Լոռու մարզպետ Անդրեյ Ղուկասյանը հայտարարել է «Գլորիա» կարի ֆաբրիկայի հնարավոր աշխատելու մասին։
«Գլորիա» կարի ֆաբրիկայի տնօրենի կողմից ընկերության վերագործարկման համար պարետատանն ուղղված դիմումի պատասխանը կհրապարակվի վաղը:
Մինչ այդ ուզում եմ տեղեկացնել, որ հարցի կապակցությամբ ՀՀ էկոնոմիկայի նախարարությունը դրական եզրակացություն է տվել, ինչը հուսադրում է, որ պարետատան վաղվա պատասխանն ամենայն հավանականությամբ կլինի դրական», -իր ֆեյսբուքյան էջում գրել է մարզպետը:
Հիշեցնենք՝ կարի ֆաբրիկան, որը գտնվում է Վանաձորում և ունի շուրջ 2600 աշխատող, անգործության է մատնված արդեն մեկ ամսից ավելի՝ հանրապետությունում արտակարգ դրության հայտարարումից հետո։
