Լեռնային Ղարաբաղում Կարմիր Խաչի միջազգային կոմիտեի (ԿԽՄԿ) աշխատանքի հիմնական առանցքը զոհված զինվորների մարմինների որոնումն է, որոնք այնուհետ հանձնվում են նրանց ընտանիքներին: Այս մասին ՏԱՍՍ-ին տված հարցազրույցում ասել է ԿԽՄԿ տարածաշրջանային պատվիրակության ղեկավար Իխտիյար Ասլանովը:
«Ստեղծված իրավիճակից ելնելով՝ քննարկվում են նաև այլ հումանիտար հարցեր, ինչպես, օրինակ, էսկալացիայի ընթացքում ավերված ենթակառուցվածքների, առանձնատներ և այլ կառույցների վերականգնումը»,- հավելել է նա:
Ասլանովը նաև հայտնել է, որ կազմակերպությունը հումանիտար հարցերով սերտորեն համագործակցում է Լեռնային Ղարաբաղում ռուս խաղաղապահների հետ:
«Տարածաշրջան ռուսական խաղաղապահ ուժերի ժամանումից ի վեր մենք աշխատում ենք նրանց հետ, և մեր համագործակցությունը շատ սերտ է: Իմ գործընկերները շատ հաճախ հանդիպում են խաղաղապահ ուժերի հրամանատարության և դաշտերում գտնվող զինվորների ու սպաների հետ»,- հայտնել է նա։
Ըստ նրա՝ ԿԽՄԿ-ն Լեռնային Ղարաբաղի սահմանամերձ տարածքներ մուտք գործելու թույլտվություն է ստացել ինչպես հայկական, այնպես էլ ադրբեջանական կողմից:
«Մեզ համար կարևոր հարցերից մեկը հասանելիությունն է անվտանգության տեսանկյունից։ Գիտեք՝ իրավիճակը տարբեր կերպ է զարգանում, հատկապես՝ Ադրբեջանի ու Հայաստանի միջազգային սահմանի երկայնքով։ Եվ մեզ համար կարևորագույն հարցերից մեկը մեր գործընկերների անվտանգությունն է, որոնք կարող են այնտեղ աշխատել։ Մենք մուտք ունենք ինչպես Ադրբեջանի, այնպես էլ Հայաստանի կողմից»,- ասել է նա։
Աղբյուր՝ Factor.am
