Իրավապաշտպան Ժաննա Ալեքսանյանը գրում է.
«Պաշտպանության փոխնախարարի հայտարարությունները իրավապաշտպանների հասցեին ցածրորակ էին, հուսահատության աստիճանի ցածրորակ և նա ներկայացնում է բարձրագույն հրամկազմը:
Մենք լսել ենք Գաբրիել Բալայանի մտքի գոհարներից էր ևս մեկը՝ տանը զենք չունեն, գալիս են էստեղ են ինքնասպան լինում, ինչպես ասում են մեկնաբանություններն ավելորդ են:
Բանակը սպանում է զինվորին, բայց մեզ մեղադրում են ընտանիքի վիշտը խորացնելու մեջ:
Զոհերի ընտանիքների միակ ապավենը իրավապաշտպաններն են:
Նրանց լսում են:
ՊՆ-ի դռները փակ են նրանց առջև, ոչ մի պատասխանատվություն և բացատրություն, փոխարենը հետևողական անտարբերություն, Բանակի ղեկավարությունը պետք է գլուխ խոնարհի իրավապաշտպանների առջև, որ աշխատում են իրենց փոխարեն և կատարում այդ դժվար աշխատանքը»:
Հիշեցնենք, որ պաշտպանության փոխնախարար Գաբրիել Բալայանը լրագրողների հետ զրույցում այսօր անդրադարձել էր բանակի խնդիրների մասին բարձրաձայնող իրավապաշտպանների գործունեությանը: Նա ասել էր, որ որոշ իրավապաշտպաններով առաջիկայում կզբաղվեն իրավապահ մարմինները:
«Ես այդ իրավապաշտպաններին համարում եմ չակերտավոր իրավապաշտպաններ: Ես անգամ ունեմ տեղեկություն, որ այդ իրավապաշտպանները կոնկրետ քայքայիչ գործունեություն են իրականացնում:
Իմ պատկերացմամբ՝ նրանցից մի քանիսի մոտ յուրաքանչյուր ողբերգական դեպք հրճվանք է առաջացնում: Փորձում են գնալ, տեղում հրահրել հարազատներին՝ որոշակի գործողություններ իրականացնելու համար:
Դռնից հանում են, լուսամուտից են փորձում մտնել, լուսամուտից հանում են, դռնից են փորձում մտնել: Ես կարծում եմ՝ շուտով իրավապահ մարմինները կսկսեն զբաղվել այդ դեպքերով, որովհետև վիշտ ունեցող մարդու վիշտը նորից փորձում են խորացնել, տարբեր պատմություններ հորինել»,- ասել էր Բալայանը:
