Հունիսի 5-ին ԱԺ «Հայաստան» խմբակցության պատգամավոր Ագնեսա Խամոյանը ֆեյսբուքյան իր էջում գրել էր, որ իր տեղեկություններով, վարչապետ Նիկոլ Փաշինյանը որոշել է Ֆրանսիայի հրապարակից հեռացնել ընդդիմության «Դիմադրություն» շարժման վրանները։
«․․․իմ տեղեկություններով, Նիկոլը որոշում է կայացրել Վոլոդինի և Լավրովի այցերի կապակցությամբ ոստիկանական ուժերով հանել Ֆրանսիայի հրապարակի վրանները։ Նիկոլ, հասկացիր, վրան Ֆրանսիայի հրապարակում կլինի, թե՝ ոչ, քաղաքական ճգնաժամը երկրում խորանում է ու խորանում, ելքը լինելու է քո հրաժարականը»,- գրել էր պատգամավորը։
Խմբագրված գրառումը թյուրըմբռնման, ապա՝ մանիպուլյացիայի առիթ
Պատգամավորն իր այս գրառումը խմբագրել է երկու անգամ․ դրա նախնական տարբերակում Ֆրանսիայի հրապարակի վրաններին վերաբերող հատվածում նախադասության ենթական զեղչված է՝ «․․․որոշում է կայացրել Վոլոդինի և Լավրովի այցերի կապակցությամբ ոստիկանական ուժերով հանել Ֆրանսիայի հրապարակի վրանները»։
Ավելի ուշ խմբագրված տարբերակներում արդեն այդ նախադասության մեջ Խամոյանն ավելացրել է «Նիկոլ» բառը։ Սակայն լրատվականների մեծ մասն արդեն արտատպել էր Խամոյանի գրառման նախնական՝ չխմբագրված տարբերակը և ըստ այդմ վերնագրեր ընտրել։ Օրինակ՝ News.am-ը Խամոյանի գրառումը հրապարակել է հետևյալ վերնագրով․ «Որոշում է կայացրել Վոլոդինի և Լավրովի այցերի կապակցությամբ հանել Ֆրանսիայի հրապարակի վրանները. Պատգամավոր», և միայն ավելի ուշ ավելացրել է «Նիկոլ» անունը։
Զեղչված ենթական սոցիալական մեդիայում ևս թյուրըմբռնման, ապա նաև մանիպուլյացիաների առիթ է դարձել։
Մասնավորապես, «Իրազեկ քաղաքացիների միավորում» ՀԿ ծրագրերի ղեկավար Դանիել Իոաննիսյանը գրառում է արել, որը կարդացողի մոտ կարող է տպավորություն առաջացնել, թե իբր «Դիմադրություն» շարժումն է որոշել հեռացնել վրանները՝ ՌԴ ԱԳ նախարար Սերգեյ Լավրովի ու Պետդումայի խոսնակ Վյաչեսլավ Վոլոդինի՝ Երևան այցին ընդառաջ։ Նրա այս գրառումը բավական տարածում է ունեցել սոցմեդիայում։
«Եթե այս մարդիկ (ընդդիմությունը-խմբ․) Լավրովի ու Վոլոդինի համար պատրաստ են Ֆրանսիայի հրապարակը բացել, ապա վախենում եմ պատկերացնել, ի՞նչն են պատրաստ բացել Պուտինի համար»,- գրել է Իոաննիսյանը։
Խամոյանն արձագանքել է Իոաննիսյանի այս գրառմանը՝ իր հերթին մի քանի սխալ պնդումներ անելով, մասնավորապես, թե Դանիել Իոաննիսյանը «Փաստերի ստուգման հարթակի» ղեկավարն է։
«Պատկերացնո՞ւմ եք, Դանիելը, դրա համար մեծ գրանտ է ստացել, ընդդիմության (ձևի համար երբեմն էլ իշխանության ստորին օղակների) խոսքերի անհամապատասխանություններն ու ստերն է իբր բացահայտում, իսկ ինքը՝ լինելով Նիկոլի սպասարկուն, առանց ամոթի, խեղաթյուրում է երեկվա իմ գրառումը։ Տիպիկ Նիկոլ է, Նիկոլի դեմքը նաև Դանիելն է, արևմուտքից միլիոնավոր դոլարների գումարներ են ստանում փաստերի խեղաթյուրման համար»,- գրել է պատգամավորը։
«Փաստերի ստուգման հարթակը» «Իրազեկ քաղաքացիների միավորում» ՀԿ նախագծերից է, որը ղեկավարում է գլխավոր խմբագիրը։ FIP.am-ի խմբագրական քաղաքականության հետ Դանիել Իոաննիսյանն առնչություն չունի։
Խամոյանը պնդել է նաև, որ «Փաստերի ստուգման հարթակը» դրամաշնորհ է ստացել միայն ընդդիմության և «ձևի համար երբեմն էլ իշխանության ստորին օղակների» ստերն «իբր բացահայտելու» համար։ Բավական է FIP.am կայքի որոնման դաշտում փնտրել երկրի իշխանության բարձրագույն օղակների՝ վարչապետ Նիկոլ Փաշինյանի, ԱԺ նախագահ Ալեն Սիմոնյանի, կառավարության անդամների ու ՔՊ-ական պատգամավորների անունները, կարելի է նկատել տասնյակ հրապարակումներ, որոնք բացահայտում են վերոհիշյալ պաշտոնյաների ստերը, մանիպուլյացիաները, կամ հետաքննություններ, որոնք ողջամիտ կասկած են հարուցում պաշտոնյաների կոռումպացվածության վերաբերյալ։
Այսպիսով, «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը մանիպուլացրել է պատգամավոր Խամոյանի խոսքը՝ ներկայացնելով, թե իբր ընդդիմությունն է պատրաստվում մաքրել վրաններից Ֆրանսիայի հրապարակը։ Միևնույն ժամանակ, պատգամավորն իր պատասխան գրառման մեջ ոչ ճիշտ և մանիպուլյատիվ պնդումներ է արել «Փաստերի ստուգման հարթակի» մասին։
Նանե Մանասյան
Fip.am
