«Ապրիլյան պատերազմում հայոց բանակը հաղթանակած բանակ է, թերությունները, որոնք եղել են՝ կարձագանքենք». Վահրամ Բաղդասարյան

03-03-2017
17806 դիտում
«Ապրիլյան պատերազմում հայոց բանակը հաղթանակած բանակ է, թերությունները, որոնք եղել են՝ կարձագանքենք». Վահրամ Բաղդասարյան

«Մեդիալաբի» հարցերին պատասխանել է Ազգային ժողովի ՀՀԿ խմբակցության ղեկավար Վահրամ Բաղդասարյանը:

-Պարոն Բաղդասարյան, ՀՀԿ նախընտարական պաստառներն արդեն փակցվել են, և չնայած վարչապետ Կարեն Կարապետյանը չկա ՀՀԿ համամասնական ցուցակում, բայց հիմնականում նրա նկարն է պաստառների վրա: Կան տեսակետներ, որ հենց վարչապետի միոջոցով է ՀՀԿ-ն փորձում նոր դեմքով ներկայանալ հանրությանը:

-Մենք շատ հստակ բաժանում կատարել ենք մեր թիմի մեջ, ՀՀԿ-ն ունի իր առաջին եռյակը, տասնյակը, քսանյակը: Մեր ընտրություններին գնում ենք Վիգեն Սարգսյան, Տարոն Մարգարյան, Արփինե Հովհաննիսյան առաջին եռյակով: Իսկ քարոզաչական աշխատանքների հետ կապված բավական լուրջ ծանրաբեռնվածություն կունենա վարչապետ Կարեն Կարապետյանը: Բնականաբար, նա միայնակ չէ, կա քարոզչական խումբ, բայց ինքը մեծ դերակատարություն կունենա այդ գործընթացում:

-Այս անգամ Սերժ Սարգսյանի լուսանկարները կտեսնե՞նք պաստառների վրա:

-Սերժ Սարգսյանը մեր առաջնորդն է: Ես խնդրում եմ դուք մեր մարտավարության մեջ մի մտեք, յուրաքանչյուր քաղաքական ուժ ու կուսակցություն ունի իր մարտավարությունը: Մենք երկար ենք քննարկել այդ հարցերը: Եվ Սերժ Սարգսյանը, եթե այսօր լիներ ցուցակը գլխավորողը և քարոզչության հիմնական դերերում, այն նույն մեղադրանքները, լուտտանքները, որնք թափվում են մեր կուսակցության վրա, նորից կհնչեցին, թե երկրի ամբողջ ռեսուրսները պետք է ծառայեն ՀՀԿ-ին: Եթե Սերժ Սարգսյանը լիներ մեր ցուցակի առաջին համարը, մամուլն անընդհատ պետք է շահարկեր, թե արդեն վարչապետի հարցը լուծել է, ինքը պետք է դառնա Ազգային ժողովի նախագահ: Եվ այդ բոլոր հարցերի պատասխանները տրվեց, իսկ Սերժ Սարգսյանն իր ակտիվ դերակատարությունը պետք է դնի թիմի հաջողության համար: Եվ կարևոր չէ, որ շատ լուսանկարներում լինի, ամբողջ հանրապետությունը գիտի, որ մեր առաջնորդը ՀՀ նախագահ Սերժ Սարգսյանն է:

-Շատ է քննադատվում ՀՀԿ նախընտրական կարգախոսը՝ «Անվտանգություն և առաջընթաց»: Հարցադրումներ կան, թե ի՞նչ անվտանգության ապահովման մասին է խոսքը, երբ մենք նույն ՀՀԿ-ի օրոք ապրիլյան պատերազմի օրերին տեսանք, թե ինչպես էին թալանվել բանակի գումարները:

-Ապրիլյան պատերազմում հայոց բանակը հաղթանակած բանակ է: Ձեռնպահ մնացեք այդ խնդրից, իսկ մնացած այն թերությունները, որոնք եղել են, մենք դրանց կարձագանքենք: Ալիևը հայտարարում է, որ իրենք հաղթանակած են, իսկ մենք՝ իրական հաղթանակած բանակի քաղաքացիներն այստեղ փորձում ենք…

-Մենք չենք խոսում բանակի հաղթանակի մասին, խոսում ենք բանակից գողացած գումարների մասին: Ի վերջո պատիժ լինելո՞ւ է:

-Դրա համար հետևություններ կարվեն, իսկ անվտանգության հետ կապված նման երևույթներ լինում են: Եթե մենք այդ իրավիճակում հաղթանակած ենք եղել, բնականաբար մեր հետևություններից հետո մենք կլինենք անպարտելի:

-Վարչապետ Կարեն Կարապետյանն օրերս Ազգային ժողովի ամբիոնից հայտարարեց, որ ապրիլյան պատերազմի օրերին մեր զինտեխնիկան շատ դեպքերում չի աշխատել հենց անորակ վառելիքի պատճառով: Իրավապահ մարմինները սա որպես հանցագործության մասին հաղորդում ընդունե՞ն, պատիժներ կլինե՞ն:

-Որևէ հայտարարություն անհետևանք չի կարող մնալ, առավել ևս եթե այդ հայտարարությունն անում է ՀՀ վարչապետը: Համբերեք, կտեսնեք, երբ քննություն կլինի:

-Սերժ Սարգսյանի կողմից թեև խոսվեց անցնցում ընտրություններ անցկանցելու մասին, սակայն ՀՀԿ-ական որոշ գործիչներ կարծես անտեսեցին նրա այդ հրահանգը: Մենք ականատես եղանք ծեծկռտուքի, դանակահարության, այսինքն՝ ընտրական գործընթացում ոչինչ չի՞ փոխվել:

-Ես խնդրում եմ դուք համեմատություններ արեք անցած տարիների ընտրությունների հետ: Եվ դուք երևի կզգաք, որ նման դեպքերը հիմա քանակությամբ քիչ են: Իհարկե, մենք ընդհանրապես պետք է դրանք բացառենք, բայց որևէ մեկը երաշխավորված չէ, որ 3 միլիոնից ավելի երկրում ընտրություններ կազմակերպելու դեպքում, մի քանի հազար շտաբ տեղադրվելու դեպքում չեն կարող նման միջադեպեր լինել տարբեր մարդկանց միջև: Կարևորը դա չէ, կարևորն այն է, որ մենք կարողանանք կանխարգելել այդ դեպքերը, և պատժվեն մարդիկ:

-Ասում են՝ տարբեր համայնքներում ՀՀԿ-ական ռեյտինգային ընտրակարգով առաջադրված թեկնածուներն արդեն թաղային հեղինակություններին են խառնել գործին:

-Դուք այդ «հեղինակություն» բառը մի քիչ լավ չեք օգտագործում: Եթե մարդիկ չլինեն հեղինակություն, նրանք ռեյտինգային ընտրակարգով չեն առաջադրվի:

-Ես նկատի ունեմ ընտրական գործընթացին խառնված «գողականներին»:

-Դրանք տարբեր բառեր են: Համենայնդեպս, ես ինչքան որ հետաքրքվել եմ, մեր շտաբներում ընտրությունների իրավիճակին տիրապետող մարդիկ են: Պարտադիր չէ, որ այդ հրահրողները լինեն շտաբի անդամներ: Մենք դատապարտում ենք և պետք է կանխարգելենք նման դեպքերը:

Ռոզա Հովհաննիսյան

MediaLab.am