Ուրալի տուրիզմի ասոցիացիայի նախագահ Միխայիլ Մալցևը երեք օր Հայաստանի զբոսաշրջային ոլորտին ծանոթանալուց հետո կիսվել է իր տպավորություններով։
Ինչպես տեղեկացնում է «Արմենպրես»-ը, մայիսի 22-ին մամուլի ասուլիսի ժամանակ Մալցևը հայտնեց, որ Հայաստան է եկել Ուրալի տուրիստական օպերատորների և լրագրողների հետ՝ ծանոթանալու հյուրանոցների, տուրիստական գործակալությունների աշխատանքին և ընդհանրապես զբոսաշրջության ոլորտում տիրող իրավիճակին։
Նա բարձր գնահատեց կորոնավիրուսային համաճարակից հետո զբոսաշրջիկներ ընդունելու Հայաստանի պատրաստակամությունը և ոլորտի ներկայացուցիչների աշխատանքը։
«Կատարյալ պատրաստակամություն, հյուրանոցները նույնպես պատրաստ են զբոսաշրջիկներ ընդունել, պատշաճ ներկայացված են բոլոր տեսարժան և գեղատեսիլ վայրերը, ուր կարող են այցելել զբոսաշրջիկները»,- ընդգծեց Մալցևը։
Մալցևը տեղեկացրեց, որ «Աէրոֆլոտ» ավիաընկերությունը հունիսի 10-ից Եկատերինբուրգ-Երևան չվերթներ կբացի երկու շաբաթը մեկ ռեժիմով, այն կարող է զբոսաշրջության զարգացման համար մեծ խթան հանդիսանալ։
Տուրիզմի հայկական ֆեդերացիայի նախագահ Մեխակ Ապրեսյանը իր հերթին նշեց, որ Ուրալի երկրամասը Հայաստանի համար շատ կարևոր զբոսաշրջային շուկա է, և շատ կարևոր էր նման ճանաչողական այցելությունը։
«Այստեղ են մեր գործընկերները ճանաչելու Հայաստանը, և Ուրալում իրենց տպավորություններով կիսվելու համար ներկայացնելու Հայաստանի զբոսաշրջային հնարավորությունների մասին։
Ցույց տալու, որ մեզ մոտ ամեն ինչ կարգին է, ապահով և, ամենակարևորը, Հայաստանը գեղեցիկ է, հյուրընկալ է, խոհանոցը համեղ է և այստեղ այցելող զբոսաշրջիկները վերադառնում են սպասումները գերազանցած»,- ասաց Ապրեսյանը։
