«Լեռնային Ղարաբաղում նախագահական երեք ընտրություններ են տեղի ունեցել, եւ բոլոր երեք նախագահներն ընտրվել են ժողովրդի կողմից։ Նրանցից ոչ մեկն իշխանությունը ժառանգություն չի ստացել, եւ այդ պատճառով էլ, ԼՂ ընտրված իշխանությունները, ի տարբերություն իրենց ատելությունը թաքցնել անկարող հարեւան երկրի իշխանությունների, իրենց թույլ չեն տա վիրավորական հայտարարություններ անել»,- այդ մասին այսօր` Լեհաստանի նախագահ Բրոնիսլավ Կոմորովսկու հետ համատեղ մամլո ասուլիսում հայտարարել է Հայաստանի նախագահ Սերժ Սարգսյանը:
Սարգսյանը այդ մասին խոսել է անդրադառնալով Ադրբեջանի նախագահ Իլհամ Ալիեւի կողմից հնչեցվող ռազմատենչ հայտարարություններին` հավելելով, թե հայ ժողովրդի հասցեին Իլհամ Ալիեւի՝ նախօրեին հնչեցրած արտահայտությունները հարիր չեն ոչ միայն երկրի ղեկավարին, այլեւ նորմալ մարդուն:
Սարգսյանն ասել է, թե «եւ ղարաբաղցիների, եւ հայ ժողովրդի պահանջը միակն է, որ խնդիրը պետք է լուծվի միջազգային իրավունքին համապատասխան, և այդ իրավունքի սկզբունքները շարադրված են «Մադրիդյան սկզբունքներ» կոչվող փաստաթղթում, որ կողմերին են առաջարկել Մինսկի խմբի համանախագահները՝ Միացյալ Նահանգները, Ֆրանսիան և Ռուսաստանը»:
«Մենք այլ պահանջ չունենք, այսինքն՝ մեր պահանջները համահունչ են միջազգային հանրության պահանջներին»,- հայտարարել է Սարգսյանը:
Սարգսյանն ասել է նաեւ, որ «Կազանում տեղի ունեցավ այն, ինչ պետք է տեղի ունենար եւ ինչի մասին ինքը խոսել էր դեռեւս ԵԽԽՎ-ում»։
«Խոսքս առաջին հերթին համապատասխան մթնոլորտի բացակայության մասին է, եւ առաջին հերթին այդ մթնոլորտը պետք է բարելավվի։ Չի կարելի սեփական ժողովրդին ամեն օր եւ ամեն մակարդակով թունավորել»,- հայտարարել է Սարգսյանը:
© Medialab.am
