Մոտ 15 օր առաջ ես գրություն եմ ուղարկել ԳՇ պետին խնդրելով, որպեսզի «Պատիվ ունեմ» դաշինքի մաս կազմած քաղաքական ուժերից ձևավորվի ջոկատ և մենք մեկնենք Հայաստանի կամ Արցախի ցանկացած հատված՝մեր սահմանները պաշտպանելու: Այդ մասին հայտարարել է «Հայրենիք» կուսակցության նախագահ, «Պատիվ ունեմ» դաշինքի վարչապետի թեկնածու Արթուր Վանեցյանը:
«ԳՇ-ն այս փուլում գտել է ոչ նպատակահարմար մեր մեկնումը սահմաններ, բայց խոստացել են անհրաժեշտության դեպքում մեզ այդ հարցով կրկին դիմել»,-նշեց Վանեցյանը:
«Ասում են կա պայմանավորվածություն կրակ չբացելու, բայց մենք տեսանք, որ երեկ ունեցանք զոհ, վիրավոր, այսօր 6 գերեվարված: Այսինքն, այդ պայմանավորվածությունը բացառապես պահում է Նիկոլ Փաշինյանը:
Ադրբեջանական կողմն որևէ պարագայում այդ պայմանավորվածությունը չի պահում: Սա է այն ցուցիչը, որ մենք ունենք պարտված իշխանություն, պարտության սիմվոլ Նիկոլ Փաշինյան, որը չի կարողանում առաջ մղել ՀՀ-ի ազգային և պետական շահերը»,-եզրափակեց «Հայրենիք» կուսակցության առաջնորդը:
Այս մասին տեղեկանում ենք «Պատիվ ունեմ» դաշինքի ֆեյսբուքյան էջից։
