«Իշխանությունները պետք է մտահոգվեն՝ ինչպե՛ս Քոչարյանին հանել Հայաստան-Ռուսաստան հարաբերությունների առանցքից». Ստյոպա Սաֆարյան

01-09-2018
4642 դիտում
«Իշխանությունները պետք է մտահոգվեն՝ ինչպե՛ս Քոչարյանին հանել Հայաստան-Ռուսաստան հարաբերությունների առանցքից». Ստյոպա Սաֆարյան

«Մեդիալաբի» հարցերին պատասխանում է Միջազգային և անտանգության հարցերի հայկական ինստիտուտի ղեկավար, քաղաքագետ Ստյոպա Սաֆարյանը:

- Պարո՛ն Սաֆարյան, երկրորդ նախագահ Ռոբերտ Քոչարյանը հայտարարել է, որ մասնակցելու է արտահերթ խորհրդարանական ընտրություններին: Ի՞նչ է նա փորձում սրանով անել:

- Քոչարյանը շարունակում է քաղաքական երանգ հաղորդել իր բացառիկ քրեական գործին: Նա ուղղակի փորձում է ապացույցներ ստեղծել, թե ինքն իսկապես քաղաքականություն վերադառնալու մտադրություն ունի, և դրա համար են իրեն «հետապնդում»: Իրականության մեջ, քանի որ նրա գործն իրավական հարթության վրա հաղթելու շանս չունի, բնականաբար, նա փորձում է քաղաքականացնել իր գործը, փորձում է հույսեր կապել իր հետ, թեև արդյունքները մխիթարող չեն, քանի որ ոչ մի քաղաքական ուժ բացահայտ չողջունեց նրա՝ վերադառնալու մտադրությունը, որևէ մեկը հիացական ճիչեր չարտահայտեց: Նրանք, ովքեր կարող են համախոհ լինել Քոչարյանին, լավագույն դեպքում չբացառեցին համագործակցությունը, բայց չեմ կարծում, թե գործողությունների դաշտում այդպիսի շռայլություն ու ազատություն թույլ կտան իրենց, որովհետև Քոչարյանին սատարել նշանակում է ուղղակի խաչ քաշել սեփական քաղաքական հեռանկարի վրա ընդհանրապես:

Քոչարյանը փորձում է հույսեր ստեղծել, թե իր վերադարձին սպասողներ կան, թեպետ անգամ հարցազրույցում նկատելի էր նրա սրտնեղվածությունը, թե ժողովուրդը գնահատում է հոգատար մարդկանց կերպարը, քան արդյունքներ ապահովող: Այսինքն՝ ինքն էլ է գիտակցում, որ իր պահանջը հասարակությունը չունի:

- Նա ասաց, որ կարող է ընդդիմադիր բևեռ դառնալ: Հնարավոր համարո՞ւմ եք քաղաքական ուժերի՝ Քոչարյանի շուրջը համախմբումը:

- Եթե հիշում եք, օրեր շարունակ Քոչարյանի գրասենյակը չէր հրապարակում այն պատգամավորների ցուցակը, որոնք երաշխավորում էին նրա խափանման միջոցի փոփոխումը: Պատճառը թերևս այն ժամանակ էլ շատ հասկանալի էր. Քոչարյանը վերին աստիճանի անակնկալի էր եկել, որ իրեն սատարում են նրանք, որոնց սատարման հետ ինքը մեծ հույսեր չէր կարող փայփայել: Բայց, միաժամանակ, նրան չէին սատարել այն քաղաքական ուժերը, որոնք իր հաշվարկներում պետք է իր վերադարձի թիվ մեկ պատվիրատուները լինեին: Խոսքն առաջին հերթին ԲՀԿ-ի մասին է, մասամբ էլ՝ ՀՅԴ-ի: Այս կտրվածքով պատահական չէր, որ նրանք օրեր էին ձգում՝ հասկանալու համար, թե արդյոք այս գործիչները կմիանա՞ն այս ստորագրահավաքին: Դա տեղի չունեցավ, այժմ հարցազրույցում նա ամոթից պարզապես թվարկում է նրանց անունները, բայց երբ լրագրողն ակնարկում է, որ քաղաքական ուժերը խանդավառված չեն իր վերադարձով, ասում է, որ այս ամիսների ընթացքում շատ բաներ կարող են փոխվել: Քոչարյանը հույս ունի, որ ինքն ինչ-որ ֆորս մաժոր կարող է ստեղծել, որը Գագիկ Ծառուկյանին ու մյուսներին կստիպի ավելի բացահայտ սատարել իր վերադարձը: Այս կապակցությամբ Քոչարյանը փակուղու մեջ է:

Մի փաստի վրա էլ եմ ուզում ուշադրություն հրավիրել՝ նրա տապալված ասուլիսը: Դա, պարզվում է, վերին աստիճանի գերկարևոր էր Քոչարյանի համար: Շատերը կարծում են, թե Քոչարյանը շահեց ասուլիսի տապալումից, բայց իրականության մեջ այլ բան էր: Պետք էր ապացուցել, որ Քոչարյանն ամենուր կա, ԶԼՄ-ները կլուսաբանեին, իսկ յուրայիններն ավելի լավ կլուսաբանեին նրա վերադարձը: Եվ ահա այդ համատեքստում Քոչարյանի վերադարձը հոգում փայփայողներն ազատության շանս կստանային, որ ամենակարող Քոչարյանը կրկին վերադարձել է, մամուլի ուշադրության կենտրոնում է: Պարզվեց՝ տապալվել է շատ մեծ ծրագիր, և դրա համար էր նա այդքան տխրել ու ագրեսիվ դարձել:

Արդյունքը շատ խղճուկ էր՝ «Երկիր մեդիայով» հարցազրույց, որն արժանացավ համազգային ծաղրի ու հեգնանքի: Սա ցույց տվեց, որ Քոչարյանն ամենևին ամենակարող չէ, ինչպես մտածել են, այդ միֆը ջարդվեց, նա լրատվամիջոցներում տեղ չունի, բացառությամբ մի երկուսի: Սա ցույց տվեց, որ նա պաշտպաններ չունի, նրա ասուլիսի տապալման դեմ, ըստ էության, ազդեցիկ բողոք չեղավ, շատ խղճուկ, նեղացած ու խռոված էին:

- Մենք կարո՞ղ ենք ասել, որ այսօր ռուսական կողմն անուղղակիորեն աջակցում է Քոչարյանին: ՌԴ նախագահ Վլադիմիր Պուտինը ջերմորեն շնորհավորեց նրա ծննդյան օրը: Ի՞նչ է սա նշանակում:

- Այո՛, կարող ենք ասել՝ աջակցում են: Պուտինը փորձում է Հայաստանի իշխանություններին հասկացնել, որ ինքը շատ ջերմ է վերաբերվում Ռոբերտ Քոչարյանին, ինչպես որ «ջերմ» բառը հարկ էր համարել տեղադրել տարածված ժլատ հաղորդագրության մեջ: Սա նշանակում է, որ Կրեմլը հասկացնում է, որ Քոչարյանն իր պաշտպանության տակ է: Բայց սա, ես կարծում եմ, չպետք է վախեցնի Հայաստանի իշխանություններին: Հայաստանի իշխանությունները մեկ բանի համար պետք է մտահոգվեն՝ ինչպե՛ս Քոչարյանին հանել Հայաստան-Ռուսաստան հարաբերությունների առանցքից: Ա՛յ դա իսկապես մեր պետականության համար վտանգավոր բան է:

Ռոզա Հովհաննիսյան

MediaLab.am