Սահմանադրական դատարանը հրապարակեց Ռոբերտ Քոչարյանի դիմումի վերաբերյալ որոշումը՝ հակասահմանադրական ճանաչելով Քրեական դատավարության օրենսգրքի 35-րդ հոդվածը: Իսկ 135-րդ հոդվածը, ՍԴ որոշմամբ, համապատասխանում է Սահմանադրությանը:
ՍԴ-ում Քոչարյանի շահերը ներկայացնող փաստաբան Արամ Վարդևանյանը լրագրողներին ասաց, որ եթե Սահմանադրական դատարանն արձանագրում է, որ խախտվել է անձնական ազատության իրավունքը, նշանակում է, Քոչարյանի կալանավորումը չի կարող լինել իրավաչափ:
Լրագրողների հարցին, թե սա նշանակում է արդյոք, որ Ռոբերտ Քոչարյանը պետք է կալանքից ազատ արձակվի, Վարդևանյանը պատասխանեց. «Այո, կալանավորումը չի կարող կիրառվել այնքանով, որքանով 135 հոդվածը որևէ երաշխիք չի նախատեսում, թեև Սահմանադրությունը նման երաշխիք նախատեսում է»:
Ըստ փաստաբանի՝ Սահամանադրական դատարանի որոշումից հետո ընդհանուր իրավասության դատարանը չի կարող չփոխել Ռոբերտ Քոչարյանի խափանման միջոցը:
«ՍԴ որոշումը պատադիր է և դատական մարմինների համար, և գործադիր մարմնի, և բոլորի համար, չկատարելը քրեորեն հետապնդելի է: ՍԴ որոշումը նշանակում է՝ երկրորդ նախագահի կալանավորումը խախտել է իր անձնական ազատոթյան իրավունքը»,- հավելեց Վարդևանյանը:
