ՀՀ քննչական կոմիտեի հատկապես կարևոր գործերի քննության գլխավոր վարչության վարույթում քննվող քրեական գործով փաստական տվյալներ են ձեռք բերվել քաղաքացի Ռ.Ք.-ի կողմից առերևույթ մի շարք հանցագործություններ կատարելու դեպքերի վերաբերյալ։
Իրականացված քննչական գործողությունների արդյունքում փաստական տվյալներ են ձեռք բերվել, որ քաղաքացի Ռ.Ք.-ն ս.թ. օգոստոսի 1-ին հանցավոր համաձայնության է եկել Չինաստանի Ժողովրդական Հանրապետության Սին Պիյ նահանգի Չին Շուն գյուղի գյուղապետ Պին Մունի հետ, որի արդունքում ապօրինաբար և խաբեությամբ մաքսանենգ ճանապարհով Հայաստան է բերվել Չին Շուն գյուղի ամբողջ չափահաս բնակչությունը` ավելի քան 1,5 մլն մարդ:
Մասնավորապես, ըստ ձեռք բերված փաստական ապացույցների` Ռ.Ք-ին պատկանող «Պապ և թոռ Սեդրակիչներ»` Լիխտենշտեյնում գրանցված օֆշորային ընկերության կողմից Պին Մունի հաշվեհամարին է փոխանցվել 1 մլն ամերիկյան դոլար, որը ստանալուց հետո գյուղապետը համագյուղացիներին խաբեությամբ ներգրավել է «Պահպանենք սպիտակ օձերին» գոյություն չունեցող ծրագրի մեջ: Պին Մունը համագյուղացիներին ներկայացրել է, թե իբր վայրի բնության պահպանմանն ուղղված ՄԱԿ-ի ծրագրերից մեկի շրջանակներում չինական այդ գյուղի բնակիչները պետք է տեղափոխվեն մի երկիր, որտեղ սպիտակ օձերի ապօրինի որս է տեղի ունենում, և ՄԱԿ-ի հովանու ներքո բողոքի ցույցեր իրականացնեն այդ երկրի մայրաքաղաքի հրապարակներում` վանկարկելով «Ռոբ-երտ, Ռոբ-երտ»: Գյուղապետը համագյուղացիներին ներկայացրել է, թե դա այդ երկրի լեզվով նշանակում է «թողեք օձերն ապրեն»:
Հանցավոր համաձայնության գալուց 7 օր անց` Չին Շունի բնակիչները մաքսանենգ ճանապարհով` Վրաստանի տարածքով տեղափոխվել են Հայաստան:
Նույն օրը Հայաստանի Հանրապետության ազգային անվտանգության ծառայությունը մաքսանենգության դեմ պայքարի իր գործառույթների շրջանակներում Հայաստանի և Վրաստանի սահմանին բացահայտել է առանձնապես խոշոր չափերով մարդկանց տեղափոխում Հայաստան:
ՀՀ ազգային անվտանգության ծառայության աշխատակիցների իրականացրած օպերատիվ-հետախուզական միջոցառումների արդյունքում տվյալներ են ստացվել նաև, որ քաղաքացի Ռ.Ք.-ին պատկանող տարածքներում արդեն իսկ կան հանգրվանած օտարազգիներ:
Ստացված տվյալների հիման վրա ս.թ. օգոստոսի 9-ին ՀՀ ԱԱԾ աշխատակիցների և ՀՔԾ քննիչների կողմից Ռ.Ք-ին պատկանող տարածքներում իրականացված խուզարկության արդյունքում հայտնաբերվել են 100 հունգարացի, 200 մեքսիկացի և մոտ 1200 ալբանացի, որոնց քաղաքացի Ռ.Ք.-ն Հայաստան էր բերել ավելի վաղ:
Մաքսանենգությամբ զբաղվելու կասկածանքով` քաղաքացի Ռ.Ք-ն բերման է ենթարկվել և նույն օրը կալանավորվել:
Արդեն ԱԱԾ մեկուսարանում քաղաքացի Ռ.Ք.-ն քննիչներին պարզաբանել է, որ մեծ թվով օտարազգիներին Հայաստան է բերել քաղաքական նպատակներով: Մասնավորապես, նա նշել է, որ իր ծանոթներից մեկի` Վիկտոր Ս.-ի հորդորով մեկ ամիս առաջ եկել էր այն եզրակացության, որ քաղաքական այս իրավիճակում նպատակահարմար կլինի, որ հազարավոր մարդիկ իր վերադարձը պահանջող ցույցեր անեն Հայաստանում:
Ձեռնարկված բոլոր քայլերի շնորհիվ Ռ.Ք-ին և Վիկտոր Ս.-ին հաջողել է «Ֆեյսբուքում» մոբիլիզացնել և ակտիվացնել ավելի քան 1500 օգտատերերի, իսկ իրական կյանքում` մոտ 65 քաղաքացիների: Վերջիններս փորձել են ի պաշտպանություն նրա իրական ցույցեր անցկացնել Երևանում: Սակայն երբ հանրությունն արագ պարզել է, որ ցուցարարների մեծ մասը Ռ.Ք-ի ազգականներն են, քաղաքացի Ռ.Ք.-ն Վիկտոր Ս.-ին խորհուրդ է տվել ի աջակցություն իրեն` դրսից մարդ բերել:
Վիկտոր Ս.-ն նշել է, որ այդ նպատակով իրեն անհրաժեշտ է Ռ.Ք.-ի օֆշորային հաշիվներից մեկին անարգել մուտք ունենալ` նշված գործընթացի ֆինանսավորումը կազմակերպելու համար: Վիկտոր Ս.-ն ստացել է օֆշորային հաշվի բոլոր տվյալները և Ռ.Ք.-ի անունից իրականացրել է հետագա գործողությունները:
Քաղաքացի Ռ.Ք.-ն իր ցուցմունքում նշել է, որ ինքը չինացիներին և առավելևս` ալբանացիներին Հայաստան բերելու մտադրություն չի ունեցել, և տեղյակ չէ, թե իրենց խոսակցությունից հետո ինչ գործողություններ է իրականացրել Վիկտոր Ս.-ն, և որ իր տարածքներում հայտնաբերված անձանց մասին առաջին անգամ է լսում:
Նա նշել է, թե դրսից մարդ բերել ասելով ինքը նկատի չի ունեցել ցուցարարների ներկրումը, և որ կարծել է, թե այդ գումարներով Վիկտոր Ս.-ն պետք է դրսի հայտնի մարդկանց կաշառի, բերի Հայաստան, որտեղ էլ վերջիններս իր համար ցույցեր կանեն կամ ասուլիսներ կհրավիրեն` իրեն գովաբանելու համար:
Վիկտոր Ս.-ի նկատմամբ հայտարարվել է հետախուզում:
ՀՀ ազգային անվտանգության ծառայությունը և ՀՀ հատուկ քննչական ծառայությունը համատեղ անհետաձգելի օպերատիվ-հետախուզական միջոցառումներ և քննչական գործողություններ են իրականացնում` Վիկտոր Ս.-ին հայտնաբերելու համար:
Քրիստինե Խանումյան
MediaLab.am