Մի կին ոստիկաններին է ներկայացրել ԱԺ պատգամավոր Ռուստամ Բաքոյանի ժամացույցը և հայտնել, որ այն գտել է

12-11-2019
Մի կին ոստիկաններին է ներկայացրել ԱԺ պատգամավոր Ռուստամ Բաքոյանի ժամացույցը և հայտնել, որ այն գտել է

Նոյեմբերի 11-ին համացանցում տեղեկատվություն էր տարածվել, որ ՀՀ ԱԺ պատգամավորներից մեկի ավտոմեքենայից գողություն է կատարվել։

Ինչպես տեղեկացնում են ՀՀ ոստիկանությունից, ԱԺ պատգամավորը նոյեմբերի 11-ին ոստիկանության Արաբկիրի բաժնում հաղորդում էր ներկայացրել, որ Վ․ Վաղարշյան-Ա․Ավետիսյան փողոցների խաչմերուկի մոտակայքում կայանված իր մեքենայի սրահից գողացել են «Ռոլեքս» ժամացույցը։

Ոստիկանության Արաբկիրի բաժնի ծառայողները հաղորդումից հետո ձեռնամուխ են եղել դեպքի հանգամանքների բացահայտմանը։ Ենթադրյալ դեպքի վայրի շրջակայքում իրականացրած միջոցառումների ընթացքում տարածքում առևտրով զբաղվող մի կին ոստիկաններին է ներկայացրել ժամացույցը և հայտնել, որ այն գտել է Վ․ Վաղարշյան-Ա․Ավետիսյան փողոցների խաչմերուկի մոտակայքում։

Հիշեցնենք, որ խոսքը ԱԺ պատգամավոր Ռուստամ Բաքոյանի մասին է։