Փաստաբան Նորայր Նորիկյանը Ֆեյսբուքի իր էջում գրել է․
«Նիկոլ Փաշինյանը հայտարարել է, որ իրենց մեծագույն բացթողումն այն է, որ երկուսուկես տարվա ընթացքում չեն հասցրել բավարար չափով թալանված գումարներ ետ բերել և պատշաճ պատրաստվել պատերազմին։
Լա՛վ է, որ ընդունում եք Ձեր բացթողումը, բայց դա բացթողում չէ, դա տապալում ու ձախողում է, քանի որ Դուք իշխանության եկաք այդ խոստումներով ու չկատարեցիք այն:
Անձամբ ինքս վերջին երկու տարվա ընթացքում բազմիցս Ձեզ զգուշացրել եմ Ձեր խոսքի ու գործի հակասության, կոռուպցիայի դեմ պայքարի Ձեր կառավարության թուլակամության ու ձախողումների մասին:
Բայց միայն թալանածը հետ բերելը և փողը բավարար չէր՝ պատերազմը հաղթելու համար: Այս պատերազմին հաղթելու կամ դրանից խուսափելու համար ռազմավարական մտածողություն էր պետք, նախկին քաղաքական իշխանությունների սխալների բացառումն ու կրկնությունը թույլ չտալն էր պետք: Իրական ճկուն քաղաքականությունն այն կիներ, որ Ձեր այսօրվա ֆեյսբուքյան գրառումն անեիք Ձեր վարչապետ ընտրվելու հաջորդ օրը: Այն ժամանակ ազնվորեն ներկայացնեիք ժողովրդին, որ ՛՛Երկար տարիներ Հայաստանի վարած «ճկուն» քաղաքականությունը բերեց նրան, որ 2016 թվականի հունվարին շրջանառության մեջ դրվեցին ռուսական առաջարկները, որոնք ենթադրում էին 7 տարածքների (5+2) վերադարձ առանց ԼՂ կարգավիճակի որեւէ ճշգրտման։
Իրական ճկուն քաղաքականությունն այն կիներ, որ չթաքցնեիք ժողովրդից հակամարտության կարգավորման իրական գործընթացը, ԵԱՀԿ Մինսկի խմբի երկրների ակնկալիքները, սպասելիքներն, պահանջները, դուրս գայիք և ազնվորեն ասեիք ժողովրդին, որ այդ տարածքները Հայաստանից պահանջում է ոչ թե Ալիևը, այլ ԵԱՀԿ Մինսկի խումբը:
Այն ժամանակ վերցնեիք Ձեզ վրա պատասխանատվություն և ազնվորեն ժողովրդին ասեիք, որ պատերազմից խուսափելու միայն մեկ տարբերակ կա՝ վերադարձնել տարածքները:Դուք դա չեք արել, ինչը նշանակում է, որ գիտակցված գնացել եք պատերազմի, ինչպես Դուք եք ասում՝ առանց պատշաճ պատրաստվածության և տանուլ եք տվել:Սա՞ էր ճկուն քաղաքականությունը, ս՞ա էր Ձեր սեփական կետը»: