Բանտում մնացել է մեկ քաղբանտարկյալ

Բանտում մնացել է մեկ քաղբանտարկյալ

10-06-2011

Այսօր` հունիսի ինի առավոտյան ժամը 10.30-ին «Վարդաշեն» ՔԿՀ-ից ազատ է արձակվել ընդդիմադիր Սարգիս Հացպանյանը:

ՔԿՀ-ի դարպասների մոտ Հացպանյանին դիմավորել են ՀՀ ԱԺ նախկին պատգամավոր, նախկին քաղբանտարկյալ Սասուն Միքայելյանը, Պահպանողական կուսակցության նախագահ Միքայել Հայրապետյանը, Հացպանյանի ընտանիքի անդամները, ընկերները:

Այսօր լրացել է նրա պատժաչափը կրելու վերջնաժամկետը:

Հիշեցնենք, որ նա 2009թ. ապրիլի 9-ին սուտ մատնության մեղադրանքով դատապարտվել էր 3.5 տարվա ազատազրկման:

Հացպանյանի ազատ արձակվելուց հետո բանտում է մնում մեկ քաղբանտարկյալ` լրտեսության համար մեղադրվող Մուրադ Բոջոլյանը, որի պատժաժամկետը շուտով լրանում է եւ նա առաջիկա օրերին ազատ կարձակվի:

© Medialab.am

Ազատ է արձակվել 419 դատապարտյալ

Ազատ է արձակվել 419 դատապարտյալ

09-06-2011

Չնայած Արդարադատության նախարար Հրայր Թովմասյանը նախապես հայտարարել էր, որ ԱԺ-ի կողմից ընդունված համաներմամբ պետք է ազատ արձակվի մոտ 400 դատապարտյալ, սակայն դատապարտյալների ազատ արձակման գործընթացը դեռեւս շարունակվում է:

Մասնավորապես, հունիսի 7-ի դրությամբ արդեն` համաներմամբ ազատ արձակված բանտարկյալների թիվը հասել է 419-ի, կրճատվել է 25 դատապարտյալի պատժաչափը:

Այդ մասին նշվում է Հայաստանի արդարադատության ՔԿՎ լրատվական ծառայության կողմից տարածված հաղորդագրության մեջ:

Հաղորդագրության համաձայն, համաներմամբ դատապարտյալների ազատ արձակման, ինչպես նաեւ պատժաչափը կրճատելու գործընթացը շարունակվում է:

© Medialab.am

ՀՀ պաշտպանության նախարարը մեկնել է Բրյուսել

ՀՀ պաշտպանության նախարարը մեկնել է Բրյուսել

09-06-2011

ՀՀ պաշտպանության նախարար Սեյրան Օհանյանի գլխավորած պատվիրակությունը մեկնել է Բրյուսել: Այդ մասին տեղեկացնում է նախարարության պաշտոնական հաղորդագրությունը:

Նախարարը կմասնակցի Աֆղանստանում անվտանգության աջակցության միջազգային ուժերի գործողություններին մասնակցող պետությունների ձևաչափով հունիսի 9-ին կայանալիք ՆԱՏՕ-ի անդամ և գործընկեր երկրների պաշտպանության նախարարների նիստին:

© Medialab.am

Հայաստանում ԱՄՆ դեսպան. «Չկա անհասանելի նպատակ, չկա անհաղթահարելի մարտահրավեր»

Հայաստանում ԱՄՆ դեսպան. «Չկա անհասանելի նպատակ, չկա անհաղթահարելի մարտահրավեր»

09-06-2011

«Ձեզանից շատերը գիտեն, որ ես շուտով մեկնում եմ Հայաստանից, բայց Հայաստանը կմնա իմ սրտում: Կուզենայի մնալ այստեղ ու երկրի շարունակական առաջընթացի ականատեսը լինեի, հատկապես առաջիկա երկու շրջադարձային տարիներին»,- հունիսի 7-ին ԱՄՆ դեսպանատանը կայացած ԱՄՆ անկախությանը նվիրված միջոցառման ժամանակ հայտարարել է Հայաստանում ԱՄՆ դեսպան Մարի Յովանովիչը:

Այդ հանդիսավոր միջոցառմամբ նաեւ նշվել է դեսպան Յովանովիչի առաքելության ավարտը, ով վերադառնում է Վաշինգտոն եւ զբաղեցնելու է ԱՄՆ պետքարտուղարության Հյուսիսային ու Կենտրոնական Եվրոպայի հարցերով պետքարտուղարի փոխտեղակալի պաշտոնը:

Արտահերթ ընտրությունների համար իրավական ճանապարհ չկա՞

Արտահերթ ընտրությունների համար իրավական ճանապարհ չկա՞

08-06-2011

ՀՀ Արդարադատության նախարար, մասնագիտությամբ իրավաբան-սահմանադրագետ Հրայր Թովմասյանը այսօր Սիվիլիթաս հիմնադրամում կազմակերպված քննարկման ժամանակ հայտարարել է, թե «արտահերթ խորհրդարանական ընտրություններ անցկացնելու իրավական ճանապարհ այսօր գոյություն չունի»:

Թովմասյանն ասել է, թե այսօր Հայաստանի խորհրդարանի լուծարման բացարձակ իրավունք այլեւս գոյություն չունի: Ըստ նրա՝ եթե նախկինում նախագահը կարող էր անգամ քաղաքական նկատառումներով լուծարել խորհրդարանը, ապա հիմա՝ 2005-ին ընդունված Սահմանադրությամբ, հստակ սահմանված են այն հիմքերը, երբ կարող է լուծարվել խորհրդարանը:

Թովմասյանն ասել է, թե այսօր Սահմանադրությամբ արտահերթ ընտրությունների անցկացման համար սահմանված հիմքերից որեւէ մեկը գոյություն չունի: «Ուստի խորհուրդ կտայի մինչեւ պահանջ դնելը նայել, թե որքանով են դրանք Սահմանադրությունից բխում»,- ասել է Թովմասյանը:

© Medialab.am

Համանախագահները Ղարաբաղ են գնացել` Ադրբեջանից

Համանախագահները Ղարաբաղ են գնացել` Ադրբեջանից

08-06-2011

ԵԱՀԿ Մինսկի խմբի համանախագահները այսօր` հունիսի 7-ին, մեկնել են Լեռնային Ղարաբաղ: Համանախագահները, սակայն, Ղարաբաղ են գնացել ոչ թե Հայաստանից, ինչպես անում են սովորաբար, այլ` Ադրբեջանի կողմից` հատելով շփման գծի նախապես ականազերծված տարածքը:

Ադրբեջանում համանախագահները հանդիպումներ են ունեցել Ադրբեջանի նախագահի եւ ԱԳ նախարարի հետ:

Ղարաբաղ մեկնած համանախագահները նաեւ մասնակցել են Աղդամ-Բարդա ուղղությամբ անցկացման շփման գծի դիտարկմանը, որի ժամանակ, ըստ այդմ, «շփման գծի ռեժիմի խախտումներ չեն արձանագրվել»:

ԱԳՆ մեդալ` ԱՄՆ դեսպանին

ԱԳՆ մեդալ` ԱՄՆ դեսպանին

08-06-2011

Հայաստանի ԱԳ նախարար Էդվարդ Նալբանդյանն այսօր` հունիսի 7-ին ընդունել է ԱՄՆ դեսպան Մարի Յովանովիչին՝ Հայաստանում դիվանագիտական առաքելության ավարտի կապակցությամբ:

Ինչպես տեղեկացնում են ՀՀ ԱԳՆ-ից, հանդիպմա ընթացքում Էդվարդ Նալբանդյանը բարձր է գնահատել դեսպան Յովանովիչի անձնական ավանդը Հայաստանի եւ Միացյալ Նահանգերի միջեւ հաստատված բարեկամական հարաբերությունների ամրապնդման գործում:

Դեսպան Յովանովիչը նշել է, որ իր համար հաճելի էր աշխատել Հայաստանում եւ իր աշխատանքի ընթացքում ցուցաբերված աջակցության եւ արդյունավետ համագործակցության համար:

Նախարար Նալբանդյանը դեսպան Յովանովիչին մաղթել է հետագա հաջողություններ իր դիվանագիտական գործունեության մեջ եւ նրան պարգեւատրել ԱԳՆ հուշամեդալով:

© Medialab.am

Կարեն Կարապետյան. «Արտահերթ ընտրությունների շուրջ բանակցելու ՀԱԿ առաջարկը` անընդունելի եւ ինքնանպատակ է»

Կարեն Կարապետյան. «Արտահերթ ընտրությունների շուրջ բանակցելու ՀԱԿ առաջարկը` անընդունելի եւ ինքնանպատակ է»

08-06-2011

Սերժ Սարգսյանի աշխատակազմի ղեկավար Կարեն Կարապետյանը այսօր «Նովոստի Արմենիա» գործակալության հետ զրույցում անդրադառնալով իշխանություն-ընդդիմություն երկխոսությանը` հայտարարել է, թե անընդունելի եւ ինքնանպատակ է համարում պատվիրակություն ձևավորելու եւ արտահերթ ընտրությունների շուրջ բանակցելու Հայ ազգային կոնգրեսի առաջարկը։

«Դժվար չէ նկատել, որ այդ երկխոսությունը վաղուց է սկսվել, բավականին արդյունավետ ընթանում է և մի շարք դրական փոփոխությունների արդեն իսկ հանգեցրել է: Դա պարզապես այնքան ակնհայտ է, որ երկխոսություն սկսելու մասին խոսելն առնվազն տարակուսելի է։ Ինչ վերաբերում է պատվիրակություն ձևավորելու եւ արտահերթ ընտրությունների շուրջ բանակցելու առաջարկին, ապա այստեղ թե՛ առաջարկվող ձևաչափը, թե՛ դրվող հարցը, մեծ հաշվով, ուղղակի ինքնանպատակ են եւ ինչպես դժվար չէր կռահել, անընդունելի»,- ասել է Կարապետյանը:

Հարուցվել է քրեական գործ` Նուբարաշենի բնակիչների` խմելու ջրից թունավորվելու դեպքի առթիվ

Հարուցվել է քրեական գործ` Նուբարաշենի բնակիչների` խմելու ջրից թունավորվելու դեպքի առթիվ

07-06-2011

Երեւան քաղաքի Նուբարաշեն թաղամասի բնակիչների` խմելու ջրից թունավորվելու դեպքի առթիվ հարուցվել է քրեական գործ` ՀՀ քրեական օրենսգրքի 279-րդ հոդվածի հատկանիշներով: Այդ մասին տեղեկացնում է ՀՀ դատախազությունը:

ՀՀ Երևան քաղաքի Էրեբունի Նուբարաշեն վարչական շրջանների դատախազի ցուցումով` Հունիսի 4-ին` ժամը 12:00-ին, «Նորքի ինֆեկցիոն» հիվանդանոցից ստացված ահազանգի հիման վրա ՀՀ ոստիկանության գլխավոր քննչական վարչության Էրեբունու քննչական բաժնում հարուցված քրեական գործով պարզվել է, որ 2011թ. հունիսի 3-ին` ժամը 19:00-ից մինչեւ 2011թ. հունիսի 4-ի 11:00-ն ընկած ժամանակահատվածում «աղիքային ինֆեկցիա» ախտորոշմամբ «Նորքի ինֆեկցիոն» հիվանդանոց են տեղափոխվել Երեւան քաղաքի Նուբարաշեն 11 փողոցի թվով 25 բնակիչներ:

Էդուարդ Շարմազանով. «Արտահերթ ընտրությունների առաջարկը որքան անհիմն է, այնքան էլ վնասակար է»

Էդուարդ Շարմազանով. «Արտահերթ ընտրությունների առաջարկը որքան անհիմն է, այնքան էլ վնասակար է»

07-06-2011

Այն բանից հետո, ինչ ընդդիմադիր Հայ ազգային կոնգրեսը հայտարարեց երկխոսության համար կազմված պատվիրակության պատրաստ լինելու մասին, եւ իշխող ՀՀԿ մամլո խոսնակ Էդուարդ Շարմազանովը ԶԼՄ-ներին տարատեսակ մեկնաբանություններ տվեց, այսօր` հունիս վեցին վերջինս հանդես եկավ գրավոր հայտարարությամբ:

Շեշտելով, թե իրենք միշտ ողջունել են ու շարունակում են ողջունել առկա խնդիրները քննարկելու և լուծումներ գտնելու ճանապարհով առաջ շարժվելու գործելաոճը` Շամազանովը նշել է, թե «անշուշտ գոհացուցիչ է, որ արդեն բավական ժամանակ է երկխոսություն է ընթանում նաեւ արտախորհրդարանական ընդդիմության հետ, ընթանում է բաց, հրապարակավ, բոլորի աչքի առջեւ, ինչի դրական արդյունքներն էլ ակնհայտ են»:

«Եվ այսօր ունենք մի իրավիճակ, երբ մեր երկրում առկա ամենատարբեր խնդիրների լուծման գործընթացում լայնորեն կարող են հաշվի առնվել նաև արտախորհրդարանական ընդդիմության տեսակետներն ու առաջարկները: Կարծում եմ, որ նման դրական զարգացումներն ու ստեղծված միջավայրը պետք է կարողանանք պահպանել, ինչի համար անհրաժեշտ են համատեղ ջանքեր, բոլոր կողմերի ցանկություն: ...Արտահերթ ընտրությունների առաջարկը որքան անհիմն է, այնքան էլ վնասակար` սկսված դրական զարգացումներն արգելակելու տեսանկյունից»,- գրել է Շարմազանովը:

Համաներում. բոլորն ազա՞տ են արձակվել

Համաներում. բոլորն ազա՞տ են արձակվել

07-06-2011

Հայաստանի անկախության հռչակման 20-րդ տարեդարձի կապակցությամբ հայտարարված համաներմամբ, հունիսի 5-ի դրությամբ, ՀՀ արդարադատության նախարարության քրեակատարողական հիմնարկներից ազատ է արձակվել 400 դատապարտյալ, կրճատվել է 7 դատապարտյալի պատժաչափը:

Հիշեցնենք, որ մինչեւ համաներումը հայտարարելը, Արդարադատության նախարար Հրայր Թովմասյանը հայտարարել էր, թե համաներման արդյունքում «պատժից ամբողջությամբ կազատվեն 400 մարդ, եւ այն անձինք, որոնց վրա կտարածվի համաներումը, այսինքն` պատժի չկրած մասը կկրճատվի, նրանք եւս կկազմեն մոտ 400»:

Արդարադատության նախարարության քրեակատարողական վարչության հասարակայնության հետ կապերի բաժանմունքի պետ Արսեն Բաբայանի հաղորդագրության համաձայն` «Նուբարաշեն» քրեակտարողական հիմնարկից (ՔԿՀ) ազատ է արձակվել 43 դատապարտյալ, «Էրեբունի» ՔԿՀ-ից` 91, «Վարդաշեն» ՔԿՀ-ից ազատ է արձակվել 30 դատապարտյալ եւ կրճատվել է 1-ի պատժաչափը, «Դատապարտյալների հիվանդանոց» ՔԿՀ-ից ազատ է արձակվել 24 դատապարտյալ եւ կրճատվել է 3-ի պատժաչափը:

Ահմեդինեժադը չեկավ

Ահմեդինեժադը չեկավ

07-06-2011

Իրանի իսլամական հանրապետության նախագահ Մահմուդ Ահմեդինեժադը այսօր` հունիսի վեցին Հայաստան չի ժամանելու. ԻԻՀ նախագահի այցը անսպասելիորեն հետաձգվել է:

Այդ կապակցությամբ Սերժ Սարգսյանի մամլո գրասենյակից տարածված հաղորդագրության մեջ ասվում է. «Կողմերի փոխադարձ համաձայնությամբ Իրանի Իսլամական Հանրապետության նախագահ Մահմուդ Ահմադինեժադի այցը Հայաստան հետաձգվել է: Այն կիրականացվի առավել հարմար ժամկետներում»:

Այցի հետաձգման կոնկրետ պատճառների մասին ոչ մի բացատրություն չի տրվում:

Հիշեցնենք, որ ԻԻՀ նախագահի այցը Հայաստան պետք է մեկնարկեր այսօր` հունիսի վեցին:

Մահմուդ Ահմեդինեժադը վերջին անգամ Հայաստան է եղել նախկին նախագահ Ռոբերտ Քոչարյանի պաշտոնավարության ժամանակ:

© Medialab.am

 Ընդդիմությունը դեռ չի մեկնաբանում իշխանության արձագանքը

Ընդդիմությունը դեռ չի մեկնաբանում իշխանության արձագանքը

04-06-2011

Ընդդիմությունը զերծ է մնում մեկնաբանել իշխանությունների այն պնդումները, թե ընդդիմության հետ արտահերթ ընտրությունների վերաբերյալ չի երկխոսելու:

«Ես ոչ մեկին չեմ կարող արգելել իրացնելու ազատ խոսելու իր սահմանադրական իրավունքը»,- «Մեդիալաբի» հետ զրույցում նշեց ընդդիմադիր Հայ ազգային կոնգրեսի մամլո խոսնակ Արման Մուսինյանը:

Հիշեցնենք, որ «Մեդիալաբի» հետ զրույցում Շարմազանովը ասել էր, որ իշխանություննեևը ՀԱԿ-ի հետ չի քննարկելու արտահերթ ընտրությունների հարցը:

«Դոկտոր Մահ»-ը մահացել է

«Դոկտոր Մահ»-ը մահացել է

04-06-2011

Հունիսի 3-ին ԱՄՆ Միչիգան նահանգի Դեթրոյթ քաղաքի արվարձաններից մեկի William Beaumont հիվանդանոցում մահացել է հայտնի նախկին բժիշկ Ջեք Գեւորգյանը` հայտնի որպես «Դոկտոր Մահ»:

Ինչպես հաղորդում է ClickOnDetroit.сom կայքը` բժիշկների տվյալներով՝ Գևորգյանի մահվան պատճառը եղել է թոքային անոթների տրոմբոզը։ Մայիսի կեսին 83-ամյա «Դոկտոր Մահը» հոսպիտալացվել էր երիկամների բորբոքմամբ։

Հիշեցնենք, որ Գեւորգյանն իր «Դոկտոր Մահ» անվանումը ստացել է այն բանից հետո, երբ օգնել է հատուկ ներարկումների միջոցով` էֆտանազիայի միջոցով կյանքից հեռանալ 130 ծանր հիվանդների:

© Medialab.am

Եվրոպան ահուսարսափի մեջ պահող աղիքային վարակի դեպքեր Հայաստանում չեն արձանագրվել

Եվրոպան ահուսարսափի մեջ պահող աղիքային վարակի դեպքեր Հայաստանում չեն արձանագրվել

04-06-2011

Թեեւ Հայաստանում վերջին շաբաթներին Եվրոպան ահ ու սարսափի մեջ պահող ախտածին աղիքային ցուպիկով հարուցված սուր աղիքային դեպքեր չեն արձանագրվել, այնուամենայնիվ ՀՀ Առողջապահության նախարարությունը կոչ է անում զգոն լինել:

Ըստ Առողջապահության համաշխարհային կազմակերպության տվյալների` վերջին օրերին Գերմանիայում արձանագրվել է նմանատիպ սուր աղիքային վարակի 1534 դեպք, որից` 15-ը մահվան ելքով:

Արձանագրված դեպքերից 470-ը եղել է հեմոռագիկ ուռեմիկ համախտանիշով, որից 9-ը` մահվան ելքով: Հիվանդության դեպքերի 86%-ը արձանագրվել է 20 և բարձր տարիքով անձանց մոտ: Սույն աղիքային վարակն ընթանում է որովայնային ցավի և արյունային լուծի երևույթներով, իսկ հեմոռագիկ ուռեմիկ համախտանիշը` սուր երիկամային անբավարարությամբ, սակավարյունությամբ: Վարակը կարող է փոխանցվել մարդուն սննդամթերքի, ջրի և այլնի միջոցով: Գերմանիայում արձանագրված բռնկման հետ կապված իրականացվում է համաճարակաբանական հետազոտություն, որի արդյունքում վարակի աղբյուրը դեռևս չի պարզվել:

Համաներմամբ արդեն ազատ է արձակվել 376 դատապարտյալ

Համաներմամբ արդեն ազատ է արձակվել 376 դատապարտյալ

04-06-2011

Հայաստանի անկախության հռչակման 20-րդ տարեդարձի կապակցությամբ հայտարարված համաներմամբ, հունիսի 2-ի դրությամբ, արդարադատության նախարարության քրեակատարողական հիմնարկներից ազատ է արձակվել 376 դատապարտյալ, կրճատվել է 5 դատապարտյալի պատժաչափը:

Այդ մասին հաղորդագրություն է տարածել Արդարադատության նախարարության քրեակատարողական վարչության հասարակայնության հետ կապերի բաժանմունքի պետ Արսեն Բաբայանը:

ՀԱԿ-ը հաստատել է իշխանությունների հետ երկխոսության պատվիրակության կազմը

ՀԱԿ-ը հաստատել է իշխանությունների հետ երկխոսության պատվիրակության կազմը

03-06-2011

Հունիսի 2-ին տեղի է ունեցել Հայ Ազգային Կոնգրեսի Քաղխորհրդի արտահերթ նիստ, որի ընթացքում քննարկվել է Հայ Ազգային Կոնգրեսի` իշխանությունների հետ երկխոսության պատվիրակության կազմը: Քաղխորհուրդը հաստատել է պատվիրակության հետևյալ կազմը.

Լևոն Զուրաբյան – Հայ Ազգային Կոնգրեսի կենտրոնական գրասենյակի համակարգող (պատվիրակության ղեկավար)

Դավիթ Շահնազարյան – Հայ Ազգային Կոնգրեսի կենտրոնական գրասենյակի ներկայացուցիչ

Վահագն Խաչատրյան – Հայ Ազգային Կոնգրեսի տնտեսական հանձնախմբի անդամ, Մալաթիայի տարածքային կառույցի ղեկավար

Ֆելիքս Խաչատրյան – Հայաստանի ժողովրդական կուսակցության վարչության քարտուղար

Սամվել Աբրահամյան – ՀՀՇ վարչության փոխնախագահ

© Medialab.am

«Մեդիալաբի» ծաղրանկարը միջազգային ծաղրանկարիչների ցանցում`առաջնորդող

«Մեդիալաբի» ծաղրանկարը միջազգային ծաղրանկարիչների ցանցում`առաջնորդող

01-06-2011

«Մեդիալաբի» ծաղրանկարիչ Վահե Ներսեսյանի` Բին Լադենի սպանության թեմայով արված ծաղրանկարն արժանացել է բարձր գնահատականի` գլխավորելով ծաղրանկարիչների միջազգային ազատ ցանցի` toonpool.com-ի, այդ թեմայով արված ծաղրանկարների տասնյակը:

Ըստ խմբակրակազմի անդամ, հայտնի ծաղրանկարիչ Փոլ Հելմիչի, Օսամա Բին Լադենի մահվան լուրը 2011թ. մայիսի 2-ի թիվ մեկ նորությունը լինելով, toonpool.com կայքում բազմաթիվ ծաղրանկարների առիթ է հանդիսացել: Սակայն ընտրության արդյունքում ընտրվել են 10 երկրներ ներկայացնող 10 նկարիչների թվով 10 աշխատանքները:

Ըստ այդմ, Վահե Ներսեսյանի ծաղրանկարը առաջնորդել է Թուրքիայի, Գերմանիայի, ԱՄՆ-ի, Բրազիլիայի, Ֆրանսիայի, Բուլղարիայի, Ֆինլանիդայի, Իսպանիայի եւ Էլ Սալվադորի ծաղրանկարիչներին:

«Թեեւ ծաղրանկարը բավական պարզունակ է, Վահեն շատ լավ է աշխատել բին Լադենի կերպարի վրա: Կատաղի հայացքը, անդրավարտիքը եւ շարժումներն ընդգծող գծերն իրոք տպավորիչ են»,-Ներսեսյանի աշխատանքի մասին գրում է Փոլ Հելմիչը:

Գերմանիայում տեղակայված ցանցում գրանցված ծաղրանկարիչներ ամբողջ աշխարհից: Կայքում զետեղված են ավելի քան 112 000 ծաղրանկարներ:

© Medialab.am

Լեվոն Տեր-Պետրոսյանի ելույթը մայիսի 31-ի հանրահավաքում

Լեվոն Տեր-Պետրոսյանի ելույթը մայիսի 31-ի հանրահավաքում

01-06-2011

Սիրելի հայրենակիցներ,

Նախ եւ առաջ, ուզում եմ սրտանց շնորհավորել բոլորիդ՝ իշխանության առջեւ մեր դրած երեք կարեւորագույն պահանջների կատարման առթիվ, ինչը պետք է համարել համաժողովրդական եռամյա պայքարի մինչ այժմ արձանագրված ամենամեծ հաղթանակը։ Դա ոչ թե ընդդիմության, ոչ թե Հայ Ազգային Կոնգրեսի, այլ առաջին հերթին, Հայաստանի նոր քաղաքացիական հասարակության, եթե կուզեք, ողջ հայ ժողովրդի, իսկ վերջին հաշվով, մեր երկրի ու պետության հաղթանակն է, որի կերտման գործում իրենց լուման են ներդրել ե՛ւ համաժողովրդական շարժման նվիրյալները, ե՛ւ բազմաթիվ հասարակական կազմակերպություններ, ե՛ւ անկախ մամուլի ներկայացուցիչները, ե՛ւ սոցիալական բողոքի տարերային ցույցերի հազարավոր մասնակիցները։ Անշուշտ, դրանում իրենց որոշակի դերն են խաղացել նաեւ վերջին շրջանում Հայաստանի իշխանությունների վրա միջազգային հանրության գործադրած ճնշումները, որոնց ազդեցությունը, սակայն, չպետք է չափազանցել, քանի որ նրանք տեղի չէին ունենա, եթե Հայաստանում չլիներ այնպիսի հզոր ընդդիմություն, ինչպիսին Հայ Ազգային Կոնգրեսն է, եւ եթե չլիներ վերջինիս գլխավորությամբ բռնապետության դեմ ծառացած ժողովրդի տեւական պայքարը։

«Եվրատեսիլ 2012».Ադրբեջանը երաշխավորում է հայ մասնակիցների անվտանգությունը

«Եվրատեսիլ 2012».Ադրբեջանը երաշխավորում է հայ մասնակիցների անվտանգությունը

01-06-2011

Ադրբեջանական կողմը կապահովի «Եվրատեսիլ 2012» երգի մրցույթի հայ մասնակիցների անվտանգությունը: Այս մասին է հայտնում են ադրբեջանական լրատվամիջոցները իր հերթին հղում կատարելով Ադրբեջանի երիտասարդության և սպորտի նախարար Ազադ Ռահիմովին:

«Մենք կցանկանայինք, որպեսզի Հայաստանի ներկայացուցիչները մասնակցեն այդ մրցույթին: Սակայն, եթե նրանք հստակ որոշեն, որ չեն գալու Ադրբեջան, ապա դա նրանց իրավունքն է», - ասել է Ազադ Ռահիմովը:

© Medialab.am