Արցախի խորհրդարանում շրջանառության մեջ է դրվել «Լեզվի մասին օրենքում փոփոխություններ կատարելու մասին» նախագիծը, որով առաջարկվում է Արցախի պաշտոնական լեզու դարձնել «գրական հայերենը և ռուսերենը»:
Արցախի Ազգային ժողովի պատգամավորները, որոնք հեղինակել են օրինագիծը, այս փոփոխությունն առաջարկում են հետևյալ հիմնավորմամբ.
«Հաշվի առնելով Արցախի և Ռուսաստանի մշակութային, ռազմական, տնտեսական հարաբերությունների պատմական հիշողությանը և այն փաստը, որ բազմաթիվ արցախցիների համար շփման երկրորդ լեզու է հանդիսանում ռուսերենը` կարևոր ենք համարում նոր որակի հարաբերությունների վերաարժևորումը և նոր օրակարգի ձևավորումը: Այս համատեքստում առաջնահերթ ենք համարում ռուսաց լեզվի կարգավիճակի բարձրացումը, ինչն անհրաժեշտ պայմաններ կստեղծի բոլոր ոլորտներում համագործակցությունը խորացնելու համար, իսկ տեսանելի ապագայում կնպաստի իրավական շրջանակներում հարաբերությունների զարգացմանը:
Արցախում ռուս խաղաղապահների երկարաժամկետ ներկայության և բազմաթիվ սոցիալական և հաղորդակցային խնդիրների համատեղ լուծման անհրաժեշտության ըմբռնումը, շինարարության, առողջապահության, կրթության և գիտության ոլորտներում համագործակությունը պահանջում է ռուսաց լեզվի դերի վերագնահատում»:
Փոփոխություն են առաջարկում նաև Արցախի «Հեռուստատեսության և ռադիոյի մասին» օրենքում, որի համաձայն, ռուսաց լեզուն օտար լեզու չի համարվում և կարող են ռուսերեն հաղորդումներ հեռարձակվել առանց թարգմանության:
