Ինժեներական ստորաբաժանումների ռուս զինծառայողները շարունակում են ինժեներական հետախուզության և տեղանքի ականազերծման աշխատանքները ԼՂ-ում ռուս խաղաղապահների պատասխանատվության գոտիներում: Ինչպես հաղորդում է «Արմենպրես»-ը, այս մասին հայտնում է ՌԴ պաշտպանության նախարարությունը:
Ռուսական ինժեներական ստորաբաժանումները իրականացնում են ինժենարական հետախուզության և ականազերծման աշխատանքներ խաղաղապահական դիտակետերի միջև ընկած տարածքներում և ընդհանուր օգտագործման ճանապարհահատվածներում: Նրանք իրականացնում են նաև ուսումնասիրություն և ականազերծման աշխատանքներ բնակավայրերի և սոցիալական ենթակառուցվածքների մոտ:
Հայտնաբերված զինամթերքը և պայթյունավտանգ առարկաները տեղափոխվում են զորավարժարան, որտեղ ոչնչացվում են պայթեցման եղանակով: Զինամթերքը, որը հնարավոր չէ հասցնել զորավարժարան, ոչնչացվում է տեղում՝ միաժամանակ ապահովելով անվտանգությունը:
Պայթյունավտանգ առարկաներ հայտնաբերելու համար տեղանքի ուսումնասիրության աշխատանքի փուլերից մեկն այն տարածքների հետազոտությունն է, որտեղ կառուցվելու են ստացիոնար կետեր՝ ռուս խաղաղապահներին ծառայություններ մատուցելու համար:
Ականազերծմանը մասնակցող զինծառայողներն ապահովված են ականազերծման աշխատանքների իրականացման համար նախատեսված ժամանակակից պաշտպանիչ հագուստով և ունեն պայթյունավտանգ առարկաների որոնման ժամանակակից միջոցներ՝ ական որոնող ИМП-С2 միջոցներ և ИНВУ-3М որոնիչներ:
