Թուրքիայում տեղի ունեցած երկրաշարժի հետևանքով զոհվել է առնվազն 4, վիրավորվել 120 մարդ, 2 տասնյակից ավելի շենքեր են փլվել: Այս մասին հայտնել է Թուրքիայի արտակարգ իրավիճակների և աղետների կառավարման գործակալությունը:
Հոկտեմբերի 30-ին Արևմտյան Թուրքիային հարվածած 6.6 մագնիտուդ ուժգնությամբ երկրաշարժի էպիկենտրոնը Իզմիրի Սեֆերիհիսար քաղաքն է: Թուրքական «Հուրիեթ»-ի փոխանցմամբ՝ Իզմիրի քաղաքապետ Թունչ Սոյերը նշել է. «Տեղյակ ենք մոտավորապես 20 շենքի կործանման մասին»:
Իզմիրի նահանգապետ Յավուզ Սելիմ Քյոշգերը ևս տեղի ունեցած ուժգին երկրաշարժի վերաբերյալ հայտարարություն է արել. «Շուտով կլինենք ճգնաժամային կենտրոնում և կփոխանցենք բոլոր տեղեկությունները»:
Ինչպես հաղորդում է «Արմենպրես»-ը, վկայակոչելով CNN Türk հեռուստաընկերությանը Սեֆերիհիսարի քաղաքապետ Իսմայիլ Եթիշքինի հարցազրույցը, բնակիչները լքել են շենքերը: Թուրքիայի նախագահ Էրդողանը ևս Իզմիրի երկրաշարժի վերաբերյալ հանդես է եկել հայտարարությամբ՝ ցավակցելով երկրաշարժից տուժածներին:
Ներքին գործերի նախարար Սոյլուն հայտնում է, որ էպիկենտրոնին մոտ գտնվող Ուշաք, Դենիզլի, Մանիսա, Բալըկեսիր, Այլըն և Մուղլա քաղաքներում վիրավորների կամ զոհերի մասին որևէ լուր չկա:
