Հայկ Մարությանը պաշտոնական այցով Սանկտ Պետերբուրգում էր․ տեսանյութ

Սանկտ Պետերբուրգի նահանգապետ Ալեքսանդր Բեգլովի հրավերով, նոյեմբերի 29-ից դեկտեմբերի 1-ը Երևանի պատվիրակությունը՝ քաղաքապետ Հայկ Մարությանի գլխավորությամբ, պաշտոնական այցով ՌԴ հյուսիսային մայրաքաղաքում էր:

Այդ մասին հայտնում են Երեւանի քաղաքապետարանից։

Պետերբուրգցի գործընկերների ուղեկցությամբ երևանյան պատվիրակության անդամները նախ այցելել են Պիսկարյովյան հուշահամալիր` հարգանքի տուրք մատուցել Լենինգրադի պաշարման զոհերի, ինչպես նաև քաղաքի պաշտպանության ժամանակ իրենց կյանքը զոհաբերած հայորդիների հիշատակին:

***

Երևանի և Սանկտ Պետերբուրգի ղեկավարների պաշտոնական հանդիպումը կայացավ ՌԴ հյուսիսային մայրաքաղաքի վարչակազմի նստավայրում` Սմոլնիում: Ընդլայնված կազմով հանդիպմանը հաջորդեց համագործակցության հնգամյա ծրագրի ստորագրման պաշտոնական արարողությունը: Սանկտ Պետերբուրգի նահանգապետ Ալեքսանդր Բեգլովն ու Երևանի քաղաքապետ Հայկ Մարությանը երկու քաղաքների միջև ստորագրեցին 2021-2025թթ. համագործակցության «Ճանապարհային քարտեզը»: Հագեցած օրակարգով այցն ընդգրկում էր քաղաքային տնտեսության տարբեր ուղղություններ: Երևանի քաղաքապետ Հայկ Մարությանն այցելեց քաղաքի կառավարման մի շարք կառույցներ, տեղում ծանոթացավ աշխատանքներին: Սանկտ Պետերբուրգի «Անվտանգ քաղաք» միասնական կառավարման կենտրոնն է: Այն հնարավորություն է ստեղծում թեժ գծին ստացած զանգերի, ինչպես նաև քաղաքում տեղադրված շուրջ 45 հազար տեսախցիկների միջոցով ապահովել քաղաքի բնակչության ենթակառուցվածքների անվտանգությունը, գրանցել արտակարգ պատահարները կամ կոմունալ ոլորտում առացաջած խնդիրները: Քաղաքապետ Հայկ Մարությանին ներկայացվեց քաղաքային տրանսպորտի կառավարման կենտրոնի աշխատանքը:

***

Սանկտ Պետերբուրգում թափառող կենդանիների հավաքման, բուժման ու որդեգրման գործընթացով զբաղվում է 2006-ից գործող պետական անասնաբուժական կլինիկան: Այցի ընթացքում քաղաքապետը ծանոթացավ կառույցի հարմարություններին ու հնարավորություններին, տեխնիկական հագեցվածությանը: 2019-ից ի վեր Երևանը ևս կոնկրետ քայլեր է ձեռնարկում ոլորտի կանոնակարգման ուղղությամբ: Հայկ Մարությանը կարևորեց Երևանի «Թառառող կենդանիների վնասազերծման կեոնտրոն» ՀՈԱԿ-ի և Սանկտ Պետերբուրգի անասնաբուժական կլինիկայի միջև կապերի հաստատումն ու փորձի փոխանակումը:

***

Երևանի և Սանկտ Պետերբուրգի միջև հաստատված ջերմ հարաբերությունների լավագույն օրինակներից են նաև Էրմիտաժի հետ հաստատված կապերը: Այցի ընթացքում քաղաքապետ Մարությանը Էրմիտաժում հանդիպեց նաև Պետական թանգարանի տնօրեն, Երևանի պատվավոր քաղաքացի Միխայիլ Պիատրովսկու հետ:

***

Երևանի և Սանկտ Պետերբուրգի եղբայրական ու գործընկերային հարաբերություններն առաջիկա հինգ տարիներին «Ճանապարհային քարտեզով» կզարգանան առևտրատնտեսական, գիտատեխնիկական, մշակութային ու քաղաքային տնտեսության մի շարք այլ ոլորտներում իրականացվող ծրագրերով: Փոխայցելությունների հաջորդ կանգառը կլինի Երևանում: Քաղաքապետ Մարությանը նահանգապետ Բեգլովին հրավիրեց փոխադարձաբար այց կատարել Երևան: