Ռուսաստանի արտաքին գործերի նախարար Սերգեյ Լավրովը հեռախոսազրույց է ունեցել Ադրբեջանի արտաքին գործերի նախարար Ջեյհուն Բայրամովի հետ։ Ինչպես հաղորդում է Ռուսաստանի արտաքին գործերի նախարարությունը, հեռախոսազրույցը կայացել է ադրբեջանական կողմի նախաձեռնությամբ։
«Մտքեր են փոխանակվել միջազգային և տարածաշրջանային օրակարգի առավել արդիական հարցերի շուրջ։ Հատուկ ուշադրություն է հատկացվել նախկինում համաձայնեցված քայլերը գործնականում կյանքի կոչելու անհրաժեշտությանը՝ ուղղված Լեռնային Ղարաբաղի շուրջ իրավիճակի շուտափույթ դեէսկալացմանը, այդ թվում՝ հումանիտար երթուղիների ապաշրջափակմանը, ներառյալ Լաչինի միջանցքը։
Ընդգծվել է, որ Ռուսաստանի, Հայաստանի և Ադրբեջանի ղեկավարների եռակողմ պայմանավորվածությունների ամբողջ համալիրի իրականացումն այլընտրանք չունի՝ Երևանի և Բաքվի միջև հարաբերությունների կայուն կարգավորման հասնելու համար»,- «Արմենպրես»-ի փոխանցմամբ՝ ասված է Ռուսաստանի արտաքին գործերի նախարարության տարածած հաղորդագրության մեջ։
