Վաղ առավոտյան Ադրբեջանի Զիված ուժերը Արցախի սահմանի գրեթե ողջ երկայնքով լայնամասշտաբ հարձակողական գործողություններ են սկսել՝ առնվազն երեք-չորս ուղղություններով, հատկապես թեժ է եղել հյուսիսային ուղղությունը, որտեղ օրվա ընթացքում թեժ մարտեր են տեղի ունեցել։ Այդ մասին Միասնական տեղեկատվական կենտրոնի ասուլիսում հայտարարեց ՊՆ ներկայացուցիչ Արծրուն Հովհաննիսյանը։
Նրա խոսքով, հակառակորդը ծավալուն հրետակոծությունից հետո անցել է լայնամասշտաբ հարձակման՝ զրահատեխնիկայի կիրառմամբ։ «Այսօր երեւի թե ողջ պատերազմի ընթացքում ամենաթեժ մարտերից մեկն է եղել», -ընդգծեց Արծրուն Հովհաննիսյանը։
Նա նաև հավելեց, որ այս ընթացքում հայկական ստորաբաժանումներին հաջողվել է հետ շպրտել հակառակորդին՝ պատճառելով էական կորուստներ։
«Մեր Զինված ուժերի, կանոնավոր բանակի, պահեստազորի, աշխարհազորի, միասնական, համատեղ, փայլուն ու հերոսական գործողությունների շնորհիվ հաջողվել է կասեցնել հակառակորդի հարձակողական գործողությունները», -ասաց Հովհաննիսյանը։
Ըստ ՊՆ ներկայացուցչի, հակառակորդը որևէ էական առաջխաղացում չունի՝ չնայած որ վերջին օրերին Ադրբեջանի Զինված ուժերը որդեգրել են հետևյալ քաղաքականությունը՝ հետախուզադիվերսիոն գործողություններով մերձռազմաճակատային տարբեր բնակավայրերում արագ ներթափանցումներ և տեղեկատվական ակցիաներ իրականացնել՝ դրոշներ տեղադրելով տարբեր շենքերի վրա, նկարվել՝ առաջին հերթին իրենց, ապա Հայաստանի հասարակության վրա հոգեբանական ազդեցություն ունենալու համար։