«Հայկական ժամանակ» օրաթերթի թղթակցին Գյումրիի քաղաքապետ Վարդան Ղուկասյանի մամուլի քարտուղար Լիլիթ Աղեկյանը փոխանցել է, որ Գյումրիի քաղաքապետն առհասարակ ցանկություն չունի այլևս պատասխանելու իր հասցեին հնչող մեղադրանքներին:
«ՀԺ»-ն հիշեցնում է, որ Շիրակի մարզում ընդգրկված 4 ընտրատարածքներից 3-ում հաղթել է «Բարգավաճ Հայաստան» կուսակցության թեկնածուն, և միայն թիվ 33 ընտրատարածքում, որտեղ ԲՀԿ-ական առաջադրված չի եղել, հաղթել է ՀՀԿ-ական Աշոտ Աղաբաբյանը: Վերջինս պնդել էր, թե Գյումրիում ՀՀԿ-ի պարտության հիմնական մեղավորը Վարդան Ղուկասյաննն է:
Ի պատասխան Աշոտ Աղաբաբյանի խոսքերի` Լիլիթ Աղեկյանն ասել է. «Գյումրիի քաղաքապետը ցանկություն չունի ոչ մի հարցազրույց տալու, բայց ես կասեմ հետևյալը. լավ կլիներ, որ բոլոր արտահայտություններում և հարաբերություններում պահպանվեր կոռեկտությունը: Հայտարարում եմ, որ Գյումրիի քաղաքապետը` Վարդան Ղուկասյանը, ով բնիկ գյումրեցի է և խոր արմատներ ունի գցած այս հողում, իր աշխատանքով բազմիցս ապացուցել է իր նվիրումը ՀՀԿ-ին և Գյումրիին: Դա գիտեն բոլոր նրանք, ովքեր, լինելով Վարդան Ղուկասյանի հետ նույն կուսակցությունում, ցավոք, խիստ իրավիճակային դիրքորոշում են ցուցաբերում, մեկ գովաբանելով-փառաբանելով նրան` հայցում են քաղաքապետի ընկերությունը և մեկ էլ զարմանալիորեն բոլորովին այլ դիրքորոշում և կեցվածք են դրսևորում»:
© Medialab.am
