Անտառների միջազգային օրվա միջոցառումների շրջանակում քննարկվել են ոլորտի խնդիրների լուծման ծրագրերը

Անտառների միջազգային օրվա միջոցառումների շրջանակում քննարկվել են ոլորտի խնդիրների լուծման ծրագրերը
Անտառների միջազգային օրվա միջոցառումների շրջանակում քննարկվել են ոլորտի խնդիրների լուծման ծրագրերը
Հեղինակ MediaLab

Այսօր «Արմենիա Մարիոթ» հյուրանոցում տեղի է ունեցել «Անտառները և կրթությունը» խորագրով աշխատաժողով։ Մասնագիտական քննարկումն անց է կացվել ՄԱԿ-ի կողմից հռչակված և ամեն տարի մարտի 21-ին նշվող Անտառների միջազգային օրվա միջոցառումների շրջանակում:

Անտառների միջազգային օրվա այս տարվա կարգախոսն է՝ «Անտառների դերի և նշանակության իրազեկումն ու կրթությունը»: 

Աշխատաժողովին մասնակցել են Բնապահպանության նախարար էրիկ Գրիգորյանը, Հայաստանում Գերմանիայի Դաշնային Հանրապետության փոխդեսպան Քլաուս Վենդելբերգերը, ՄԱԶԾ-ի մշտական ներկայացուցիչ Դմիտրի Մարիասինը, ոլորտի մասնագետներ, պետական և բուհական հաստատությունների ներկայացուցիչներ։ 

Շնորհավորելով Անտառների միջազգային օրվա կապակցությամբ՝ նախարար Էրիկ Գրիգորյանը նկատել է, որ օրվա խորհուրդը կարևոր է մեր երկրի համար։ Նախարարը հայտնել է, որ երկար տարիներ օբյեկտիվ ու սուբյեկտիվ պատճառներով անտառը ենթարկվել է էական ճնշումների, ինչի հետևանքով անտառային զգալի տարածքներ ենթարկվել են դեգրադացիայի։ «Եկել է ժամանակը, որպեսզի անտառին վերադարձնենք այն, ինչ նա այս տարիներին տվել է մեզ։ Բնապահպանության նախարարությունը սկսել է անտառային ոլորտի բարեփոխումների նոր հայեցակարգի լայնածավալ քննարկումներ, որոնց կներգրավվեն ակադեմիական շրջանակների, միջազգային և հասարակական կազմակերպությունների մասնագետներ։ Անտառի պահպանման և վերականգնման գործընթացին պետք է ներգրավվի Հայաստանի յուրաքանչյուր քաղաքացի, ինչպես նաև սփյուռքի ներուժը»,-իր խոսքում նշել է բնապահպանության նախարարը։ 

Գերմանիայի Դաշնային Հանրապետության փոխդեսպան Քլաուս Վենդելբերգերը կարևորել է Հայաստանի հարուստ կենսաբազմազանության, մասնավորապես անտառների պահպանությունը և նշել, որ իր երկիրը մշտապես աջակցել և շարունակելու է աջակցել այդ ուղղությամբ Հայաստանի կառավարության իրականացրած միջոցառումներին։

Դմիտրի Մարիասինը ներկայացրել է անտառների պահպանության ոլորտում ՄԱԶԾ-ի և Բնապահպանության նախարարության կողմից իրականացվող համատեղ ծրագրերը։ ՄԱԶԾ-ի մշտական ներկայացուցիչը նկատել է, որ Հայաստանի կառավարությունը տվել է հավակնոտ ծրագրի մեկնարկը, որով նախատեսվում է մինչև 2050 թվականը Հայաստանի անտառապատ տարածքները հասցնել 20,1 տոկոսի և պատրաստակամություն է հայտնել համատեղ աշխատանանքեր տանել դրան հասնելու մեծածավալ միջոցառումներն արդյունավետ իրականացնելու համար։

Բնապահպանության նախարարի տեղակալ Այսեր Ղազարյանը ներկայացրել է անտառային ոլորտում վարվող պետական քաղաքականության հիմնական սկզբունքները, անտառկառավարման ժամանակակից միջոցների ներդրման ուղղությամբ տարվող քայլերը։ Փոխնախարարը կարևորել է անտառների այլընտրանքային օգտագործման խթանումը՝ բացառելով այն միայն որպես փայտանյութի աղբյուր դիտարկելը։

Աշխատաժողովի մասնակիցներն առաջնային են համարել անտառի վրա ճնշումները թուլացնելու ծրագրերի մշակումը և գործուն միջոցների կիրառումը։ Մասնավորապես ներկայացվել է այլընտրանքային վառելիքի՝ պալետների արտադրության և օգտագործման խթանումը, օրենսդրական և ինստիտուցիոնալ բարեփոխումներով անտառների կառավարման արդյունավետության բարձրացումը և ապօրինի անտառհատումների դեմ պայքարը։ Ոլորտի մասնագետներն առաջնային են համարել Հայաստանի անտառային տարածքների ավելացման հետևողական և արդյունավետ քայլերի իրականացումը։

Այս մասին տեղեկացնում է պաշտոնական հաղորդագրությունը։