Եղբայրությանն ավելի մեծ նշանակություն ենք տվել, քան ոմանց պատժելու անհրաժեշտությանը. ՀՀ վարչապետ

ՀՀ վարչապետ Նիկոլ Փաշինյանը Հանրապետության Հրապարակից մեկնարկած քայլերթի ժամանակ նշել է, որ իրենք այս տարիների ընթացքում հավատարիմ են եղել սիրո և համերաշխության մոտեցումներին: «Արմենպրես»ի հաղորդմամբ, Նիկոլ Փաշինյանը, երթի ընթացքում Հանրային Հեռուստաընկերությանը տված մեկնաբանությունում ընդգծել է, որ եղբայրությանն ավելի մեծ նշանակություն են տվել, քան ոմանց պատժելու անհրաժեշտությանը:

«Այդ օրերի հետ կապված (խմբ. 2018 թվականի հեղափոխության օրերը) որևէ վատ հիշողություն չունեմ, որովհետև, փառք Աստծո, ի վերջո միասնությունը և համերաշխությունը հաղթեցին: Դա կարևոր է:

Այն ոստիկանները, իրավապահ մարմինների աշխատակիցները, որոնք այդ օրն ինձ առևանգելու օպերացիային մասնակցել էին, այսօր էլ շարունակում են ծառայել: Ես դժգոհ չեմ, որ մենք բոլորին հնարավորություն տվել ենք, որ մենք փորձել ենք եղբայրությունը վերականգնել: Եվ մենք եղբայրությունը վերականգնելիս ենք  ձախողվել:

Այդ թավիշը, որ ասում են… մենք երևի այդ եղբայրությանն ավելի մեծ նշանակություն ենք տվել, քան ոմանց պատժելու անհրաժեշտությանը: Ժողովուրդն այդ առումով երևի մեծ հիասթափություն ունի, միևնույն է չեմ փոշանում: Մենք խոստացել էինք հրապարակում, որ սիրո և համերաշխության հեղափոխություն է լինելու: Մենք հավատարիմ ենք մնացել դրան»,-հավելել է ՀՀ վարչապետը: