Քիչ առաջ Ժառանգության խոսնակ Հովսեփ Խուրշուդյանը ֆեյսբուքյան իր էջում կատարել է հետևյալ գրառումը.
«Ապրիլի 1-ին, ժ. 00:00-ին լրատվամիջոցներից մեկը մի «լուր» է տարածել, թե իբր Սերժ Սարգսյանն ու Րաֆֆի Հովհաննիսյանը սուրճ են խմում «Մեղեդի» սրճարանում: Ու իբր նրանք անթաքույց զրույցի են բռնվել բազմաթիվ մարդկանց ներկայությամբ միաբերան հայտարարել, որ համաձայնության են եկել և շուտով հանդես կգան համատեղ հայտարարությամբ: Ցավում ենք, բայց «հումորը» չստացվեց, քանի որ այս լարված իրավիճակում սա ավելի շուտ ապատեղեկատվություն էր»:
Հիշեցնենք ,որ 168.am լրատվական կայքը տարածել էր հետևյալ բովանդակությամբ լուր.
«Քիչ առաջ 168.am-ի թղթակիցը ականատես է եղել՝ ինչպես են ՀՀ նախագահ Սերժ Սարգսյանն ու այսօր հացադուլից դուրս եկած «Ժառանգություն» կուսակցության առաջնորդ Րաֆֆի Հովհաննիսյանը սուրճ խմում դաշնակցականներին պատկանող «Մեղեդի» սրճարանում:
Սերժ Սարգսյանը և Րաֆֆի Հովհաննիսյանն անթաքույց զրույցի են բռնվել բազմաթիվ մարդկանց ներկայությամբ և մեծ սիրով պատասխանել են մեր թղթակցի հարցերին: Նրանք միաբերան հայտարարել են, որ համաձայնության են եկել և շուտով հանդես կգան համատեղ հայտարարությամբ:
Մանրամասները կներկայացնենք քիչ անց»: