Մեկ օրում Հայաստանում արձանագրվել է ճանապարհատրանսպորտային 10 պատահար

Ըստ ոստիկանության օպերատիվ հաղորդագրությունների ամփոփագրերի՝ ապրիլի 13-ից 14-ը Հայաստանի Հանրապետության ոստիկանության ստորաբաժանումները բացահայտել են հանցագործության 71 դեպք, որից 14-ը՝ նախկինում կատարված։

Մասնավորապես՝ անձնական ունեցվածքի գողության՝ 15, խարդախության՝ 14, մարմնական վնասվածք պատճառելու՝ 7, թմրամիջոցի հայտնաբերման` 6, ծանր վիրավորանքի՝ 4, զենք-զինամթերքի առգրավման՝ 2, յուրացնելու կամ վատնելու, կաշառակերության, պաշտոնեական լիազորությունների չարաշահման, պաշտոնեական կեղծիքի կամ անփութության, ծեծի, խոշտանգման, առողջությանը ծանր վնաս պատճառելու սպառնալիքի, անզգուշությամբ գույքային վնաս պատճառելու և ընտանեկան բռնության՝ 1-ական դեպք։

Հայտնաբերվել է 1 անհետ կորած, 6 հետախուզվող։ Կամավոր ներկայացել է 2 հետախուզվող։
Գրանցվել է զենք-զինամթերքի կամավոր հանձնման 4 դեպք։

Նախկինում կատարված հանցագործություններից բացահայտվել է անձնական ունեցվածքի գողության՝ 11, սպանության փորձի, մարմնական վնասվածք պատճառելու և վրաերթի 1-ական դեպք։

Անցած 1 օրվա ընթացքում հանրապետությունում արձանագրվել է ճանապարհատրանսպորտային 10 պատահար. 12 մարդ ստացել է տարբեր աստիճանի մարմնական վնասվածքներ: