Այսօր, առավել քան երբեւէ, մեր միտքն ու գործը պետք է ծառայեցնենք նախ եւ առաջ մեր բանակի հզորացմանը, լինենք մեր բանակի կողքին. Նախագահի ուղերձը

ՀՀ նախագահ Արմեն Սարգսյանը շնորհավորական ուղերձ է հղել Բանակի օրվա առթիվ:

Ուղերձում ասվում է.

«Սիրելի՛ հայրենակիցներ,

Բանակի օրն այս տարի առանձնահատուկ խորհուրդ ունի. այն նշում ենք մեր երկրի ու ազգի համար արտակարգ պայմաններում՝ հետպատերազմական բարդ իրավիճակ, բազմաբնույթ ճգնաժամ, ծանրագույն կորուստներ:

Եվս մեկ անգամ գլուխ եմ խոնարհում Հայրենիքի պաշտպանության եւ ազատության համար զոհված մեր բոլոր նահատակների միշտ կենդանի հիշատակի առաջ: Ապաքինում եմ մաղթում մեր բոլոր վիրավոր հերոսներին։

Զորակցությունս եմ հայտնում բոլոր այն ընտանիքներին, որոնք զօր ու գիշեր սպասում են գերության կամ անհայտության մեջ գտնվող իրենց զավակներին ու հարազատներին:

Այսօր, առավել քան երբեւէ, մեր միտքն ու գործը պետք է ծառայեցնենք նախ եւ առաջ մեր բանակի հզորացմանը, լինենք մեր բանակի կողքին:

Անհրաժեշտ են ծրագրային ու հայեցակարգային մոտեցումներ, արմատական քայլեր՝ վերակազմավորումից մինչեւ վերազինում, հաշվի առնելով ժամանակակից ռազմարվեստի ու տեխնոլոգիաների զարգացման, ինչպես նաեւ աշխարհաքաղաքական միտումները:

Սակայն անգամ ամենաժամանակակից զենքը չի կարող հանգեցնել ցանկալի արդյունքի,

եթե խիզախություն չունենանք ընդունել կատարված սխալներն ու պատրաստ լինել հիմնարար փոփոխությունների,

եթե չվերականգնենք սպայի պատիվը, հարգանքը զինվորական ծառայության հանդեպ,

եթե չունենանք ծրագիր եւ այն իրականացնելու կամք,

եթե արտաքին թշնամուն թողած՝ չդադարենք թշնամի փնտրել միմյանց մեջ,

եթե համերաշխ ու համախմբված չլինենք որպես պետություն եւ հասարակություն, որպես մեկ ազգ Հայաստանում, Արցախում եւ Սփյուռքում:

Մենք պարտք ունենք մեր հերոս նահատակների առաջ։

Մեր բանակը, ինչպես մեր պետությունն ու ողջ ազգը, անցնում է փորձությունների միջով: Բայց մենք մեկ անգամ չէ, որ փորձությունը կարողացել ենք վերածել հաղթանակի: Եվ դա՝ առաջին հերթին շնորհիվ մեր բանակի:

Կեցցե՛ Հայո՛ց բանակը:

Փա՛ռք մեր հերոսներին: