Հայաստանի խորհրդարանը երկրորդ ընթերցմամբ եւ ամբողջությամբ ընդունել է «Կառավարության կառուցվածքի եւ գործունեության մասին» օրենքում փոփոխությունների նախագիծը` 79 կողմ, 41 դեմ, 1 ձեռնպահ ձայների հարաբերակցությամբ:
«Բարգավաճ Հայաստան» եւ «Լուսավոր Հայաստան» խմբակցությունները նախապես հայտարարել էին, որ դեմ է քվեարկելու։ Ընդդիմադիր խմբակցությունների դժգոհությունը օպտիմալացման հետեւանքվ տեղի ունեցող կրճատումների վերաբերյալ էր, ինչպես նաեւ «սուպերնախարարություններ» ստեղծելու, ինչպիսիք են, օրինակ, Տարածքային կառավարման եւ ենթակառուցվածքների նախարարությունը կամ կրթության, գիտության, մշակույթի եւ սպորտի նախարարությունը:
Հայաստանի նախարարությունների թիվն, այսպիսով, 17-ից դառնալու է 12: Առաջին փոխվարչապետի պաշտոնը վերացվելու է, լինելու են երկու փոխվարչապետ:
Գործելու են հետեւյալ նախարարությունները.
- աշխատանքի եւ սոցիալական հարցերի նախարարությունը,
- առողջապահության նախարարությունը,
- արդարադատության նախարարությունը,
- արտակարգ իրավիճակների նախարարությունը,
- արտաքին գործերի նախարարությունը,
- կրթության, գիտության, մշակույթի եւ սպորտի նախարարությունը,
- շրջակա միջավայրի նախարարությունը,
- պաշտպանության նախարարությունը,
- տարածքային կառավարման եւ ենթակառուցվածքների նախարարությունը,
- բարձր տեխնոլոգիաների արդյունաբերության նախարարությունը,
- Էկոնոմիկայի նախարարությունը,
- ֆինանսների նախարարությունը:
