Ադրբեջանը բողոքի նոտա է հղել պաշտոնական Վաշինգտոնին` Միացյալ Նահանգների Կոնգրեսում Լեռնային Ղարաբաղի խորհրդարանի խոսնակ Աշոտ Ղուլյանի հետ կազմակերպված հանդիպումների կապակցությամբ։
Այդ մասին հաղորդում են ադրբեջանական ԶԼՄ-ները: Նույնիսկ Ադրբեջանի ԱԳՆ է հրավիրվել Ադրբեջանում Միացյալ Նահանգների գործերի հավատարմատար Ադամ Սթերլինգը։
Իր բողոքի նոտայում պաշտոնական Բաքուն դատապարտել է կոնգրեսականների հանդիպումը Ղարաբաղի իշխանությունների հետ եւ ընդգծել, որ «այդօրինակ այցերը ստվեր են գցում Ադրբեջանի եւ Միացյալ Նահանգների միջեւ հարաբերությունների վրա, հատկապես հաշվի առնելով այն հանգամանքը, որ Միացյալ Նահանգները հանդիսանում է խաղաղ բանակցությունները վարող միջնորդական խմբի անդամ»։
Ադրբեջանական ԶԼՄ-ների հաղորդմամբ, ի պատասխան իրենց բողոքի նոտայի` պաշտոնական Վաշինգտոնն արձագանքել է, թե «Աշոտ Ղուլյանի այցը Միացյալ Նահանգներ մասնավոր բնույթ է կրել, նա ժամանել է որպես Հայաստանի քաղաքացի եւ որեւէ պաշտոնական հանդիպում չի ունեցել»։
Պատասխան նամակում, ըստ ադրբեջանական ԶԼՄ-ների` Միացյալ Նահանգները նաեւ վերահաստատել է իր դիրքորոշումը՝ Ադրբեջանի տարածքային ամբողջականությունը ճանաչելու վերաբերյալ։
Այս աղմուկին զուգահեռաբար, Աշոտ Ղուլյանը շարունակում է ԱՄՆ հանդիպումները: Սեպտեմբերի 30-ին Ղուլյանը Վաշինգտոնի հետազոտական կենտրոնում /Carnegie Endownment For International Peace/ հանդիպել է Հարավային Կովկասի տարածաշրջանով զբաղվող փորձագետների հետ:
«Քննարկումների ընթացքում ԼՂՀ խորհրդարանի նախագահը ներածական խոսքով ներկայացրեց Արցախի դիրքորոշումը ղարաբաղյան հիմնախնդրի կարգավորման և տարածաշրջանային հրատապ խնդիրների ու գործընթացների վերաբերյալ: Այնուհետեւ տեղի ունեցավ հարց ու պատասխան, որի ժամանակ փորձագետները հնարավորություն ունեցան պարզաբանումներ ստանալ իրենց հետաքրքրող բազմաթիվ հարցերի մասին»,- տեղեկացնում է ԼՂՀ ԱԺ մամլո ծառայությունը:
Հոկտեմբերի 1-ին` այցի վերջին օրը, ԼՂՀ ԱԺ նախագահը աշխատանքային հանդիպում է ունեցել Ամերիկայի հայկական համագումարի ղեկավար մարմնի անդամների հետ:
«Զրույցի ընթացքում անդրադարձ կատարվեց Միացյալ նահանգներում Արցախին առնչվող հարցերի լայն շրջանակի` սկսած քաղաքական օրակարգի թեմաներից մինչև տնտեսական և մարդասիրական խնդիրները»,- տեղեկացնում է ԼՂՀ ԱԺ մամլո ծառայությունը:
Օրվա երկրորդ կեսին ԱՄՆ ՀՀ դեսպանատանը կազմակերպվել էր ընդունելություն` ի պատիվ ԼՂՀ Ազգային ժողովի նախագահի:
Մինչ այդ, սեպտեմբերի 28-ին Աշոտ Ղուլյանը հանդիպում է ունեցել ԵԱՀԿ Մինսկի խմբի ամերիկացի նախագահ Ռոբերտ Բրադկեի, Կոնգրեսի Ներկայացուցիչների պալատի արտաքին հարաբերությունների կոմիտեի նախագահ Հովարդ Բերմանի, ինչպես նաեւ մի քանի հայամետ կոնգրեսականների հետ:
© Medialab.am
