ՀՀ կրթության, գիտության, մշակույթի և սպորտի նախարարությունն այսօր կտա հանրության մեծ մասին հուզող հարցի պատասխանը՝ դպրոցներն ու բուհերը կանցնե՞ն հեռավար դասապրոցեսի և որքա՞ն ժամանակով:
«Մենք օրվա ընթացքում այդ մասին տեղեկություն կտարածենք, սպասեք պաշտոնական տեղեկատվությանը»,- «Մեդիալաբին» ասաց ԿԳՄՍ նախարարի մամուլի խոսնակ Գեղամ Մելիքբեկյանը:
Մելիքբեկյանը մեզ հետ զրույցում ո՛չ հերքեց, ո՛չ հաստատեց լուրերը, թե Առողջապահության նախարարությունը հանդես է եկել առաջարկությամբ, որ դպրոցներում արձակուրդները երկարաձգվեն ևս մեկ շաբաթով, իսկ բուհերն անցնեն հեռավար կրթության, այլ հորդորեց սպասել նախարարության հայտարարությանը:
Հավելենք, որ սույն թվականի հոկտեմբերի 28-ից նոյեմբերի 7-ը Մոսկվայում, համավարակով պայմանավորված, սահմանվելու է նոր լոքդաուն: Կփակվեն ծառայության ոլորտի մի շարք ձեռնարկություններ, դպրոցներում արձակուրդ կլինի:
Հայաստանում ևս կան մարդիկ, որոնք պատկան մարմիններին կոչ են անում փակել դպրոցներն ու բուհերը, նաև ռեստորաններն ու սրճարանները:
Քրիստինե Աղաբեկյան