբերվեցին մոտ 9 ամիս առաջ նույն դատարանում նրա կողմից ասված խոսքերից, բայց գոնե տեղեկանալը, որ կրկին ինչ-որ համալիր փորձաքննություն է նշանակված, ոչինչ չասելու համեմատ էլի ինչ-որ նորություն է:

Վերաքննիչ քրեական դատարանում սփյուռքահայ գործարար Էդմոնդ Խուդյանի ներկայացուցիչներ Նիկոլայ Բաղդասարյանն ու Լեռնիկ Հովհաննիսյանը բողոքարկել էին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի կողմից կայացված վճիռը և պահանջում էին գործարարին տուժող ճանաչել:

Հայրենի խարդախների դեմ անզոր սփյուռքահայ գործարարը ստիպված կլինի միջոցներ ձեռնարկել` դատը ԱՄՆ տեղափոխելու ուղղությամբ

Հայրենի խարդախների դեմ անզոր սփյուռքահայ գործարարը ստիպված կլինի միջոցներ ձեռնարկել` դատը ԱՄՆ տեղափոխելու ուղղությամբ

27-10-2012

Ամերիկահայ Էդմոնդ Խուդյանը դիմել է Հայաստանում ԱՄՆ դեսպան Ջոն Հեֆֆերնին` իր գործին առընչվող դատական գործընթացը Հայաստանից ԱՄՆ տեղափոխելու եւ այլ հարցերի վերաբերյալ: Խուդոյանի նամակը ներկայացնում ենք ստորեւ, այն մեզ է տրամադրել Սփյուռքահայ ներդրողների շահերի պաշտպանության նախաձեռնող խումբը:

«Հարգարժան Պր. Ջոն Ա. Հեֆերնին

ՀՀ-ում ԱՄՆ Դեսպան

Հարգարժան Պր. Դեսպան,

Իմ Անունը Էդմոնդ Խուդյան է, ես ԱՄՆ քաղաքացի եմ, Արին Կապիտալ կորպորացիայի նախագահը Գլենդել, Կալիֆորնիա, ԱՄն-ում: Դեռևս 2010թ. նոյեմբերին դիմել եմ Պետական եկամուտների կոմիտեի նախագահ պարոն Գ.Խաչատրյանին և հայտնել Հայաստանում բացառապես իմ ներդրումների հիման վրա հիմնադրված և գործունեություն իրականացնող «Արին կապիտալ» ներդրումային ընկերությանը պատկանող Մաշտոցի 33 շենքի տարածքների վաճառքի հարցում տեղի ունեցող հանցագործությունների մասին, որոնք զուգորդվում են հարկեր չվճարելով:

Մինչ Սփյուռքահայ ներդրողը բողոքում է, նրանից խլված շենքում շարունակում են բնակարաններ վաճառել

Մինչ Սփյուռքահայ ներդրողը բողոքում է, նրանից խլված շենքում շարունակում են բնակարաններ վաճառել

23-10-2012

Կրկին հայտարարությամբ հանդես է եկել «Սփյուռքահայ ներդրողների շահերի պաշտպանության նախաձեռնությունե-ը, որը ստորեւ ներկայացնում ենք ամբողջությամբ:

«Քանի դեռ ամերիկահայ գործարար Էդմոնդ Խուդյանը ամենատարբեր պետական ատյաններին դիմումներ է գրում իր ներդրումների հաշվին հիմնադրված «Արին կապիտալ» ներդրումային ՍՊԸ-ի կողմից պետությանը չվճարված մեկ միլիոն հինգ հարյուր հազար դոլարի հարկերի մասին, մինչ պահանջում է հարուցված քրեական գործի վրա պետական վերահսկողություն և արդեն տեղի ունեցած ապօրինությունների բացահայտում, Մաշտոցի վրա գտնվող, սփյուռքահայ ներդրողի միջոցներով կառուցված շենքում շարունակվում է բնակարանների վաճառքը:

Այն շենքը, որի բնակարանների իրացումից հարկերը պետք է վճարվեին, այսօր լցված է ամենատարբեր պաշտոնյաներով, որոնք, իհարկե, իրենց բնակարանները գրանցել են, ոչ թե սեփական` այլ ազգականների, կանանց, մորաքրոջ տղաների և անգամ վարորդների անուններով: Ամերիկահայ գործարարը բազմիցս տեղեկացրել է, որ այս անձանց մի մասն այդ բնակարանները ստացել է հենց այնպես, այս գործով հայտնի Վլադ Մանգասարյանի ակտիվ թալանչիական գործունեության արդյունքում, մյուս մասն էլ` չնչին գներով: Այնպես որ սփյուռքահայ գործարարը միայն այս կերպ է կարողանում պարզաբանել, թե ինչու են մինչ օրս ՊԵԿ-ը, դատախազությունը և դատարանները ամեն ինչ անում, որպեսզի քննություն չկատարվի: Սփյուռքահայ գործարարը պնդում է, որ այս ամենն արվում է մի միտումով` որպեսզի չբացահայտվեն այն անձանց անունները, որոնք մի քանի սովորական թալանչիների թիկունքում տիրացել են հսկայական գումարների:

Համատարած խուզարկություններ Վանաձորի «անբարեհույս» քաղաքացիների բնակարաններում. իրավապաշտպաններն ահազանգում են

Համատարած խուզարկություններ Վանաձորի «անբարեհույս» քաղաքացիների բնակարաններում. իրավապաշտպաններն ահազանգում են

05-10-2012

Վանաձորում տիրող տարօրինակ իրավիճակի մասին բարձրաձայնել է Հելսինկյան Քաղաքացիական Ասամբլեայի Վանաձորի գրասենյակը` ՀՔԱՎ-ը` խոսելով վերջին օրերին քաղաքում սկսված «համատարած» խուզարկությունների մասին:

Ըստ գրասենյակի` «ստացած հավաստի տեղեկությունների համաձայն՝ 2012 թ. սեպտեմբերի 25-ին և 26-ին համատարած խուզարկություններ են իրականացվել Վանաձոր քաղաքի բնակիչների բնակարաններում»:

«Հերթական անգամ ոստիկանությունը կիրառում է «խուզարկություն օպերացիան» իր տեսակետից «անբարեհույս» քաղաքացիներին հետապնդելու, վախեցնելու, ահաբեկելու նպատակով: Ե’վ դատարանի, և’ ոստիկանության կողմից նման գործելաոճը չեն կարող նպաստել իրենց նկատմամբ քաղաքացիների վստահության բարձրացմանը: Ավելին՝ հանգեցնում են իրավական համակարգի արժեզրկմանը»,-նշված է ՀՔԱՎ կողմից տարածած հաղորդագրության մեջ:

Առանձնապես խոշոր չափերի դրամական միջոցների յուրացում. Օսկանյանի գործով` դատախազի միջնորդագիրը

Առանձնապես խոշոր չափերի դրամական միջոցների յուրացում. Օսկանյանի գործով` դատախազի միջնորդագիրը

01-10-2012

ՀՀ Ազգային ժողովի պատգամավոր Վարդան Մինասի Օսկանյանին որպես մեղադրյալ ներգրավելուհամաձայնություն տալու մասին

ՄԻՋՆՈՐԴԱԳԻՐ

Հանցավոր ճանապարհով ստացված առանձնապես խոշոր չափերի դրամական միջոցներն օրինականացնելու՝ ՀՀ քրեական օրենսգրքի 190-րդ հոդվածի 3-րդ մասի 1-ին կետով նախատեսված հանրորեն վտանգավոր արարքի հատկանիշներով.

ՀՀ կառավարությանն առընթեր ազգային անվտանգության ծառայության քննչական վարչության կողմից 2012թ. մայիսի 25-ին հարուցված քրեական գործի նախաքննությամբ բավարար ապացույցներ են ձեռք բերվել փաստելու, որ «Սիվիլիթաս» հիմնադրամի հիմնադիր և հոգաբարձուների խորհրդի նախագահ Վարդան Սինասի Օսկանյանը յուրացրել է բարեգործական նպատակներով իր միջոցով հիմնադրամին տրամադրելու նպատակով իրեն վստահված առանձնապես խոշոր չափերի դրամական միջոցները, այնուհետև տարաբնույթ գործողություններ կատարել հանցավոր ճանապարհով ձեռք բերված այդ միջոցներն օրինականացնելու ուղղությամբ, դրանով իսկ կատարելով ծանր հանցագործություններ՝ նախատեսված ՀՀ քրեական օրենսգրքի 179-րդ հոդվածի 3-րդ մասի 1-ին կետով և 190-րդ հոդվածի 3-րդ մասի 1-ին կետով:

Ադրբեջանցու սպանության համար ցմահ դատապարտված հայ ազատամարտիկի, բանտերի ու բարեփոխումների մասին. Մհեր Ենոքյան

Ադրբեջանցու սպանության համար ցմահ դատապարտված հայ ազատամարտիկի, բանտերի ու բարեփոխումների մասին. Մհեր Ենոքյան

09-09-2012

Ստորեւ ներկայացնում ենք ցմահ դատապարտյալ Մհեր Ենոքյանի նոր հոդվածը: Մհեր Ենոքյանին շատերը արդեն տեւական ժամանակ է ճանաչում են ի շնորհիվ «Նուբարաշենի կլոր գերեզմանոցից» գրած նրա անկեղծ, հուզիչ նամակների, իրավաշտպանների ու հասարակական գործիչների եւ հասարակ քաղաքացիների ստացած աջակցության:

«Հոդվածս բոլորովին այլ կերպ պիտի սկսեի, պիտի գրեի իմ գործի Չվերաբացման մասին: Բայց առաջնահերթությունն այսօր այլ է: Սաֆարովի հայրենիք վերադարձը ցնցեց մեզ բոլորիս վերևից ներքև կամ հակառակը` ինչպես կուզեք: Հիմա բոլորն են մտածում, գրում ու խոսում այդ մասին: Ու հարցը բոլորովին համեմատության մեջ չէ, չեմ էլ ցանկանում եզրեր գտնել: Իրականացվեց ոչ թե Արդարադատություն, այլ քաղաքականություն: Սա հնչած տեսակետներից մեկն է, համամիտ եմ: Կուզեի մերոնք էլ մեկ-մեկ գոնե քաղաքականություն իրականացնեին, երբ խոսքն իրենց քաղաքացուն է վերաբերում: Մեր բանտերը լի են քավության նոխազներով, չափազանցված ու սխալ պատիժ կրողներով, զինվորներով, ազատամարտիկներով: