«Մենք մենակ ենք մնացել». Տիգրան Խզմալյան

«Մենք մենակ ենք մնացել». Տիգրան Խզմալյան
«Մենք մենակ ենք մնացել». Տիգրան Խզմալյան
Հեղինակ MediaLab

«Նախախորհրդարանի» անդամ, կինոռեժիսոր Տիգրան Խզմալյանի Ֆեյսբուքյան գրառումն ամբողջությամբ ներկայացնում ենք ստորեւ:
«Հայրենակիցներ, մենք մենակ ենք մնացել: Մենք չունենք կառավարություն, խորհրդարան, դատարաններ ու ոստիկանություն: Դրանք բոլորը օտարին ծախված ու վախվորած քրեական խմբավորումներ են: Մենք դեռեւս ունենք բանակ, այն էլ միայն մի պատճառով` այնտեղ մեր զավակներն են ծառայում, այլ ոչ թե փողով տեղ առած ու մեզնից այդ փողը մսխող գողերը:

Մենք մենակ ենք մնացել: Եւ դա սարսափելի չէ, քանզի եթե մենք պատրաստ ենք պաշտպանվելու` մեզ կօգնեն: Կռվողին են օգնում: Այժմ ամեն ինչ մեզնից է կախված, այսինքն` մեր ամեն ինչը: Եկեք նախեւառաջ տարբերենք գլխավորը երկրորդականից: Բոլոր պարտադիր ու հարկադիր վճարումները, բոլոր կարմիր գծերն ու երկնագույն երգիչները` հետո: Առաջնահերթն է ազգի ու պետականության գոյությունն ու անվտանգությունը:

Սերժ Սարգսյանը անչափ դժբախտ մարդ է` կարծում եմ, նա ինքն է հասկանում դա եւ միգուցե ժամանակն է եկել, որ հայ ժողովուրդն օգնի իր մոլորված զավակին:

Մեր փրկության կարեւոր գրավականն է Սերժ Սարգսյանի անցնցում հեռացումը իշխանությունից, որը թույլ կտա թոթափել մեզ վրա փաթաթված սարդոստայնը եւ ազատել մեր ազգն ու երկիրը խայտառակ ու վտանգավոր պայմանավորվածություններից, որ ստորագել է նա:

Ինքնուրույն Սերժ Սարգսյանը ի վիճակի չէ պատռել կապանքները` չափազանց մեծ է նրա անձնական կախվածությունը: Մենք մեր շղթաներից բացի կորցնելու բան չունենք: Ստիպենք նրան ընդունելու մեր օգնությունը: Այս տխրահռչակ խմբավորումը, որը «կոչված» է ներկայացնելու Հայաստանը աշխարհում` նույնպես պետք է հեռանա:

Պատերազմի տարիներին կեղծված խմիչք ու ներքնազգեստ դզող-փչողները ոչ իրավունք ունեն, ոչ էլ որեւե ունակություն խոսալու, վիճելու, նստելու աշխարհի մեծերի հետ, որոնց հակադրվել ու տեղը դնել կարող են միմիայն մեր ժողովրդական ազատ քվեն ստացած մարդիկ:

«Իմփիչմենթ» ծուռ բառն այստեղ չի անցնում` մենք ժողովրդական քվեարկությամբ, հենց փողոցներում ու հրապարակներում պետք է որոշում կայացնենք: Պատրաստվեք: Ամեն ինչ հետայսու մեզնից է կախված` հենց ձեզնից: Ու չվախենանք, որ մենակ ենք` երբ հավաքվենք ու կանգնենք ուս-ուսի, ինչպես քսանհինգ տարի առաջ, կտեսնենք, որ այդքան էլ քիչ չենք:

Մի ողջ ազգ»:

© Medialab.am