«Գործում է որոշումների կայացման արտաքին կաշկանդված քաղաքականություն». Դավիթ Խաժակյան

13-09-2017
5259 դիտում
«Գործում է որոշումների կայացման արտաքին կաշկանդված քաղաքականություն». Դավիթ Խաժակյան

«Մեդիալաբի» հարցերին պատասխանում է Երևանի ավագանու «Ելք» խմբակցության ղեկավար Դավիթ Խաժակյանը:

- Մինչ Երևանի ավագանու «Ելք» խմբակցությունը նշում է, որ ընդլայնում է Երևանի՝ անվանափոխման ենթակա փողոցների ցուցակը, մեծանում է նաև քննադատությունը, որ կարևոր խնդիրները թողած` անկարևորի հետևից եք ընկել։ Այսօր էլ Երևանի ավագանու կրթության, մշակույթի և սոցիալական հարցերի մշտական հանձնաժողովը որոշել է բացասական եզրակացություն տալ ձեր նախաձեռնությանը։ Հնարավո՞ր է ինչ-որ ժամանակ դադարեցնեք այն։

- Մենք կարծում ենք, որ այս գործընթացը շարունակական բնույթ պետք է ունենա, և քանի դեռ ունենք պետության և ժողովրդի դեմ հանցագործություն կատարած գործիչների անուններով փողոցներ, և քանի դեռ ունենք ազգային հերոսներ, ում անուններով չունենք անվանակոչված փողոցներ և դպրոցներ, այս գործընթացը պետք է շարունակվի:

- Երևանի ավագանու ՀՀԿ խմբակցության անդամ Նաիրա Նահապետյանն ասում է, որ այս հարցը հանրաքվեով պետք է որոշվի։ Նաև ասել է. «Այդ երիտասարդները, որ հիմա խոսում են, չեն հասկանում՝ իրենց պապերը, իրենց հայրերն այդ ժամանակվա ծնունդ չե՞ն, նրանք այդ ժամանակաշրջանում են աշխատել ու արարել: Ո՞վ է հիմա նրանց զավակներին իրավունք տվել անվանափոխել ու վերագնահատել այդ ժամանակաշրջանը»։ Ինչպե՞ս եք գնահատում հանրաքվեի գաղափարը և իշխանության կանխատրամադրվածությունը այս նախաձեռնությանը։

- Հասարակության կարծիքը վեր հանելուն մենք դեմ չենք, սակայն նշում ենք, որ դա պետք է լինի ճիշտ մեթոդաբանությամբ և բոլորի կողմից վստահություն վայելող արդյունք: Տեղական հանրաքվե իրականացնելուն մենք կողմնակից ենք, և եթե ՀՀԿ խմբակցությունը չհրաժարվի հանրաքվեի շուրջ իր այդ դիրքորոշումից, ապա դա լավ նախադեպ կդառնա քաղաքային վիճահարույց խնդիրները լուծելու համար:

- Ձեր նախաձեռնությունը քննադատում են նաև արվեստագետներ: Մասնավորապես, Նիկոլայ Ծատուրյանն ասում է, որ շատ ավելի լուրջ հարցեր կան, և սա չէ մեր երկրի գերխնդիրը. «Լուրջ հարցեր կան. երիտասարդ տղաները բանակ չեն ուզում գնալ, դուք խոսում եք փողոցների անվանափոխությունի՞ց»: Համամի՞տ չեք:

- Տարօրինակ է, որ ավելի կարևոր խնդիր բարձրացնելու համատեքստում մեջբերում են համապետական նշանակության խնդիրներ, որոնք Երևանի ավագանու լիազորություններից դուրս են։ Այդ խնդիրներով զբաղվում են ԱԺ «Ելք» խմբակցության պատգամավորները, իսկ ավագանու լիազորությունների մաս է նաև փողոցների անվանակոչության հարցը, որը մենք քաղաքային խնդիրների համատեքստում գնահատում ենք առաջնային, որովհետև համարում ենք՝ ինչ մտածողություն գերիշխի մեր քաղաքական շրջանակներում, նույնպիսի կառավարում կունենանք մենք Երևանում։ Եթե կլինի միկոյանական, կասյանական մտածողություն, կունենանք համապատասխան Երևան, եթե կարողանանք վերարժևորել մեր պատմությունը, ապա կփոխվի նաև կառավարման ոճը և, ըստ այդմ՝ խնդիրների լուծման ձևը և առաջնայնությունը։

- Այսինքն՝ արձանագրում եք, որ միկոյանական մոտեցո՞ւմն է իշխում քաղաքային իշխանության մոտ։

- Արձանագրում ենք, որ գործում է որոշումների կայացման արտաքին կաշկանդված քաղաքականությունը, որի արդյունքում մենք չենք կարողանում սեփական մայրաքաղաքում որոշումներ կայացնել։

- Նշվում է, որ քաղաքապետարանի բյուջեից մսխումներ, հազարավոր դոլարների կոնյակ և այլ իրեր են ձեռք բերվում, բայց դուք փողոցների անուններ եք փոխում, մինչդեռ պետք է առաջնային լիներ բյուջեի վերահսկողությունը։ Այս առումով ի՞նչ աշխատանքներ եք իրականացնում։

- Փողոցների անվանափոխության մեր նախաձեռնությունը կատարվող բազմաթիվ աշխատանքներից ընդամենը մեկն է, բայց, ըստ մեզ, առաջնայնությամբ չի զիջում քաղաքային-կենցաղային մյուս խնդիրներին: Ինչպես բազմիցս նշել ենք, քաղաքապետարանի կողմից ներկայացուցչական ծախսերը այժմ իրականացվում են նախորդ ավագանու հաստատած բյուջեի ծախսային հոդվածով, իսկ բյուջեի մուտքերի և ելքերի նկատմամբ մեր ուշադրությունը երբեք չի պակասի:

- 500 կոնյակ ձեռք բերելու համար քաղաքային բյուջեից ծախսվել է 11 մլն 850 հազար դրամ։ Այստեղ արդյոք խնդիր չե՞ք տեսնում։ Ինչ-որ քայլեր պատրաստվո՞ւմ եք ձեռնարկել։

- Այս ծախսերը ներկայացուցչական ուռճացված բյուջեի արդյունք են, ինչը մեր կողմից առաջարկվելու է վերանայել 2018 թվականի բյուջեն քննարկելիս:

- Արդյոք պատրաստվո՞ւմ եք բարձրացնել «Երևան» հիմնադրամի հարցը:

- Այդ ուղղությամբ արդեն սկսել ենք ուսումնասիրությունները և որոշակի հարցումներ ենք իրականացրել: Երբ արդյունքները լինեն, այդ մասին ևս կխոսենք:

- Շարունակո՞ւմ եք պնդել նախընտրական կարգախոս դարձած «Մահաբեր վերելակներին ելք կա»-ն, թե՞ ոչ։ Ի վերջո, ի՞նչ աշխատանքներ են իրականացվում նաև այս խնդրի հետ կապված։

- Քաղաքապետարանի տարբեր ներկայացուցիչների հետ քննարկումների ընթացքում ընդգծել ենք այս խնդրի կարևորությունը և պնդել, որ պետք է ձեռք բերվեն մեծ քանակությամբ նոր վերելակներ, որոնք կկառավարվեն ոչ թե համատիրությունների, այլ վարչական շրջանների կողմից: Ըստ էության, այս մոտեցումը ընդունելի է քաղաքապետարանի համար, մնում է գալիք տարվա բյուջեով հիմք դրվի վերելակների գնումների գործընթացին և որոշակի կարգավորումներով այն անցնի վարչական շրջանների վերահսկողության տակ:

- «Խավարում» ցուցահանդեսի կասեցման հետ կապված «Ելքը» հանդես էր եկել դատապարտող հայտարարությամբ։ Ինչպե՞ս եք գնահատում նախարարության արձագանքը։

- Սա Սահմանադրության նորմերի կոպիտ ոտնահարում է, երբ սահմանափակվում է մտքի և խղճի ազատությունը: Կարծում ենք`այս դեպքում կառավարության համապատասխան ներկայացուցիչը թույլ է տվել կոպիտ ոտնահարում։

Մանե Հարությունյան

MediaLab.am