Երևանի ավագանու «Լույս» խմբակցությունը Երևանի քաղաքապետ Հայկ Մարությանի հրաժարականի պահանջով ստորագրահավաքին միանալու առաջարկություն չի ստացել: Այդ մասին «Մեդիալաբին» տեղեկացրեց Երևանի ավագանու «Լույս» խմբակցության անդամ Անի Խաչատրյանը:
«Նման առաջարկ լինելու դեպքում կքննարկենք: «Լույս» խմբակցությունում ներկայացված է փաստացի երեք տարբեր ուժ և չգիտեմ՝ իր որոշման մեջ միաձայն կլինի՞, թե ոչ: Միգուցե կլինի միասնական որոշում խմբակցության ներսում: Չեմ կարող աել», -փոխանցեց Անի Խաչատրյանը:
Ավելի վաղ 24news.am-ը գրել էր, որ Երևանի քաղաքապետ Հայկ Մարությանն ամենայն հավանականությամբ առաջիկա 10 օրվա մեջ պաշտոնանկ կարվի։ Վկայակոչելով իր աղբյուրներին, լրատվամիջոցը գրել էր, որ քաղաքապետարանի ավագանու 60 անդամից մոտ 48-ը համապատասխան ստորագրություն են հավաքել, ընդ որում, ոչ միայն իշխանական խմբակցությունից:
Անի Խաչատրյանը փոխանցեց, որ քաղաքապետի հրաժարականի պահանջի համար բավարար է ավագանու 33 անդամի ստորագրությունը:
Փորձեցինք տեղեկությունը մեկնաբանելու համար կապ հաստատել նաև Երևանի ավագանու «Իմ քայլը» խմբակցության ղեկավար Արմեն Գալջյանի հետ, սակայն վերջինը համառորեն չէր պատասխանում հեռախոսազանգերին:
MediaLab.am
