Համայնքային ոստիկանը Իրանի Իսլամական Հանրապետության քաղաքացուց պահանջել է 200 դոլար կաշառք

Ոստիկանության ներքին անվտանգության վարչությունում Իրանի Իսլամական Հանրապետության մի քաղաքացի փետրվարի 22-ին հաղորդում է տվել, որ փետրվարի 19-ի ժամը 18։30-ի սահմաններում, համայնքային ոստիկանության բաժանմունքի ծառայողն իր փաստացի հաշվառումն արագ իրականացնելու պատրվակով իրենից պահանջել է 200 ԱՄՆ դոլար կաշառք։ Այդ մասին տեղեկացնում են ոստիկանության լրատվական ծառայությունից:

Ոստիկանության ներքին անվտանգության վարչության, քրեական ոստիկանության գլխավոր վարչության և տարածքային բաժնի ծառայողների համատեղ միջոցառումների արդյունքում, ոստիկանության ավագ լեյտենանտը փետրվարի 22-ին՝ կաշառք ստանալու կասկածանքով բերման է ենթարկվել ոստիկանության ներքին անվտանգության վարչություն։

Նախապատրաստված նյութերն ուղարկվել են ՀՀ հատուկ քննչական ծառայություն։