«Որ իմանայի՝ Հովհաննես Թումանյանը պիտի խոսի, կգնայի, կչոքեի առաջը». Լևոն Իգիթյան` «քաղաքի կենտրոնը մեյմունության տեղ չի»

20-03-2013
584 դիտում
«Որ իմանայի՝ Հովհաննես Թումանյանը պիտի խոսի, կգնայի, կչոքեի առաջը». Լևոն Իգիթյան` «քաղաքի կենտրոնը մեյմունության տեղ չի»

 

Երևանի ավագանու անդամ, ճարտարապետ Լևոն Իգիթյանի՝ օրերս արած այն հայտարարությունը, որ Ազատության հրապարակում անցկացվող հանրահավաքները «մեյմունություն» ու «բոշայություն» են, իսկ հանրահավաքի մասնակիցները «թամաշա» անելու համար են հավաքվում, բուռն քննարկումների թեմա է դարձել: «Մեդիալաբը» մի քանի հարց ուղղեց Լևոն Իգիթյանին՝ պարզելու, թե ինչո՞վ են նրա համար անընդունելի հետընտրական այս զարգացումները:

- Պարո՛ն Իգիթյան, ինչո՞ւ եք կարծում, թե մարդիկ «մեյմունություն» են անում Ազատության հրապարակում:

- Նորից եմ կրկնում՝ քաղաքի կենտրոնը մեյմունության տեղ չի: Պալատկա դնելն օպերայի մոտ՝ դա բոշայություն է: Նորից նույն բանը կրկնում եմ, հիմա ում դուրը եկել է, ում դուրը չի եկել, ես իմ կարծիքը դրա պատճառով չեմ փոխելու: Մայրաքաղաքն ուրիշ բան է, քաղաքը՝ ուրիշ բան, սովորական բնակավայրը՝ ուրիշ բան: Ո՞վ ասաց, որ եթե Արևմուտքում նման բաներ անում են, մենք էլ պիտի կրկնենք: Այս քաղաքն իր սահմանադրությունն ու չգրված օրենքն ունի:

- Այդ դեպքում որպես մշակութային գործիչ Դուք պայքարի ի՞նչ մեթոդ եք առաջարկում ժողովրդին, եթե հանրահավաքը «մեյմունություն» եք համարում:

- Ժողովրդի հետ խոսելու համար պիտի Հովհաննես Թումանյան լինես մինիմում: Պիտի հանճար լինես, բայց էսօր ով մի հատ քարի վրա կանգնում է, ժողովրդի հետ սկսում է խոսել, հա՞: Սովորական, միջակ հնարավորությունների տեր մարդիկ ելույթներ են ունենում, էս ի՞նչի ենք վերածել մեր հասարակությունը: Աստված տար, այնպես անեինք, որ Հովհաննես Թումանյանը կարողանար կենդանանալ: Որ իմանայի՝ Հովհաննես Թումանյանը պիտի խոսի, կգնայի, կչոքեի առաջը, կլսեի: Ես ո՞ւմ լսեմ փողոցում, չեմ հասկանում: Էն ի՞նչ պիտի ասեն, որ ես չգիտեմ: Էդ ի՞նչ հանճար է կանգնած խոսում, որ ես գնամ լսեմ, այ մարդ: Գիրք կարդալու ժամանակ չունեմ, թամաշայի՞ գնամ: Նախագահի թեկնածու լինելը ստատուս չի, հեղինակություն չի: Ուրեմն ով թեկնածու է, ես պիտի կանգնեմ ու լսեմ, թե ինչ է խոսում: Ինձ հետաքրքիր չի իրա կարծիքը, իրա ելույթը, իրա մտքերը ինձ չեն հետաքրքրում: Էս աշխարհում շատ ավելի հետաքրքիր ու խելոք մարդիկ կան:

- Բայց Ձեզ ոչ ոք չի ստիպում գնալ և լսել նրան, միաժամանակ Դուք իրավունք չունեք մարդկանց պայքարը «թամաշա» ու «մեյմունություն» որակելու: Հասարակությունն իր պահանջն է ներկայացնում Ազատության հրապարակում, մարդիկ մի տեսակ մոլորված են, արդարություն են պահանջում:

- Թող գնան սովորեն, ես մոլորված չեմ, փոքրուց մոլորված չեմ եղել: Մարդկանց ինքնահաստատման խնդիրը մինչև 20 տարեկանն է լուծվում: Քսանից հետո ով ինքնահաստատման խնդիր ունի, նրանք վտանգավոր մարդիկ են: Էլ չեմ ասում՝ էնտեղ 40-50 տարեկան մարդիկ կան, որ իրենց տեղը չեն գտել էս կյանքում, չեն իմանում՝ իրենք ո՛վ են:

- Եթե մարդիկ այսօր սեփական երկրում արժանապատիվ կյանքով ապրելու հնարավորություն չունեն, Դուք դա ինքնահաստատման խնդի՞ր եք համարում: Ո՞վ է մեղավոր դրա համար:

- Մեղավորները նրանք են, ովքեր 88 թվին երկիրը քանդուքարափ արեցին, զրոյի հասցրին: Քանդելը հեշտ էր, սարքելը դժվար է: Սարքելու փոխարեն հանդես են անում փողոցում: էդ բոլոր ելույթ ունեցողները էս վերջին 20 տարում ի՞նչ են տվել էս երկրին: Կարո՞ղ են հաշվետու լինել:

- Այսինքն՝ Դուք այս իշխանությունների մեղքի բաժինը չե՞ք տեսնում ստեղծված իրավիճակում: Մարդիկ այսօր դժգոհ են արտագաղթից, գործազրկությունից, շատ սոցիալական խնդիրներ կան:

- Դա իմ պրոբլեմը չի, նման հարցերով մոտեցեք տնտեսագետներին:

- Պարո՛ն Իգիթյան, նույն եռանդով Դուք չեք պայքարում իսկական բոշայության դեմ, երբ ՀՀԿ-ական պատգամավորը աղավաղում է Երևանի կենտրոնի պատմամշակութային հուշարձաններից մեկը: Ինչո՞ւ այդ դեպքում էլ նման կոշտ գնահատականներ չեք հնչեցնում, չեք դատապարտում:

- Ուշադիր նայեք, իմ հարցազրույցը հեռուստատեսությամբ ցույց են տվել, և էդ շուկայի մասին էնտեղ խոսք է եղել: Ես իմ կարծիքն ասել եմ, բայց էդ չեն նկատում, իսկ պալատկայի հարցը նկատում են:

- Ինչո՞ւ որպես Երևանի ավագանու՝ մշակութային հարցերով զբաղվող անդամ չեք պայքարում Փակ շուկայի անօրինական շինարարության դեմ:

- Ի՞նչ անեմ, փողոցներում ման գամ ու գոռա՞մ իմ կարծիքը: Ես փողոցում որևէ բան չեմ սիրում կատարել, ես փողոցային ակցիաներ չեմ ընդունում, իմ էությամբ էդ տեսակ մարդ եմ:

- Ո՛չ, որպես ավագանու անդամ ինչո՞ւ որևէ նախաձեռնությամբ հանդես չեք գալիս:

- Հիմա ես ասել եմ՝ պուլիմյոտ վերցնեմ, կրակե՞մ, չեմ հասկանում: Հարցը քննարկվում է, ես իմ կարծիքն ասել եմ, որ կտրականապես չեմ ընդունում էն, ինչ կատարվում է շուկայի հետ: Ես դա ասել եմ բոլոր տեղերում, որտեղ պետք է, որտեղ քննարկվում է, ես դա ասել եմ: Պիտի գամ, հաշվետվությո՞ւն տամ ձեզ: Ես ասել եմ՝ կատեգորիկ դեմ եմ Փակ շուկայի որևէ քարին ձեռք տալուն: Եվ էդ ասել եմ հարյուր տեղ՝ բարձր ատյաններում, միջին, ցածր:

- Դուք Երևանի ավագանու գործունեությունը արդյունավե՞տ եք գնահատում եք: Ի՞նչ խնդիրներ է հաջողվել լուծել ավագանուն:

- Բացե՛ք քաղաքապետարանի կայքը, այնտեղ ամեն ինչ գրված է:

- Տեսանելի աշխատանքի մասին եմ հարցնում, ոչ թե գրված ծրագրերի:

- Նայեք և քաղաքացիներին պատմեք: Կատարված աշխատանքն առանձին է ներկայացված, ծրագրերը՝ առանձին:

Մարի Ներսեսյան

Լուսանկարը`Առնոս Մարտիրոսյանի, yerevan.ru

© Medialab.am