«Ձու գողացողին բռնել ենք, ձի գողացողին՝ բաց թողել, այս գործընթացի իմաստը ո՞րն է»․ Էդմոն Մարուքյան

27-03-2019
2957 դիտում
«Ձու գողացողին բռնել ենք, ձի գողացողին՝ բաց թողել, այս գործընթացի իմաստը ո՞րն է»․ Էդմոն Մարուքյան

«Մեդիալաբի» հարցերին պատասխանել է ԱԺ «Լուսավոր Հայաստան» խմբակցության ղեկավար Էդմոն Մարուքյանը

- Պարո՛ն Մարուքյան, վարչապետ Նիկոլ Փաշինյանն իր վերջին ասուլիսում հայտարարեց, որ դժգոհ է կոռուպցիոն հանցագործությունների բացահայտման տեմպերից: Նա կարծես ուղերձ հղեց իրավապահներին, որ պետք է արագացնել: Դուք ինչպե՞ս եք գնահատում այս գործերի բացահայտումը:

- Ես գիտեմ, որ իրավապահ մարմինները գերբեռնված են աշխատում, ուրիշ որևէ բան բան մեզ հայտնի չէ: Ի տարբերություն մեր երկրի որոշ պաշտոնյաների, ես նախաքննության գաղտնիքներին չեն տիրապետում, չեմ կարող ասել, թե ինչ աշխատանքներ են կատարվում կոռուպցիոն հանցագործությունների բացահայտման ուղղությամբ: Բայց, օրինակ, ես մի բան կարող եմ եմ ասել՝ այդ գործընթացում աբսուրդ իրավիճակներ կան: Օրինակ՝ գեներալ Մանվելի մասին ասում են, որ նորից տարել են հիվանդանոց, առողջական վիճակը վատ է:

Հիմա մարդիկ հարց են տալիս, ասում են՝ պետական եկամուտների կոմիտեի նախկին նախագահ Գագիկ Խաչատրյա՞նն է շատ թալանել մեր երկիրը, թե՞ գեներալ Մանվել Գրիգորյանը: Ես մեկ անգամ ասացի՝ եթե Գագիկ Խաչատրյանի թալանը համեմատենք Մանվել Գրիգորյանի թալանի հետ, կարող է Հարավային Կովկասը ծածկվի տուշոնկաների թվով: Հիմա Գագիկ Խաչատրյանը դրսում քայլում է իր համար, արևն է վայելում, բայց ինչ-որ մարդիկ բանտերում նստած են: Ինչո՞վ է դա արդար, ուզում եմ հասկանալ:

- Այսինքն՝ ըստ ձեզ խտրական մոտեցո՞ւմ է ցուցաբերվում կոռուպցիոն հանցագործությունների բացահայտման ուղղությամբ:

- Այսինքն՝ մոտեցումը հետևյալն է՝ ձու գողացողին բռնել ենք, բայց ձի գողացողին բաց ենք թողել: Ձի գողացողը փողոցներում զբոսնում է, այս գործընթացի իմաստը ո՞րն է:

- Իսկ հնարավո՞ր է Նիկոլ Փաշինյանը, օրինակ, նման դեպքերը նկատի ունենալով է դժգոհում իրավապահների աշխատանքից:

- Երևի դա նկատի ունի Փաշինյանը, երևի ինքն էլ է իմ կարծիքին, որ ձու գողացողներին բռնել են, ձի գողացողներին՝ թողել դրսում:

- Ի՞նչ քայլեր եք ակնկալում իրավապահներից:

- Պետք է նրանց էլ բռնել, պետք է համալիր աշխատանքներ անել: Ոչ միայն տուշոնկաների գործով պետք է մարդիկ նստեն, այլ նաև Հարավային Կովկասի տարածքը ծածկող քանակությամբ տուշոնկաներ գողացողներն էլ պետք է նստեն:

- Կա այսպիսի տեսակետ, որ Հայաստանի նոր իշխանությունների կողմից քաղաքական գնահատական չտրվեց նախորդ իշխանությունների աշխատանքին: Դուք համամի՞տ եք այդ գնահատականներին:

- Ես կարծում եմ՝ երկրում տեղի ունեցած փոփոխությունները հենց քաղաքական գնահատական են: Ամենօրյա ռեժիմով քաղաքական գնահատականներ են տրվում նախկին իշխանություններին: Բայց նաև կարծում եմ, որ պետք է առաջ նայել: Այսինքն՝ մենք ամեն օր չպետք է դրանով զբաղվենք: Մենք պետք է առաջ նայենք, նախկին իշխանությունները հեռացվել են ժողովրդի կողմից նաև այն պատճառով, որ իրենք վատն էին: Հետևաբար, ամեն օր ասել ու հիշել, որ իրենք վատն էին, ես կարծում եմ՝ ճիշտ չէ, պետք է առաջ նայել: Նրանք վատն էին, դրա համար էլ չկան:

- Նախկին պաշտոնյաներից ոմանք նաև վերջին ամիսներին գույք նվիրաբերելու պատրաստակամություն էին հայտնել պետությանը, իսկ Սերժ Սարգսյանի եղբայրը՝ Ալեքսանդր Սարգսյանը, գումար էր վերադարձրել պետությանը: Դուք այս գործընթացներին ինչպե՞ս եք վերաբերվում:

- Դրա մասին ես նախկինում էլ եմ խոսել՝ պետք է պրոցեսը թափանցիկ լինի: Եվ մենք պետք է բոլորս իմանանք, թե ով ինչ գումար է տալիս պետությանը, ինչի համար, ինչ գործի շրջանակներում և դրա դիմաց նա ինչ է ստացել: Ինդուլգենցիա է դա, թե՞ ինչ է: Կարող է լինել գործընթաց, որ նախկին պաշտոնյաները հետ վերադարձնեն, բայց դա պետք է լինի թափանցիկ, մենք տեսնենք, թե ինչ է: Պետք է տեսնենք, թե ում ինչքանի համար ենք ներում: Օրինակ՝ ես՝ որպես քաղաքացի, պատրաստ եմ Գագիկ Խաչատրյանին ներել, եթե նա 1 միլիարդ դոլար վերադարձնի պետությանը: Բայց հիմա այդ գործընթացը թափանցիկ չէ, ես չգիտեմ, թե ով ինչքան փող է տալիս և ինչի համար է տալիս: Եվ ոչ մեկն էլ չգիտի:

- Այսինքն՝ դա կարո՞ղ է նոր կոռուպցիա ծնել:

- Հստակ չեմ կարող ասել, ինչ իմանանք: Պետք է թափանցիկ լինի, որ ոչ մի կոռուպցիա էլ չծնի:

Ռոզա Հովհաննիսյան

MediaLab.am