Փաստաբան Նորայր Նորիկյանը ֆեյսբուքյան էջում գրում է.
«Երեկ լրատվամիջոցները տեղեկություն էին տարածում, որ Երևանում տեղի է ունեցել զինված «ռազբորկա», որի հետևանքով հրազենային վնասվածքներով հիվանդանոց են տեղափոխվել երեք հոգի:
Հատկանշական է, որ ըստ մամուլի հրապարակումների, նշված անձանց հիվանդանոց տեղափոխողների մեջ են եղել նաև Երևան քաղաքի Շենգավիթ և Մալաթիա-Սեբաստիա վարչական շրջանի ղեկավարները:
Ես չգիտեմ, թե ինչ բացատրություններ կտրվեն տեղի ունեցածին, բայց որ մեր երկրում այսպես կոչված ոչ ֆորմալ արժեքային համակարգը, հարցերը փողոցի, հանցագործ մտայնությունով լուծելու փլիսոփայությունը պիտի ոչնչացվի, դրանում չեմ կասկածում:
Նոր որակի ոստիկանությունը ես պատկերացնում եմ հետևյալ կերպ. Այդ ոստիկանությունը պետք է տիրապետի օպերատիվ իրավիճակին, լինի օրինավոր, իսկ անհրաժեշտության դեպքում նաև կոշտ՝ ըստ անհրաժեշտության հարկադրանքի ուժ կիրառելու կոնկրետ դրսևորմամբ:
Չի կարելի թույլ տալ, որ մարդիկ իրենց հարցերը լուծեն արյամբ ու վրեժխնդրությամբ:
Վերացրե՛ք սանձարձակությունը Հայաստանից և կարգին պատժեք բոլոր նրանց, ովքեր կփորձեն հարցերը լուծել փողոցում և արյամբ…»։
