Հայ Յեղափոխական Դաշնակցության Արցախի Երիտասարդական և «Արամ Մանուկյան» ուսանողական միությունների նախաձեռնությամբ Ստեփանակերտում կազմակերպվել է ավանդական ջահերով երթ՝ նվիրված Հայոց ցեղասպանության 106-րդ տարելիցին, որին մասնակցել են հազարավոր արցախցիներ:
Երթի ընթացքում ՀՅԴ Արցախի երիտասարդական միության երիտասարդները վառել են Ադրբեջանի և Թուրքիայի դրոշները՝ ի նշան բողոքի և ընդդեմ թուրք-ադրբեջանական շարունակվող հայատյացության։
Ստեփանակերտի հուշահամալիրում խոսքով հանդես են եկել Արցախի թեմի առաջնորդ Վրթանես եպիսկոպոս Աբրահամյանը, ՀՅԴ ԿԿ անդամ Սերգեյ Շահվերդյանը, ՀՅԴ Բյուրոյի Երիտասարդական գրասենյակի պատասխանատու Արշակ Մեսրոպյանը, ՀՅԴ Արցախի Երիտասարդական միության ներկայացուցիչ Վահագն Խաչատրյանը:
