ԱԺ փոխխոսնակ Լենա Նազարյանն այսօր լրագրողների հետ ճեպազրույցում հայտարարեց, որ չի պատրաստվում ներողություն խնդրել ԱԺ պատգամավոր Թագուհի Թովմասյանից:
«Տիկին Թովմասյանն ինքը նախ պետք է ներողություն խնդրի, որ լինելով «Իմ քայլը» խմբակցության անդամ, իրականում եղել է ոչ թե թիմի անդամ և պատգամավոր, այլ իր թերթի թղթակից: Նա խմբակցության նիստերին մասնակցել է բացառապես այդ նպատակով:
Թող Թագուհի Թովմասյանը ներողություն խնդրի, որ եկել է մեր խմբակցություն, մեր ցուցակ, առաջին իսկ հարմար պահին մեր երեսին դուռը շրխկացնելու եւ հաջորդ ցուցակ գնալու համար, այնտեղից օգուտներ ստանալու և երևի հաջորդ ցուցակ անցնելու համար:
Թող ինքը ներողություն խնդրի նրա համար, որ լինելով խմբակցության անդամ ամբողջ պատերազմի ընթացքում, պարտությունից հետո դուրս է եկել խմբակցությունից և հայտարարել, որ պատասխանատվությունը մերն է, այն դեպքում, երբ ողջ պատերազմի ընթացքում ինքը նույնպես եղել է խմբակցության անդամ»,-հայտարարեց Լենա Նազարյանը:
Նա անպատասխան թողեց հարցը՝ ինչպես կարձագանքեր, երբ իրեն «իդիոտկա» անվանեին ու հեռացավ:
