Հանրապետական կուսակցության նախագահ, ՀՀ նախկին նախագահ Սերժ Սարգսյանը այսօր հայտարարել է, որ նորաստեղծ «Պատիվ ունեմ» դաշինքի ցուցակում ինքը չի լինելու: Բայց նաև շտապել է ընդգծել. «Ցուցակում չլինելը չի նշանակում ընտրություններին չմասնակցել»:
Նա նաև պատասխանել է հարցին, թե ինչու «Պատիվ ունեմ»-ի ցուցակում չկա և ինչո՞ւ ինքը չի ղեկավարում այդ ցուցակը.
«Տարրական քաղաքագիտությունը այդ մասին տարրական ճշմարտություն է ասում՝ նրանք, ովքեր գլխավորում են ցուցակները, հավակնում են ունենալ պետական բարձր պաշտոն, իսկ հայտնի է, որ ես հայտարարել եմ, որ ես այլևս չեմ զբաղեցնելու պետական բարձր պաշտոններ: Ընդամենը ես իմ խորհուրդներով օգնելու եմ, եթե դրա անհրաժեշտությունը լինի: Ես համարում եմ, որ ավարտել եմ իմ ծառայությունը Հայաստանին և հայ ժողովրդին պետական բարձր պաշտոններում»:
Նշենք, որ այսօր «Հայրենիք» և Հանրապետական կուսակցությունները ստորագրել են «Պատիվ ունեմ» նախընտրական դաշինքը ձևավորելու մասին հուշագիր: Դաշինքի համամասնական ցուցակը ղեկավարելու է Արթուր Վանեցյանը: