Ռուս զինվորականների մի մասն արդեն իսկ Գեղարքունիքի մարզում է։ Այս մասին այսօր Շողակաթ համայնքում կայացած մամուլի ասուլիսին հայտարարեց Գեղարքունիքի մարզպետ Գնել Սանոսյանը։ Նրա խոսքով՝ հայ-ադրբեջանական սահմանային հատվածում ռուս զինծառայողների տեղակայման համատեղ գործընթաց է գնում և որոշակի փուլից հետո՝ մոտ ժամանակներում, նրանք կտեղակայվեն սահմանին, գրում է Factor.am-ը։
Դրանից հետո Հայաստանի և Ադրբեջանի զինված ուժերը հետ կքաշվեն այդ հատվածներից, որին կհաջորդի բանակցային գործընթացը և կարվեն սահմանային ճշգրտումներ։ Ինչ վերաբերում է Վերին Շորժայի հատվածում առկա իրավիճակին՝ Գնել Սանոսյանի խոսքով՝ այս պահին այդ հատվածում իրավիճակը կայուն է, չնայած որ հայ և ադրբեջանցի զինծառայողների միջև պարբերաբար միջադեպեր են գրանցվում։
Գեղարքունիքի մարզպետը հայտնեց նաև, որ մարզի բնակիչներին պատկանող 81 գլուխ անասուն գտնվում է ադրբեջանական կողմում։ Դրանք պատկանում են 5 ընտանիքների, որոնց այս ընթացքում որոշակի ֆինանսական աջակցություն է ցուցաբերվել, մինչև կհստակեցվի՝ անասուններին կհաջողվի՞ հետ բերել, թե՞ ոչ։ Հիշեցնենք, որ Վերին Շորժայի սահմանային հատվածում հայկական և ադրբեջանական զինված ուժերի միջև վերջին միջադեպը գրանցվել էր հուլիսի 5-ին։
Ադրբեջանցիների սադրած փոխհրաձգության հետևանքով հայկական կողմից թեթև վիրավորում էր ստացել մեկ զինծառայող, իսկ ադրբեջանական կողմը ՀՀ զինված ուժերի տվյալներով, ունեցել էր երկու վիրավոր զինծառայող։ «44-օրյա պատերազմից հետո մեծ խնդիր է դարձել սահմանային արոտավայրերը և խոտհարքերը օգտագործելը»,- նշեց մարզպետը։
Հարցը սրվել է հատկապես մայիսի 12-ից հետո, երբ Ադրբեջանի զինված ուժերը ներխուժել են ՀՀ տարածք։ Սանոսյանի խոսքով՝ խոտհունձի սեզոնին ՀՀ Զինված ուժերի բանակային կորպուսը լրացուցիչ ուժեր է ներգրավում, որպեսզի սահմանային գյուղերի բնակիչները կարողանան անվտանգ հավաքել խոտը։ Հիշեցնենք, որ մայիսի 12-ին Ադրբեջանի ԶՈՒ ստորաբաժանումները ապօրինաբար հատել են Հայաստանի պետական սահմանը և մինչև օրս շարունակում են գտնվել ՀՀ ինքնիշխան տարածքում։
