Հայաստանի արտաքին գերատեսչությունը արձագանքել է Ստամբուլում՝ Թուրքիայի, Իրանի և Ադրբեջանի արտգործնախարարների ընդունած հռչակագրին:
«Ազատություն» ռադիոկայանի փոխանցմամբ, ՀՀ ԱԳՆ-ն հիշեցրել է, որ «ղարաբաղյան հիմնախնդրի հանգուցալուծման միջազգային մանդատ ունեցող միակ ձևաչափը ԵԱՀԿ Մինսկի խմբի համանախագահությունն է»։
«Դրա շրջանակներում ամրագրված են հակամարտության կարգավորման սկզբունքները, որոնք ներկայացված են որպես մեկ ամբողջություն: Այդ սկզբունքների նկատմամբ ընտրովի վերաբերմունքը որևէ կերպ չի նպաստում խաղաղ կարգավորման ուղղությամբ ձեռնարկվող ջանքերին: Մինսկի խմբի համանախագահության շրջանակներից դուրս, դրան հակասող ձևակերպումներն արհեստածին են ու որևէ աղերս չունեն հիմնահարցի կարգավորման հետ»,- հայտարարել է Հայաստանի արտգործնախարարության մամուլի խոսնակ Աննա Նաղդալյանը։
Ղարաբաղյան հակամարտությունը Թուրքիայի, Իրանի և Ադրբեջանի արտգործնախարարների` նախօրերին Ստամբուլում կայացած եռակողմ հանդիպման օրակարգային թեմաներից մեկն էր: Բանակցությունների ավարտին հաստատված հռչակագրում Մեվլութ Չավուշօղլուն, Մոհամադ Ջավադ Զարիֆը և Էլմար Մամեդյարովը կոչ են արել տարածաշրջանում առկա հակամարտությունները լուծել խաղաղ միջոցներով` տարածքային ամբողջականության սկզբունքի վրա հիմնվելով:
