Հյուսիսային պողոտայում այսօր երեկոյան կայացել է «Համերաշխություն փողոցային երաժիշտներին» ակցիան, որը կազմակերպվել էր՝ ի աջակցություն երեկ երեկոյան բերման ենթարկված ուկրաինացի երաժիշտների:
Երեկոյան Հյուսիսային պողոտա են այցելել նաև ՀՀ ոստիկանապետ Վալերի Օսիպյանը և Մշակույթի նախարար Լիլիթ Մակունցը: Օսիպյանը մոտեցել է ուկրաինացի երաժշտին, զրուցել նրա հետ, հետաքրքրվել՝ արդյոք նա որևէ պահանջ ունի ոստիկանության նկատմամբ, նաև հորդորել է ենթարկվել ոստիկանների օրինական պահանջներին, ավելի ցածր նվագել, իսկ երեկոյան ժամը 23:00-ից հետո դադարեցնել նվագելը՝ բնակիչների անդորրը չխաթարելու համար:
Հիշեցնենք, որ նախօրեին ոստիկանները թևերը ոլորելով բերման էին ենթարկել Հյուսիսային պողոտայում նվագող՝ Ուկրաինայի երկու քաղաքացիների։
Կատարվածն արձանագրել և «Հալածանք Հյուսիսային պողոտայի երաժիշտների հանդեպ» վերնագրով գրառումով տեսանյութն իր ֆեյսբուքյան էջում տեղադրել էր հրապարակախոս Վահրամ Մարտիրոսյանը։ Այն դժգոհության ալիք էր բարձրացրել սոցցանցերում: