Այն, որ Գյումրիում վեց հոգանոց ընտանիքի սպանության մեջ մեղադրվող ռուս զինծառայողը ներկայում գտնվում է ռուս իրավապահների մոտ, անլսելի և անպատկերացնելի դեպք է: Այս մասին Lragir.am-ի հետ զրույցում ասաց Միջազգային և անվտանգության հարցերի հայկական ինստիտուտի ղեկավար Ստյոպա Սաֆարյանը՝ նշելով, որ այդ դեպքում արդեն իրականացվող քննությունը վստահություն չի ներշնչում:
Ստյոպա Սաֆարյանը նշեց, որ շատ տարօրինակ է այն, որ երեկ, նախքան հանցագործին հայտնաբերելը, ռուսական կողմը կայքերի միջոցով հաղորդել էր, թե գործի քննությունը պետք է վարեն իրենց քննիչները: Իսկ նախքան դա, հայկական կողմին տեղեկացվել էր, որ ՌԴ-ից քննիչների խումբ է ժամանում Հայաստան:
“Հետքրքիր է, թե նրանց ո՞վ է հրավիրել, ինչո՞վ է պայմանավորված նրանց Հայաստան գալը: Կարծես թե մենք գործ չունենք դարի հանցագործության հետ, և եթե այն շատ բարդ հանցագործություն չէ, ՌԴ-ից քննիչների ժամանման խնդիր չպետք է լիներ: Բայց, ի զարմանս մեզ, խումբ է եկել: Անլսելի և անպատկերացնելի բան է, որ հանցագործը գտնվում է ռուս իրավապահների մոտ”,- ասաց Ստյոպա Սաֆարյանը:Կարդալ ավելին