Գեորգի Ավետիսյանը ՍԱՏՄ նախագահի պաշտոնից ազատման դիմում է գրել

Սննդամթերքի անվտանգության տեսչական մարմնի ղեկավար Գեորգի Ավետիսյանը պաշտոնից ազատման դիմում է ներկայացրել:Այդ մասին տեղեկանում է Գեորգի Ավետիսյանի «Ֆեյսբուք»-ի էջում կատարված գրառումից:

«Հարգելի ընկերներ, հարազատներ, հետևորդներ ծանոթներ և անծանոթներ։

Այսօր Հայաստանի Հանրապետության վարչապետ Նիկոլ Փաշինյանին եմ ներկայացրել պաշտոնից ազատման դիմում։

Ուզում եմ շնորհակալություն հայտնել պարոն վարչապետին՝ ինձ՝ նման պատասխանատու պաշտոնը վստահելու և աջակցելու համար, ուզում եմ շնորհակալություն հայտնել Էդուարդ Աղաջանյանին, Արսեն Թորոսյանին և Արայիկ Հարությունյանին համագործակցության համար, շնորհակալություն եմ հայտնում, բոլոր տնտեսվարողներին, որոնց մոտ ստուգումների արդյունքում խախտումներ չեն հայտնաբերվել, բոլոր հասարակական կազմակերպություններին, որոնք քննադատել են մեզ և մեր աշխատանքը և նպաստել խնդիրների լուծմանը:

Շնորհակալ եմ բոլոր միջազգային կառույցներին, որոնք աջակցել, աջակցում ու աջակցելու են ոլորտի կայացման համար: Շնորհակալություն լրագրողներին, որոնք սուր հարցեր են բարձրացրել և մեր ուշադրությունը սևեռել խնդիրների վրա: Շնորհակալ եմ ոլորտի կրթական և գիտական կառույցներին, շնորհակալ եմ բոլոր պետական կառույցներին, որոնց հետ համագործակցել եմ, շնորհակալ եմ պահանջատեր սպառողներին։

Ինչ եմ արել ոլորտի համար՝ թող գնահատականը տան մասնագետներն ու հանրություն, ինչ չեմ հասցրել անել՝ կարծում եմ՝ ինձանից հետո եկողները կանեն։

Որոշումն իմն է և ավելացնելու բան չունեմ։

Ինչով եմ զբաղվելու՝ ժամանակը ցույց կտա»,- գրել է ՍԱՏՄ ղեկավարը: