15 համայնքներում «Քաղաացիական Պայմանագիր» կուսակցությունն թեկնածուներ էր առաջադրել, որոնցից չեն ընտրվել միայն երկուսը։
Այսօր ֆեյսբուքյան ուղիղ եթերի ժամանակ անդրադառնալով երեկ տեղի ունեցած ՏԻՄ ընտրություններին՝ հայտարարել է վարչապետի պաշտոնակատար Նիկոլ Փաշինյանը:
Կապան քաղաքում ՔՊ-ի թեկնածուի պարտությանը՝ Փաշինյանը պատմական արդյունք է համարել, քանի որ ազատ, արդար ընտրություններով իշխանության թեկնածուն պարտվել է։
«Մեր քաղաքական առաքելությունը իրականացրած կհամարեմ այն ժամանակ, երբ ազատ, արդար, թափանցիկ ընտրություններով կհեռանանք իշխանությունից»,- ասել է Փաշինյանը։
Վերջինս պատմական է համարել նաեւ այն, որ Էջմիածնում կին քաղաքապետ է ընտրվել:
Նա նաեւ խոսել է արտահերթ ընտրությունների եւ ԱԺ արձակման մասին՝ նշելով, որ վաղը լրանում է իր հրաժարականից հետո օրենքով սահմանված առաջին ժամկետը, եւ որ արտահերթ ընտրությունների գնալու համար ևս մեկ շաբաթ է անհրաժեշտ: Փաշինյանը հիշեցրել է, որ մյուս բոլոր խմբակցությունները հայտարարել են, որ այս ընթացքում վարչապետի թեկնածու չեն առաջադրելու, ու հիմա, նրա խոսքով, հարց է հնչեցվում, թե արդյո՞ք այս ընթացքում դավադրություններ հնարավոր են:
«Տեսականորեն կարող են լինել դավադրություններ: Եթե դա արվի, ապա ժողովուրդն իր խոսքը պետք է ասի: Նույն ճանապարհով կդիմեմ ժողովրդին, կոչ կանեմ հավաքվելու ու իր խոսքն ասելու: Այնպես որ՝ հետևեք իրադարձություններին: Լինենք մշտական կապի մեջ, որ հարցերի վերաբերյալ արագ արձագանքենք, միմյանց հետ կայացնենք որոշումեր: Մի բան ակնհայտ է՝ պետք է գնանք արտահերթի, և հույս ունեմ՝ քաղաքական ուժերը դրան հակասող գործողություն չեն անի»,- ասել է Փաշինյանը:
