Հունվարի 29-ի վաղ առավոտյան Վ. Սարգսյանի անվան ռազմական ինստիտուտի մարզահրապարակում մահացած վիճակում (գտել են պտտաձողին կախված) հայտնաբերված առաջին կուրսեցի Հայկազ Բարսեղյանի մարմինն արդեն Արարատի մարզի հայրենի Նիզամի գյուղում է: Նիզամիի գյուղապետը ԳԱԼԱ-ինփոխանցեց, որ զինծառայողի մարմինը հայրենի գյուղ են տեղափոխել այսօր առավոտյան, զինծառայողի մահը սգում է ամբողջ գյուղը: Թե ինչ է տեղի ունեցել, ինչ է նախորդել սպանությանը, […]
Հունվարի 29-ի վաղ առավոտյան Վ. Սարգսյանի անվան ռազմական ինստիտուտի մարզահրապարակում մահացած վիճակում (գտել են պտտաձողին կախված) հայտնաբերված առաջին կուրսեցի Հայկազ Բարսեղյանի մարմինն արդեն Արարատի մարզի հայրենի Նիզամի գյուղում է:
Նիզամիի գյուղապետը ԳԱԼԱ-ինփոխանցեց, որ զինծառայողի մարմինը հայրենի գյուղ են տեղափոխել այսօր առավոտյան, զինծառայողի մահը սգում է ամբողջ գյուղը: Թե ինչ է տեղի ունեցել, ինչ է նախորդել սպանությանը, գյուղում ենթադրել անգամ չեն կարող:
«Հոր հետ խոսել ենք, մեր գյուղի մարդ է, դե ինքը իրա յուղի մեջ տապակվում է: Ծնողներն իսկական խելագարված են, մայրն ընդհանրապես ի վիճակի չէ խոսելու: Գիտենք, որ ինքնասպանությունը էն գլխից էլ հերքվեց, հիմա փաստերը դրան են տանում, որ երեխուն մի քանի հոգով սպանել են, թե ինչու՝ գաղափար չունենք»:
Ի՞նչ է տեղի ունեցել իրականում. ռազմական փորձագետ, իրավապաշտպան Ռուբեն Մարտիրոսյանը ԳԱԼԱ-ի հետ զրույցում ասաց, որ իրականում տղային սպանել են սենյակում՝ անկողնու մեջ, հետո փորձել են հետքերը թաքցնել ու նրա անշնչացած մարմինը կախել են պտտաձողից:
Ռուբեն Մարտիրոսյան
«Տեղյակ եմ, որ դաժանորեն ծեծել եւ խոշտանգել են: Այն աստիճան է ծեծված ու խոշտանգված, որ ամենայն հավանականությամբ նա ի վիճակի չէր շարժվել՝ գնալ դեպքի վայր՝ պտտաձողի մոտ: Իրա արյան հետքերը հայտնաբերվել են ննջասենյակում, եւ մեծ քանակությամբ արյան հետքեր կան անկողնում, եւ ոչ մի արյան հետք չկա դեպի պտտաձող տանող ճանապարհի վրա: Անձիք երեւի տեղափոխել են, տեսել են, որ մահանում է, կախել են, որ հետո ներկայացնեն՝ իբրեւ թե ինքնասպան է եղել»,- նշեց իրավապաշտպանը:
Ըստ քննչական կոմիտեի տարածած հայտարարության՝ չորս ծառայակից ձերբակալված են: Ընդ որում, կան տեղեկություններ, թե նրանցից մեկն իրավական ոլորտում աշխատող բարձրաստիճան պաշտոնյայի որդի է, մյուսը հենց ռազմական ինստիտուտի ղեկավարի տեղակալի որդին է: Այս տեղեկություններն առայժմ պաշտոնապես ոչ հաստատվում, ոչ էլ հերքվում են:
Կոմիտեից հայտնեցին նաեւ, որ սպանված զինծառայողի մոտ գրություն է հայտնաբերվել. «Գրություն հայտնաբերվել է՝ նրա կողմից գրված, բայց, այնուհանդերձ, դեպքի վայրում կատարված մի շարք գործողությունների արդյունքում բավարար հիմքեր են ձեռք բերվել, որ տեղի ունեցածը ոչ թե ինքնասպանություն է, այլ սպանություն»,- ասաց Սոնա Տռուզյանը:
Իսկ իրավապաշտպան Ռ. Մարտիրոսյանը նշում է. «Հաշվի առնելով այսօրվա դատաիրավական համակարգի ամբողջական կոռումպացվածությունը՝ շատ հավանական եմ համարում, որ ինչ-որ սլաքավարներ գտնեն, սպանության հետ բոլորովին կապ չունեցողներ եւ կոտրեն իրենց վրա: Այդ նույնը հիմա կատարվում է Արաբկիրի դատարանում. Քանաքեռի զորամասում սպանել են մի զինծառայողի, որից հետո ինքնասպանություն են ձեւակերպել, եւ երկու անմեղ զինծառայողներ հիմա նստած են: Ոչ մեկը մեզ չի ապահովագրում նման այլանդակությունից, անօրինականությունից, դա սովորական երեւույթ է մեր դատախազության համար, որն էլ հանցավոր ցուցում է տալիս ՀՀ քննչական մարմիններին»:
Իրավապաշտպանը մտահոգիչ է համարում հատկապես այն, որ դաժան սպանությունը տեղի է ունեցել ոչ թե սովորական զորամասում, այլ ռազմական ինստիտուտում, որտեղ փաստորեն սպաներ են պատրաստում:
«Դա շատ մտահոգիչ է, դեռ 2004 թ.-ին այդ ինստիտուտում սպանեցին գյումրեցի մի հրաշալի երիտասարդի՝ Գեւորգ Խնկոյանին, եւ գործը նախաքննական մարմինը կոծկեց հանցավոր ճանապարհով: Եթե չեմ սխալվում, դարձրեցին էլի ինքնասպանություն, բայց սպանել էին նրան պոստի վրա: Ծնողը շատ պայքարեց, փորձեցինք միասին պարզել ճշմարտությունը, բայց մեզ մոտ ոչինչ չստացվեց: Այդ նույն ինստիտուտի կուրսանտներից մեկին Խնկոյանի դեպքից հետո կախված գտան Հաղթանակի զբոսայգում: Եվ սա արդեն երրորդ դեպքն է: Պատճառն այն էր, որ իմ ունեցած հավաստի տվյալներով այդ ինստիտուտում գործում են սուտի գողական օրենքներ, ղումար-թղթախաղով են զբաղվում եւ հարբեցողությամբ, ահավոր արատավոր վայր է: Մի խոսքով՝ ոչ միայն աֆիցերներ, այլև խուլիգաններ եւ գողականներ են դաստիարակում»,-նշեց իրավապաշտպանը:
Նրա խոսքերով՝ դեռ 2000-ականներին կարիք կար այնտեղ լուրջ միջամտության, սակայն պետական մակարդակով անուշադրության պայմաններում շարունակում են պահպանվել «լավագույն արատավոր ավանդույթները»:
«Ես դեռ այն ժամանակ ծառայում էի ՊՆ-ում: Նախարարը որոշում էր կայացրել, որ կուրսանտների թիվն առնվազն երկու անգամ կրճատվի: Այսինքն, բոլոր նրանք, ովքեր չեն ենթարկվում կարգ ու կանոնին, պիտի հեռացվեին: Բայց հետո իշխանությունը փոխվեց, նախարարի պաշտոնին Սերժ Սարգսյանը նստեց եւ այդ հրամանը չեղյալ համարեց: Մեծ քանակությամբ կուրսանտներ են սովորում հիմա, որոնց 5-7 տոկոսն է, որ նորմալ սպաներ են դառնում, իսկ մնացածն ուղղակի ոչ պիտանի են ծառայության համար»,-կարծիք է հայտնում Ռ. Մարտիրոսյանը:
Ամբեղջական հոդվածը կարդացեք սկզբնաղբյուր կայքում
