«Արդեն ասվել է, որ, եթե թիմը գնաց խորհրդարան՝ պարոն Վանեցյանը ևս գնալու է, բայց այս պահին պաշտոնական հայտարարություն չեմ կարող անել, արդյոք դաշինքը կգնա խորհրդարան, թե չէ: Շատ հավանական է, որ գնա, բայց այս պահին պաշտոնական որևէ բան չեմ կարող ասել»,- «Մեդիալաբին» ասաց «Պատիվ ունեմ» դաշինքի անդամ Սոս Հակոբյանը՝ հավելելով, որ վերջնական որոշում կայացնելու համար դաշինքը դեռ քննարկումներ է անցկացնում:
Հիշեցնենք, որ «Պատիվ ունեմ» դաշինքում պատգամավորական մանդատները վերցնել-չվերցնելու մասին հստակ դիրքորոշում չէին արտահայտում՝ սպասելով Սահմանադրական դատարանի որոշմանը՝ արտահերթ խորհրդարանական ընտրությունների արդյունքները չեղարկելու վերաբերյալ:
Սահմանադրական դատարանը վեց օր տևած քննարկումից հետո որոշեց անփոփոխ թողնել սույն թվականի հունիսի 21-ին կայացած արտահերթ խորհրդարանական ընտրությունների արդյունքները, որոնց համաձայն նորընտիր խորհրդարանը կազմված է երեք քաղաքական ուժից՝ «Քաղաքացիական պայմանագիր» կուսակցություն, «Հայաստան» և «Պատիվ ունեմ» դաշինքներ:
