Թանկացումներ. Մսի ու կարագի գների կտրուկ աճը մասնագետները կապում երաշտի, անասնակերի թանկացման ու արտահանման ծավալների աճի հետ

06-10-2017
3647 դիտում
Թանկացումներ. Մսի ու կարագի գների կտրուկ աճը մասնագետները կապում երաշտի, անասնակերի թանկացման ու արտահանման ծավալների աճի հետ

Վերջին 10 օրերին երևանյան խանութներում կտրուկ թանկացել են կարագն ու մսամթերքը: Պաշտոնական տվյալների համաձայն՝ կարագը թանկացել է մոտ 30 տոկոսով, իսկ միսը՝ 20-ից 30 տոկոսով՝ կախված տեսակից:

Թե ո՞րն է թանկացումների պատճառը՝ պաշտոնապես դեռևս չի բացատրվում: Տնտեսական մրցակցության պաշտպանության կոմիտեից ասվել է միայն, որ մսի շուկան իրենց վերահսկողությունից դուրս է: Իսկ առևտրականները դժգոհում են, որ 10 օր է գրեթե ոչինչ չեն վաճառել, որովհետև մարդիկ չեն գնում թանկացած ապրանքը:

Մսի թանկացումը թվերով

Ազգային վիճակագրական ծառայության տվյալներով՝ մայրաքաղաքում օգոստոս ամսին

  • տավարի մսի 1 կիլոգրամի միջին գինը կազմել է մոտ 2100 դրամ

  • ոչխարի մսի գինը՝ 2200 դրամ

  • խոզի մսի գինը՝ մոտ 2600 դրամ

Սեպտեմբերի վերջից մինչ այս պահը

  • տավարի միսը թանկացել է 300-ից 400 դրամով,

  • ոչխարի միսը՝ 500-600 դրամով,

  • խոզի միսը՝ 800-ից 1000 դրամով:

Կարագի թանկացումը թվերով

Կարագի որոշ տեսակներ` 200-250 գրամանոց տուփերը, կարելի էր մեկ կամ երկու ամիս առաջ գնել 750-800 դրամով, հիմա դրանք վաճառվում են 980-ից 1000 դրամով: Կիլոգրամով վաճառվող լավ որակի կարագը համարյա կրկնակի է թանկացել. 2800 դրամի փոխարեն այն հիմա վաճառվում է 4200 դրամով:

JAMnews-ի հետ զրույցում Ազգային ժողովի պատգամավոր, տնտեսական հարցերով մշտական հանձնաժողովի նախագահ, Հայաստանի նախկին վարչապետ Խոսրով Հարությունյանն ասաց, որ թանկացումները դեռևս չեն ուսումնասիրել, բայց կուսումնասիրեն:

Նա նշեց, որ կարագի ու մսի շուկաները մենաշնորհված չեն, ուստի թանկացումը չի կատարվել մեկի կողմից: Նա ներկայացրեց թանկացումների մի քանի հնարավոր պատճառ, որոնք դեռևս, ըստ նրա, հաստատման ու ուսումնասիրության կարիք ունեն:

«Գուցե գնորդները շատացել են, պահանջարկը՝ մեծացել է, դրա համար էլ գինը թանկացել է: Ենթադրում եմ, որ ապրանքը արտադրողները արտահանում են այն արտերկիր, դրա համար ներքին շուկայում քիչ ծավալներ են մնում՝ ու գինը թանկացնում են, որովհետև պահանջարկը շատ է, բայց ապրանքը քիչ: Գուցե առևտրականների համար ռուսական շուկա միս արտահանելը նրանց համար դարձել է ավելի ձեռնտու, քան՝ ներքին շուկայում վաճառքի հանելը: Կարագի պարագայում, ենթադրում եմ, որ գինը թանկացել է այն երկրներում, որտեղից Հայաստանն այն ներկրում է: Բայց մի բան ամեն դեպքում ակնհայտ է, որ կառավարությունը որևէ կերպ չի ազդել գների թանկացմանը»,- պարզաբանեց Խոսրով Հարությունյանը:

«Ագրարագյուղացիական միավորում» ՀԿ նախագահ Հրաչ Բերբերյանն էլ նշեց, որ խնդիրն ամռան է առաջ եկել: Նա ասաց, որ Հայաստանում ամռան շոգ օրերին գրանցվել է երաշտ, անասնակերը՝ խոտը չորացել է, ինչի հետևանքով թանկացել է նաև խոտի գինը, դրա համար էլ անասուններին կերակրող գյուղատնտեսը խոտի վրա ծախսվող գումարի դիմաց թանկացրել է միսն ու կաթը, ինչի հետևանքով թանկացել է նաև տեղական արտադրության կարագը:

«Բոլոր քաղաքակիրթ երկրներում, եթե 25 օր տեղումներ չեն լինում, անձրև չի գալիս, պետությունը երաշտ է հայտարարում: Բայց Հայաստանում դա չարվեց, մարդիկ չհասկացան, որ եթե երաշտ է, որ խոտը չորացել է և որ հետագայում անասնակերի պակաս ենք ունենալու: Սարերում խոտհունձը պետք է հուլիսին կազմակերպվեր, կանաչ խոտը պետք է հնձվեր, որ հիմա այս օրին չհասնեինք ու եթե հնձեին, անտառներում էդքան հրդեհ էլ չէր լինի»,- նշեց Հրաչ Բերբերյանը:

Վերջինս ասաց նաև, որ խոտի գինը թանկացել է մոտ 3 անգամ, եթե նախկինում 1 հակը 400-700 դրամ էր՝ կախված խոտի որակից, ապա այժմ այն արժե 2000-2500 դրամ:

Աղբյուրը՝ JAMNEWS

Լուսանկարը՝ «ՄեդիաԼաբի»