ԱԺ ՀԱԿ խմբակցության քարտուղար Արամ Մանուկյանն այսօր Վերահսկիչ պալատի 2012 թվականի հաշվետվության քննարկման ժամանակ հայտարարեց, որ ՀԱԿ-ն առաջարկում է բազմակուսակցական հանձնաժողով ստեղծել, որն ԱԺ-ում կքննարկի ՎՊ բացահայտումներն ու եզրակացությունը կուղարկի Գլխավոր դատախազություն: «Դատախազությանը մենք տանք էդ գործերը, որ ինքը չորոշի՝ էդ մարդուն պատժի թե չպատժի»,- ասաց նա: Արամ Մանուկյանը նշեց, որ բիզնես ունեցողներին էլ կարող են ընդգրկել հանձնաժողովում:
«Պարոն Վարդան Այվազյանին էլ կընդգրկենք, որովհետև ինքը մաքուր ու անբասիր պատգամավոր է»,- Այվազյանին ծաղրեց Արամ Մանուկյանը:
Վարդան Այվազյանը տեղից պատասխանեց Արամ Մանուկյանին, սական Աժ նախագահը ձայն չտվեց Այվազյանին՝ սաստելով նրան. «Կարո՞ղ եք հանգստանալ, պարոն Այվազյան»:
Նիստի ընդմիջման ժամանակ Արամ Մանուկյան-Վարդան Այվազյան վեճը շարունակվեց միջանցքում:
«Ես փող բերող տղա եմ, գնում եմ, քաղաքական գործիչ եմ, ասում եմ՝ արի, էս երկրում փող դիր: Գալիս է, իմ խոսքով դնում է, բայց քո խոսքով չի դնում»,- Արամ Մանուկյանին ասաց Այվազյանը:
«Քո վրա՞ է բիզնես դնում»,- հարցրեց Մանուկյանը:
«Իմ վրա չի դնում, երկրի վրա է դնում»,- պատասխանեց Վարդան Այվազյանը: Կարդալ ավելին